វីតាមីនសំខាន់ៗជំនួយដល់ការលូតលាស់ឆ្អឹង
ឆ្អឹងមានសារៈសំខាន់ខ្លាំងណាស់ក្នុងរាងកាយរបស់យើង ជួយឲ្យរាងកាយយើងរឹងមាំ ប្រសិនបើសុខភាពឆ្អឹងចុះខ្សោយ នោះសុខភាពរាងកាយយើងទាំងមូលក៏ប្រឈមនឹងការទ្រុឌទ្រោមផងដែរ។ ដូច្នេះដើម្បីរក្សាដង់ស៊ីតេឆ្អឹងឲ្យរឹងមាំ យើងគួរគប្បីមកស្គាល់វីតាមីនសំខាន់ៗដូចខាងក្រោមមានដូចជា៖
១.វីតាមីន D
វីតាមីន D គឺជាវីតាមីនដ៏សំខាន់បំផុតមួយសម្រាប់ឆ្អឹង និងសន្លាក់។ រាងកាយរបស់យើងរក្សាទុកវីតាមីន D នៅក្នុងជាលិកាខ្លាញ់ នេះមានន័យថាយើងមិនចាំបាច់បំពេញសារធាតុចិញ្ចឹមនេះជារៀងរាល់ថ្ងៃនោះទេ។ យោងតាមវិទ្យាស្ថានជាតិសុខភាព វីតាមីន D ជួយឲ្យរាងកាយរបស់យើងស្រូបយកជាតិកាល់ស្យូម។ ប្រសិនជាខ្វះវីតាមីននេះនឹងធ្វើឲ្យរាងកាយយើងប្រឈមបញ្ហារលាកសន្លាក់។
វីតាមីន D យើងអាចទទួលបានភាគច្រើនក្នុងទម្រង់ជាអាហាររូបត្ថម្ភស្ថិតក្នុងពពួកវីតាមីនចម្រុះ ពពួកគ្រឿងសមុទ្រ គ្រាប់ធញ្ញជាតិ ទឹកដោះគោស្រស់ បន្ថែមពីនេះយើងក៏ទទួលបានពីការសំយោគព្រះអាទិត្យជាមួយនឹងរាងកាយក្នុងបរិមាណតិចតូច។
២.វីតាមីន A
វីតាមីន A តួនាទីសំខាន់សម្រាប់ទ្រទ្រង់សុខភាពឆ្អឹងឲ្យរឹងមាំ ប៉ុន្ដែក៏អាចធ្វើប៉ះពាល់ដល់សុខភាពឆ្អឹងបានដែរ ប្រសិនយើងមិនបានដឹងពីរបៀបប្រើប្រាស់។ តាមការសិក្សាបានបង្ហាញថា ប្រសិនបើរាងកាយរបស់យើងមានបរិមាណវីតាមីន A លើសតម្រូវការ នោះនឹងប្រឈមការធ្លាក់ចុះនៃកម្រិតដង់ស៊ីតេឆ្អឹង។
ប្រភពមួយ នៃវីតាមីន A ដែលចេញពីសារធាតុ Retinol ដែលជាប្រភេទខ្លាញ់រលាយ គឺត្រូវបានរក្សាទុកក្នុងថ្លើម ដូច្នេះថ្លើមសត្វ និង ថ្លើមត្រី គឺសម្បូរវីតាមីន A ប្រភេទនេះខ្លាំងណាស់។
រាងកាយរបស់យើងក្នុងមួយថ្ងៃត្រូវការ វីតាមីន A ចន្លោះពី ២ ទៅ ៣ពាន់ មីក្រូក្រាម ប្រសិនបើលើសពីនេះអាចធ្វើឲ្យយើងប្រឈមនឹងអាការៈឈឺក្បាល ថែមទាំងប៉ះពាល់ដល់សុខភាពឆ្អឹងទៀតផង។ ហេតុនេះហើយទើបយើងប្រុងប្រយ័ត្ន ចំពោះការញ៉ាំថ្នាំគ្រាប់ វីតាមីន A និង ការនិយមញ៉ាំថ្លើមសត្វដែលសម្បូរទៅដោយវីតាមីនA។ ប៉ុន្ដែចំពោះវីតាមីន A មានក្នុងបន្លែផ្លែឈើ ជាប្រភេទ beta-carotene ជាទូទៅត្រូវបានចាត់ទុកថាមានសុវត្ថិភាព។
៣.វីតាមីន B12
វីតាមីន B12 ជួយបង្កើនការលូតលាស់កោសិកាឆ្អឹង ប្រសិនបើកង្វះវីតាមីននេះ អាចប្រឈមហានិភ័យខ្ពស់នៃជំងឺពុកឆ្អឹងទាំងបុរស និងស្ត្រី។ វីតាមីន B12 ជាទូទៅមាននៅក្នុង សាច់ និងត្រី ចំពោះបន្លែផ្លែឈើ គឺមានតិចតួចបំផុត។
ចំពោះអ្នកមានជំងឺក្រពះ ពោះវៀន ឬខ្សោយប្រព័ន្ធរំលាយអាហារ អាចពិបាកស្រូបយកវីតាមីនសំខាន់នេះ តួយ៉ាងចំពោះមនុស្សចាស់ក្នុងវ័យ ៨០ និង ៩០ ឆ្នាំ ជាដើម លើសពីនេះអ្នកដែលតបសាច់ ក៏ប្រឈមខ្វះវីតាមីននេះដែរ។
៤.វីតាមីន C
វីតាមីន C ជួយឲ្យឆ្អឹងមានសុខភាពល្អ នោះក៏ព្រោះតែវាមានសារៈសំខាន់ក្នុងការបង្កើតកូឡាជែនដែលជាមូលដ្ឋានគ្រឹះនៃការបង្កើតសារធាតុរ៉ែជំនួយដល់ឆ្អឹង។ ការសិក្សាបានបង្ហាញថាវីតាមីន C ជួយឲ្យដង់ស៊ីតេឆ្អឹងរឹងមាំ។ យើងអាចស្វែងប្រភព នៃវីតាមីន C មានដូចជា ផ្កាខាត់ណាខៀវ ផ្កាខាត់ណា ក្រូច ល្ហុង ក្រូចឆ្មា ស្ត្របឺរីជាដើម។
៥.វីតាមីន K
វីតាមីន K ក៏ជាតម្រូវការចំាបាច់ចំពោះការលូតលាស់ទាំងឆ្អឹងធម្មតា និងឆ្អឹងខ្ចីផងដែរ។ វាមានមុខងារជួយចាប់យកជាតិកាល់ស្យូម ធ្វើឲ្យកម្រិតដង់ស៊ីតេឆ្អឹងរឹងមាំ និង ការពារពីជំងឺពុកឆ្អឹង។ វីតាមិន K មានច្រើនក្នុងរបបអាហារប្រចាំថ្ងៃរបស់យើង ដូចជា ប្រូខូលី ស្ពៃក្តោប ប្រេងកាណូឡា ខាត់ណា ប្រេងអូលីវ ជីវ៉ាន់ស៊ុយ និងស្ពៃពួយឡេងជាដើម ដូច្នេះការកង្វះវីតាមីនKកម្រកើតមានណាស់។
អត្ថបទគួរអាន៖
- ឧស្សាហ៍ឈឺអញ្ចាញធ្មេញ អាចពាក់ព័ន្ធបញ្ហាសុខភាពទាំងនេះ
- ទម្លាប់អាក្រក់ ៨ យ៉ាងធ្វើឲ្យធ្មេញខូចដោយមិនដឹងខ្លួន
- រោគសញ្ញាសាមញ្ញទាំងនេះកុំថាមិនអី បញ្ជាក់ថាធ្មេញចាប់ផ្តើមពុកហើយ
- ឧស្សាហ៍ស្រៀវធ្មេញ សាកតិចនិកទាំងនេះលមើល៍
- ជំងឺមាត់ធ្មេញ ២ ប្រភេទគួរឲ្យបារម្ភបំផុត បើមានឆាប់ទៅព្យាបាលឲ្យលឿន
