ជាទូទៅ ស្រីៗយើងមួយចំនួនធ្លាប់មានអារម្មណ៍ក្រហាយត្រង់បរិវេណទ្វារមាស ដែលនេះអាចបណ្ដាលមកពីបញ្ហាផ្សេងៗ ដែលរួមមានការរលាក ឬជំងឺកាមរោគជាដើម។ ពិតណាស់ មូលហេតុបង្កនីមួយៗសុទ្ធតែមានរោគសញ្ញា និងរបៀបនៃការព្យាបាលខុសៗគ្នា។
មូលហេតុបង្កទាំង៤ នាំឲ្យក្រហាយទ្វារមាស
១. ការរលាក
វត្ថុជាក់លាក់មួយចំនួន អាចធ្វើឲ្យស្បែកទ្វារមាសរលាក ក្នុងនោះរួមមាន សាប៊ូ ក្រណាត់ និងទឹកអប់។ ស្រីៗយើងអាចសង្កេតមើលរោគសញ្ញានៃការរលាកមួយចំនួនខាងក្រោម៖
- រមាស់ធ្ងន់ធ្ងរ
- មានអារម្មណ៍ផ្សា
- ឈឺចាប់។
ដើម្បីព្យាបាលការរលាក យើងចាំបាច់ជៀសវាងប្រើប្រាស់វត្ថុដែលបង្កការរលាក និងមិនត្រូវអេះបរិវេណនោះ ដើម្បីឲ្យស្បែកជាសះស្បើយ។ ប៉ុន្តែ នៅពេលខ្លះ បញ្ហានេះចាំបាច់ត្រូវប្រើថ្នាំផងដែរ។
២. បាក់តេរីក្នុងទ្វារមាស
បញ្ហានេះកើតឡើងនៅពេលដែលមានបាក់តេរីច្រើនប្រភេទនៅក្នុងទ្វារមាស ដែលប៉ះពាល់ដល់តុល្យភាពធម្មតានៃបរិវេណនោះ។ រោគសញ្ញាមួយនៃបាក់តេរីក្នុងទ្វារមាស គឺមានអារម្មណ៍ក្រហាយនៅក្នុងទ្វារមាស និងក្រហាយនៅពេលនោម។ រោគសញ្ញារួមមាន៖
- ធ្លាក់ទឹករម្អិលទ្វារមាសដែលមានពណ៌ស ឬប្រផេះ
- ឈឺចាប់
- រមាស់
- មានក្លិនឆ្អាប ជាពិសេសក្រោយពេលរួមភេទ
ចំពោះស្រីៗដែលមានបញ្ហាបាក់តេរីក្នុងទ្វារមាស គួរតែពិនិត្យ និងទទួលការព្យាបាលពីគ្រូពេទ្យជំនាញ ពីព្រោះស្ថានភាពសុខភាពមួយនេះអាចបង្កើនហានិភ័យនៃការឆ្លងជំងឺកាមរោគបាន។
![](https://cdn.hellokrupet.com/wp-content/uploads/2022/04/ហ្គាសទ្វារមាស២.jpg)
៣. ការឆ្លងមេរោគផ្សិត
ទន្ទឹមនឹងនេះដែរ ការបង្ករោគនៅក្នុងទ្វារមាស ដែលបង្កឡើងដោយពពួកផ្សិត អាចនាំឲ្យយើងមានអារម្មណ៍ក្រហាយ។ រោគសញ្ញាពាក់ព័ន្ធរួមមាន៖
- រមាស់
- ឈឺ
- ឈឺចាប់អំឡុងពេលរួមភេទ
- នោមឈឺ
- ធ្លាក់ទឹករម្អិលពីទ្វារមាស
៤. ការបង្ករោគលើផ្លូវទឹកនោម
ផ្នែកផ្សេងៗនៃផ្លូវទឹកនោម អាចឆ្លងមេរោគបាន ដែលមានដូចជាប្លោកនោម បង្ហួរនោម និងតម្រងនោម។ ជាទូទៅ ស្រីៗដែលមានបញ្ហាមួយនេះ អាចមានអារម្មណ៍ក្រហាយក្នុងទ្វារមាសនៅពេលនោម។ រោគសញ្ញាដទៃទៀតមាន៖
ឈឺនោមភ្លាមៗ និងញឹកញាប់ នោមឈឺ ទឹកនោមល្អក់ ឬមានក្លិនមិនល្អ មានឈាមក្នុងទឹកនោម ឈឺចាប់ក្នុងពោះផ្នែកខាងក្រោម មានអារម្មណ៍អស់កម្លាំង ឬមិនស្រួលខ្លួន ក្នុងករណីនេះ គ្រូពេទ្យនឹងឲ្យថ្នាំផ្សះ ដើម្បីព្យាបាល ហើយជាធម្មតា ការបង្ករោគនេះនឹងបាត់ទៅវិញក្នុងរយៈពេល៥ថ្ងៃ ក្រោយពេលញ៉ាំពពួកថ្នាំផ្សះ។
អត្ថបទគួរអាន៖
ចំណុចសំខាន់
អាការៈក្រហាយទ្វារមាស ធ្វើឲ្យយើងមានអារម្មណ៍មិនស្រួល និងឈឺចាប់ខ្លាំង។ ហេតុនេះហើយ ស្រីៗយើងគួរយល់ដឹងពីមូលហេតុបង្កឲ្យបានត្រឹមត្រូវ ដើម្បីស្វែងរកការព្យាបាលបានទាន់ពេលវេលា។ បញ្ហាមួយចំនួន ដែលនាំឲ្យមានអាការៈនេះ៖
- ការរលាក
- បាក់តេរីក្នុងទ្វារមាស
- ការឆ្លងមេរោគផ្សិត
- ការបង្ករោគលើផ្លូវទឹកនោម។