ចាក់វ៉ាក់សាំងការពារជំងឺមហារីកមាត់ស្បូនរួចហើយ ប្រហែលជាគ្រប់គ្នាគិតថា មិនចាំបាច់ពិនិត្យតាមដានរកជំងឺមហារីកមាត់ស្បូនជាប្រចាំជាមួយគ្រូពេទ្យអីទៀតនោះទេ។ តែគ្រូពេទ្យឯកទេសផ្នែកជំងឺមហារីក លោកវេជ្ជបណ្ឌិត អ៊ាវ សុខា អះអាងថា ត្បិតវ៉ាក់សាំងជំងឺមហារីកមាត់ស្បូនមានប្រសិទ្ធភាពខ្ពស់ក្នុងការបង្ការក៏ពិតមែន តែមិនអាចជំនួសការតាមដានរកជំងឺមហារីកមាត់ស្បូនជាប្រចាំនោះទេ។
លោកវេជ្ជបណ្ឌិតប្រធានផ្នែកជំងឺមហារីក និងជំងឺឈាម នៃមន្ទីរពេទ្យកាល់ម៉ែត រូបនេះបន្តថា ប្រសិទ្ធភាពនៃការចាក់វ៉ាក់សាំងជំងឺមហារីកមាត់ស្បូន មិនដូចគ្នានោះទេ រវាងការចាក់នៅពេលទាន់ប្រឡូកក្នុងការរួមភេទ និងការចាក់ក្រោយពីបានចាប់ផ្តើមជីវិតផ្លូវភេទ។
អត្ថបទពាក់ព័ន្ធ៖
- ខ្លាចមហារីកមាត់ស្បូនអត់? បើខ្លាចត្រូវស្វែងយល់អំពីវ៉ាក់សាំង HPV
- ដឹងពីប្រភេទវ៉ាក់សាំងមហារីកមាត់ស្បូនសិន ចាំសម្រេចចិត្តចាក់មួយណា
ក្មេងស្រីៗអាចវ៉ាក់សាំងជំងឺមហារីកមាត់ស្បូនបានចាប់ពីអាយុ ៩ឆ្នាំឡើងទៅ ឯប្រសិទ្ធភាពនៃការចាក់វ៉ាក់សាំងនេះនៅវ័យក្មេង ហើយមិនមានការរួមភេទទាល់តែសោះនោះ អាចការពារជំងឺមហារីកមាត់ស្បូនដល់ទៅជាង ៩០%។
ចំពោះស្ត្រីដែលរួមភេទហើយវិញ អាចចាក់វ៉ាក់សាំងមហារីកមាត់ស្បូនបាន លុះត្រាតែមានកៀរកោសិកាមាត់ស្បូនមកវិភាគសិន តើមានមេរោគ HPV ឬអត់? ប្រសិនបើមិនមានទេ នោះបញ្ជាក់ថា យើងអាចចាក់វ៉ាក់សាំងនេះបាន ហើយត្រូវប្រាកដថាក្នុងរយៈពេល ៦ ខែ អំឡុងពេលចាក់វ៉ាក់សាំង ស្រីៗយើងមិនត្រូវមានផ្ទៃពោះឲ្យសោះ ឯប្រសិទ្ធភាពក្រោយចាក់មានប្រមាណតែ ៧០% ប៉ុណ្ណោះ។
វ៉ាក់សាំងជំងឺមហារីកមាត់ស្បូន (HPV) អាចការពារជំងឺមហារីកស្បូនបានក៏ពិតមែន តែទោះយ៉ាងណាក្រោយពេលចាក់វ៉ាក់សាំងរួច ស្ត្រីដែលមានដៃគូរួមភេទត្រូវពិនិត្យតាមដាន និងធ្វើតេស្តកោសិកាមហារីកមាត់ស្បូនជាមួយគ្រូពេទ្យជំនាញ រៀងរាល់ ១-២ឆ្នាំ/ម្តង។
[embed-health-tool-bmi]
