អាហារ និងប្រការគួរចៀសវាងពេលពពោះ

ពេលដឹងថាមានផ្ទៃពោះ ម៉ាក់ៗប្រយ័ត្នគ្រប់យ៉ាង ទាំងកាយវិការ ចំណីអាហារ និងសកម្មភាពផ្សេងៗ ដើម្បីឲ្យកូនក្នុងផ្ទៃលូតលាស់បានល្អ។ ខាងក្រោមនេះជាអាហារ និងប្រការគួរចៀសវាងពេលមានផ្ទៃពោះណែនាំដោយគ្រូពេទ្យផ្នែកសម្ភព លោកស្រីវេជ្ជបណ្ឌិត ទី សុវណ្ណរដ្ឋ។

១. អាហារគួរចៀសវាងពេលពពោះ

– ត្រីសមុទ្រសម្បូរជាតិបារតខ្ពស់៖ ត្រីឆ្លាម ត្រីថាលហ្វីល ត្រីដាវ ឬត្រីស្បៃកា ជាប្រភេទត្រីសម្បូរសារធាតុបារតខ្ពស់ ស្ត្រីមានផ្ទៃពោះមិនត្រូវញ៉ាំនោះទេ ព្រោះអាចប៉ះពាល់ដល់កូនក្នុងផ្ទៃ ធ្វើឲ្យកូនកើតមកមានភាពមិនប្រក្រតី លូតលាស់មិនល្អ ឬមានបញ្ហាប្រព័ន្ធសរសៃប្រសាទ។

– ត្រី សាច់ ស៊ុតឆៅ៖ ត្រី សាច់ ស៊ុត សុទ្ធជាប្រភពនៃប្រូតេអ៊ីន ល្អបំផុតចំពោះស្ត្រីមានផ្ទៃពោះ និងកូនក្នុងផ្ទៃ តែទោះយ៉ាងណាស្រីគ្នាយើងត្រូវចម្អិនឲ្យឆ្អិនល្អមុននឹងញ៉ាំ មិនត្រូវញ៉ាំត្រី សាច់ ស៊ុតឆៅ ឬចម្អិនមិនបានឆ្អិនល្អនោះទេ ព្រោះអាចប្រឈមនឹងពពួកប៉ារ៉ាស៊ីត បាក់តេរី ឬមេរោគ ធ្វើឲ្យប៉ះពាល់ដល់សុខភាពម្តាយ និងកូនក្នុងផ្ទៃ។

– បារី៖ ជាតិនីកូទីន និងសារធាតុគីមីពុលរាប់ពាន់ប្រភេទផ្សេងទៀតដែលមានក្នុងបារី និងផ្សែងបារីមិនត្រឹមតែធ្វើឲ្យម៉ាក់ៗកើតជំងឺច្រើនមុខទេ អាចធ្វើកូនក្នុងពោះប្រឈមនឹងបញ្ហាសុខភាពទាំងនៅពេលពោះ និងក្រោយពេលសម្រាល ដោយការបឺតស្រូបផ្សែងបារីតាមរយៈទងសុក ដូចជាដំណើរការមុខងាររបស់សុកមិនបានល្អ អាចធ្វើឲ្យកូនរលូត កើតមុនកំណត់ កូនលូតលាស់មិនល្អ មិនគ្រប់គីឡូ-មិនគ្រប់លក្ខណៈ មានបញ្ហាផ្លូវដង្ហើម សួត ឬកើតមកស្លាប់។

– គ្រឿងស្រវឹង៖ ជាតិអាល់កុលដែលមាននៅក្នុងគ្រឿងស្រវឹងមិនត្រឹមតែប៉ះពាល់ដល់សុខភាពម្តាយនោះទេ ថែមទាំងប៉ះពាល់ការលូតលាស់របស់ទារកក្នុងផ្ទៃទៀត ក្នុងនោះកូនកើតមកអាចមិនគ្រប់គីឡូ មានបញ្ហាអាកប្បកិរិយា-ការរៀនសូត្រជាដើម។

– កាហ្វេអ៊ីន៖ ផឹកកាហ្វេច្រើនលើសកម្រិតនៅអំឡុងពេលពពោះ អាចនាំឲ្យរលូតកូន កូនមិនលូតលាស់ កូនកើតមិនគ្រប់គីឡូ ឬកូនកើតមុនខែ។ ប៉ុន្តែសម្រាប់ស្រីៗចូលចិត្តផឹកកាហ្វេ ពពោះ ហើយអត់មិនបាន គ្រាន់តែផឹកក្នុងកម្រិតត្រឹមត្រូវ តិចជាង ២០០ មិល្លីក្រាម/ថ្ងៃ ឬផឹកយូរៗម្តង ហានិភ័យទាំងនេះស្ថិតក្នុងកម្រិតទាប។

– អាហារមិនបានសម្លាប់មេរោគ៖ មាន ទឹកដោះគោដែលមិនបានសម្លាប់មេរោគ ឈីស ។ សាច់ ឬទឹកដោះគោមិនបានសម្លាប់ មានផ្ទុកនូវពពួកប៉ារ៉ាស៊ីត និងបាក់តេរីមួយចំនួន អាចប៉ះពាល់ដល់សុខភាពយើង និងទារកក្នុងផ្ទៃ ដូចជា ពុលអាហារ គ្រុនពោះវៀនជាដើម ហើយជំងឺទាំងនេះអាចបង្កឲ្យទារក និងម្ដាយមានបញ្ហាដូចជា ទម្ងន់ទារកមិនគ្រប់ សម្រាលមុនខែ រលូត និងអាចបណ្ដាលឲ្យទារកបាត់បង់ជីវិតក្នុងពោះទៀតក៏មាន។

២. ប្រការគួរចៀសវាងពេលពពោះ

– កុំប្រើថ្នាំដោយគ្មានវេជ្ជបញ្ជា៖ មានជំងឺអ្វីមួយ ហើយចង់ប្រើថ្នាំ ស្ត្រីមានផ្ទៃពោះចាំបាច់ត្រូវពិគ្រោះជាមួយគ្រូពេទ្យ ព្រោះការប្រើថ្នាំផ្តេសផ្តេស ដោយគ្មានវេជ្ជបញ្ជា អាចនឹងមានផលប៉ះពាល់ដល់កូនក្នុងពោះ។ ក្រៅពីនោះ ពេទ្យហាមផ្តាច់ចំពោះការប្រើថ្នាំបុរាណពេលពពោះ ព្រោះអាចធ្វើឲ្យ សុកក្រិន ទឹកភ្លោះល្អក់ មាត់ស្បួនមិនបើក កូនពិបាកកើត ធ្លាក់ឈាមខ្លាំង កូនខ្សោយ ឬស្លាប់ក្នុងពោះ។

– កុំអង្គុយ ឬឈរយូរពេល៖ មានផ្ទៃពោះ យើងមិនត្រូវអង្គុយ ឬឈរយូរនោះទេ ត្រូវឧស្សាហ៍ធ្វើចលនា កន្លះម៉ោង-១ម៉ោង/ម្តង ដោយដើរ ឬលើកដៃលើកជើងចុះឡើងក៏បាន។ ការឈរយូរពេកពេលមានផ្ទៃពោះ ធ្វើឲ្យសសៃឈាមមិនសូវធ្វើចលនា ប្រមូលផ្តុំនៅតែមួយកន្លែង ជះឥទ្ធិពលមិនល្អដល់រាងកាយ ដូចជាឈឺជើង ហើមជើង ចុករួយអាងត្រគាក ឈឺឆ្អឹងខ្នង ងាយប្រឈមនឹងការឡើងសម្ពាធឈាម អាចរីកសរសៃឈាមវ៉ែននៅជើង អាចសម្រាលកូនមុនខែ។

– សម្រាកឲ្យបានច្រើន ចៀសវាងការធ្វើការធ្ងន់ៗ៖ យើងដឹងហើយថា សុខភាពស្ត្រីមានផ្ទៃពោះខ្សោយជាងមនុស្សធម្មតា ជួបអាការៈចាញ់កូន ធ្វើឲ្យអស់កម្លាំង ធេងធោងខុសប្រក្រតី ដូចនេះពេទ្យតម្រូវឲ្យម៉ាក់ៗសម្រាកឲ្យច្រើន ចៀសវាងធ្វើការងារលើសកម្លាំង ឬលើកដាក់របស់ធ្ងន់ៗ។

អត្ថបទពាក់ព័ន្ធ៖

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ដេត ធន្នី · កែ 13/04/2020

អាហារ និងប្រការគួរចៀសវាងពេលពពោះ

១. អាហារ​គួរ​ចៀស​វាង​ពេល​ពពោះ

២. ប្រការគួរចៀសវាងពេលពពោះ

១. អាហារគួរចៀសវាងពេលពពោះ