ចាស់ៗពីដើមតឹងរឹងខ្លាំងណាស់ចំពោះស្ត្រីមានផ្ទៃពោះ មិនឲ្យញ៉ាំអាហារអីផ្តេសផ្តាសទេ បារម្ភខ្លាចកូនកើតមកមានបែបនេះ មានបញ្ហាបែបនោះ។ ទោះយ៉ាងណាជំនឿមួយចំនួនជាជំនឿខុសឆ្គង ប្រាសចាកពីក្បួនពេទ្យ នេះបើតាមការលើកឡើងរបស់លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រី នៃមន្ទីរពេទ្យបង្អែកមិត្តភាពកម្ពុជា-ចិន សែនសុខ។
ជំនឿខុសឆ្គងមួយចំនួនទាក់ទងនឹងរបបអាហារស្ត្រីមានផ្ទៃពោះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- ញ៉ាំខ្ចៅខ្យងកូនហៀរទឹកមាត់
ចាស់ៗពីដើមមានជំនឿថា ញ៉ាំខ្ចៅខ្យងនាំឲ្យកូនហៀរទឹកមាត់ តែក្បួនពេទ្យវិញករណីក្មេងហៀរទឹកមាត់អាចមកពីក្មេងមានអណ្តាតធំ មានការបង្ករោគនៅក្រពេញទឹកមាត់ រលាកបំពង់ក ច្រាលទឹកអាស៊ីដក្រពះ ឬមានបញ្ហាប្រព័ន្ធសរសៃប្រសាទជាដើម។ ទោះជាការញ៉ាំពពួកសត្វអត់មានឈាមទាំងនោះមិនធ្វើឲ្យកូនកើតមានហៀរទឹកមាត់ក៏ដោយ ក៏ម៉ាក់ៗមិនត្រូវញ៉ាំដែរ ព្រោះសត្វទាំងនោះមិនសម្បូរប្រូតេអ៊ីនទេ វារស់នៅក្នុងទឹកកខ្វក់ សំបកមានជាប់ដី ឬស្លែខ្មៅៗ និងសត្វល្អិតមកជាមួយ កាលយើងលាងមិនស្អាត ឬចម្អិនមិនឆ្អិនល្អទៀត ធ្វើឲ្យឆ្លងព្រូន អៀន តេនញ៉ា ញ៉ាំទៅម៉ាក់ៗអាចឈឺពោះ រាករូស ឬកើតជំងឺផ្សេងទៀត ប៉ះពាល់ដល់កូនក្នុងផ្ទៃ។
២- ញ៉ាំបបរកូនកើតមកស្បែកមិនស្អាត
ចាស់ៗតែងហាមម៉ាក់ៗមិនឲ្យញ៉ាំបបរទេ ខ្លាចកើតមកស្បែកស ពព្រុសដូចបបរអ៊ីចឹង។ តែតាមក្បួនវេជ្ជសាស្ត្រ សម្បុរស្បែកកូនស្អាត ឬមិនស្អាត មកពីរបបអាហារ សម្បុរម៉ាក់ប៉ា និងអនាម័យខ្លួនប្រាណម៉ាក់ៗ បើម៉ាក់មានរោគផ្សិតអំឡុងពពោះនោះស្បែកកូនក៏មិនស្អាតដែរ។
៣- ញ៉ាំព្រីងកូនកើតមកខ្មៅ
ដោយសារតែផ្លែព្រីងមានពណ៌ខ្មៅរលោងស្រិល ពេលញ៉ាំទៅស្វាយពេញមាត់ ទើបបានជាចាស់ៗតែបង្អាប់ថា ស្រីៗពពោះឲ្យតែញ៉ាំព្រីង ដឹងតែកូនកើតមកសម្បុរខ្មៅដូចព្រីងអ៊ីចឹង។ តែតាមការពិត កូនមានសម្បុរខ្មៅ អាស្រ័យទៅហ្សែនរបស់ឪពុកម្តាយ និងកត្តារួមផ្សំមួយចំនួនដូចជាការញ៉ាំអាហារ បន្លែផ្លែឈើដែលអត់សម្បូរជីវជាតិ វីតាមីនចម្រុះ មិនមែនញ៉ាំព្រីងធ្វើឲ្យកើតមកខ្មៅនោះទេ។
៤- ញ៉ាំម្នាស់ធ្វើឲ្យកូនរលូត
ក្នុងផ្លែម្នាស់មានអង់ហ្ស៊ីម Bromelain បំបែកជាតិប្រូតេអ៊ីន ដូច្នេះទើបមានការយល់ច្រឡំថា កូនទើបតែបង្កកំណើតថ្មីៗក្នុងផ្ទៃពោះ ផ្សំបង្កើតឡើងដោយជាតិប្រូតេអ៊ីន អ៊ីចឹងការញ៉ាំអង់ហ្ស៊ីម Bromelain អាចបណ្តាលឲ្យមានការហូរឈាម និងរលូតកូនបាន។ តែមកដល់បច្ចុប្បន្ននេះគ្មានភស្តុតាងគាំទ្រការអះអាងនេះទេ ផ្ទុយទៅវិញ ម៉ាក់ៗញ៉ាំម្នាស់ក្នុងបរិមាណល្មម មានសុវត្ថិភាព។
អ្វីដែលគ្រូពេទ្យហាមនោះ គឺត្រី សាច់ ស៊ុតឆៅ ឬចម្អិនមិនបានឆ្អិនល្អ ត្រីឆ្លាម ត្រីដាវដែលមានជាតិបារ៉តខ្ពស់ គ្រឿងស្រវឹង គ្រឿងញៀន បារី កាត់បន្ថយជាតិកាហ្វេអ៊ីន តែប៉ុណ្ណោះ។
អត្ថបទពាក់ព័ន្ធ៖
- អាហារ និងប្រការគួរចៀសវាងពេលពពោះ
- ទម្លាប់ល្អៗ ជួយឲ្យកូនកើតមកសុខភាពល្អ ហើយឆ្លាត
- ប្រភេទអាហារល្អៗ ម៉ាក់ៗពពោះកូនដំបូងមិនគួររំលង
- ប៉ូវអាហារប៉ុន្មានមុខនេះអំឡុងពពោះ មិនភ័យកូនកើតមកខ្សោយបញ្ញា
- COVID-19 កំពុងរាតត្បាត ស្ត្រីពពោះត្រូវដឹងពីវិធីការពារខ្លួនទាំងនេះ
- របបអាហារគ្មានជាតិសាច់ អាចប៉ះពាល់ខួរក្បាល ពិសេសអំឡុងពេលពពោះ?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម