វីតាមីន D គឺជាវីតាមីនដែលរាងកាយផលិតនៅពេលត្រូវពន្លឺព្រះអាទិត្យ ហើយក៏មាននៅក្នុងអាហាររបស់យើងផងដែរ។ វីតាមីន D មានគុណប្រយោជន៍អាចជួយដល់ឆ្អឹង និងប្រព័ន្ធភាពស៊ាំ។ នៅពេលកម្រិតវីតាមីន D ទាបអាចបង្កើនហានិភ័យជំងឺទឹកនោមផ្អែម ជំងឺបេះដូង និងមហារីក។ ប្រសិនជាយើងចង់ទទួលបានវីតាមីន D គ្រប់គ្រាន់ យើងអាចទទួលបានតាមបែបធម្មជាតិដូចជាពន្លឺព្រះអាទិត្យ និងរបបអាហារ។
១. ពន្លឺព្រះអាទិត្យ
ពន្លឺព្រះអាទិត្យអាចជួយរាងកាយផលិតវីតាមីន D ដូចនេះគួរចំណាយពេលនៅក្រោមពន្លឺថ្ងៃពីរទៅបីដងក្នុងមួយសប្តាហ៍។ កុមារ និងមនុស្សពេញវ័យគួរចំណាយពេលពី២០ទៅ៣០នាទីនៅខាងក្រៅផ្ទះពីរទៅបីដងក្នុងមួយសប្តាហ៍ដើម្បីទទួលបានពន្លឺព្រះអាទិត្យ។ ពេលនៅក្រៅគួរឲ្យមុខ និងដៃរបស់យើងទទួលបានពន្លឺព្រះអាទិត្យ។ គ្នាយើងត្រូវចាំថា យើងមិនអាចទទួលបានវីតាមីន D ដោយការប្រើពន្លឺសិប្បនិមិត្តទេ។
ដោយឡែកនៅពេលមេឃស្រទុំ យើងក៏អាចចេញទៅក្រៅដើម្បីទទួលបានពន្លឺព្រះអាទិត្យដែរ។ នៅពេលមេឃស្រទុំ យើងអាចទទួលបានពន្លឺព្រះអាទិត្យតិចជាង៥០%។ បើយើងនៅក្រោមម្លប់ យើងទទួលបានតិចជាង៦០%។ ដូចនេះយើងគួរចំណាយពេលយ៉ាងតិច ៤៥ទៅ៦០នាទី។
ចំពោះគ្នាយើងដែលត្រូវចេញទៅក្រៅត្រឹមតែ២០ ទៅ៣០នាទី អាចរំលងការប្រើប្រាស់ឡេការពារកម្ដៅថ្ងៃ ព្រោះឡេការពារកម្ដៅថ្ងៃអាចបន្ថយការផលិតវីតាមីន D នៅក្នុងរាងកាយ។ ប៉ុន្តែបើយើងត្រូវចំណាយពេលនៅក្រៅច្រើនជាងនេះ គួរប្រើប្រាស់ឡេការពារកម្ដៅថ្ងៃ ព្រោះពេលត្រូវកម្ដៅថ្ងៃខ្លាំងអាចបង្កឲ្យខូចស្បែក មានជំងឺមហារីកស្បែក និងស្នាមជ្រួញលើស្បែក។
អត្ថបទពាក់ព័ន្ធ៖
- អ្នកមានជំងឺទឹកនោមផ្អែមដឹងតិចនិកនេះ អាចជួយបានច្រើនដល់សុខភាព
- វីតាមីន D ល្អដល់ថ្នាក់ហ្នឹងផង? អាចបង្ការទឹកនោមផ្អែម
២. អាហារមានវីតាមីន D
ក្រៅពីទទួលបានវីតាមីន D តាមរយៈពន្លឺព្រះអាទិត្យយើងអាចទទួលបានតាមរយៈរបបអាហារ។ ការទទួលបានវីតាមីន D ប្រចាំថ្ងៃគឺបែងចែកទៅតាមអាយុ៖
- កុមារក្រោម១២ខែត្រូវការ ១០មីក្រូក្រាម
- អាយុពី១ឆ្នាំដល់៦៩ឆ្នាំត្រូវការ ១៥មីក្រូក្រាម
- អាយុ៧០ឆ្នាំឡើងត្រូវការ ២០មីក្រូក្រាម
- ស្ត្រីមានផ្ទៃពោះ និងត្រូវបំបៅដោះកូនត្រូវការ ១៥មីក្រូក្រាម។
អាហារមួយចំនួនដែលមានវីតាមីន D ស្រាប់មានដូចជា៖
- ត្រីសាល់ម៉ុន៨៥ក្រាមមានវីតាមីន D ១៤,១៥មីក្រូក្រាម
- ត្រីធូណា៨៥ក្រាមមានវីតាមីន D ១១,១៧មីក្រូក្រាម
- ត្រីសាឌីន២ក្បាលមានវីតាមីន D ១,១៥មីក្រូក្រាម
- ទឹកដោះគោដែលគេបន្ថែមវីតាមីន៤៧០មីល្លិលីត្រមានវីតាមីន D ៣មីក្រូក្រាម
- យ៉ាអួ១៧០ក្រាមមានវីតាមីន D ២មីក្រូក្រាម
- ថ្លើមគោ៨៥ក្រាមមានវីតាមីន D ១,០៥មីក្រូក្រាម
- ស៊ុតមួយគ្រាប់មានវីតាមីន D ១,០២៥មីក្រូក្រាម។
ប្រសិនជាយើងមានរោគសញ្ញាដូចជាឈឺញឹកញាប់ មិនងាយជាពីរបួស ឈឺក្នុងឆ្អឹងឬខ្នង ឈឺសាច់ដុំ ហត់ ឬសក់ជ្រុះ យើងគួរទៅពិគ្រោះជាមួយគ្រូពេទ្យ ព្រោះថាអាការៈទាំងនេះអាចជាសញ្ញាថាយើងខ្វះវីតាមីន D។
អត្ថបទពាក់ព័ន្ធ៖
- វីតាមីន D មិនត្រឹមល្អចំពោះឆ្អឹងទេ អាចការពារជំងឺទឹកនោមផ្អែមទៀត!
- អាយុកាន់តែច្រើន វីតាមីននេះ សំខាន់ណាស់សម្រាប់សាច់ដុំ មិនគួរមើលរំលង
- ត្រូវពន្លឺថ្ងៃ យ៉ាងតិចបាន ៣នាទី ក៏មានប្រយោជន៍ច្រើនដែរ
- ខ្វះសារធាតុចិញ្ចឹមសំខាន់ពីរមុខនេះ ឆ្អឹងកូនខ្សោយ អត់មាំ អន់កម្ពស់ ឯធ្មេញក៏មានបញ្ហា
- ថ្នាំគ្រាប់វីតាមីន D អាចបន្ថយហានិភ័យស្លាប់ដោយមហារីកគ្រប់ប្រភេទ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmr]
