ឈឺសុដន់ពេលមករដូវ ស្រីៗយើងអាចដោះស្រាយតាមក្បួនទាំងនេះបាន!

​អាការៈ​ឈឺ​សុដន់​​ដែល​កើត​ឡើង​​​ចំពោះ​ស្ត្រី​វ័យ​ក្មេង​ ភាគ​ច្រើន​ទាក់ទង​នឹង​វដ្ដ​រដូវ​។​ ​អ័រម៉ូន​​កើត​ឡើង​ និង​ធ្លាក់​ចុះ​អំឡុង​ពេល​មាន​រដូវ​ អាច​បណ្ដាល​ឲ្យ​សុដន់​ងាយ​ឈឺ​ចាប់​ និង​ហើម​ជាដើម​​។​

ប្រសិនបើ​សុដន់​របស់​យើង​​មាន​​ជាលិកា​សរសៃ​ យើង​អាច​នឹង​សង្កេត​ឃើញ​ដុំ​ពក​យ៉ាង​ងាយ​ នៅ​អំឡុង​ពេល​មក​រដូវ​។ យ៉ាង​ណា​មិញ​ តើ​ការ​ឈឺ​សុដន់​នៅ​អំឡុង​ពេល​មក​រដូវ​បណ្ដាល​មក​ពី​អ្វី​? តើ​យើង​គួរ​ដោះស្រាយ​​បែប​ណា​?

មូលហេតុ​បង្ក

វដ្ដ​រដូវ​ប្រចាំ​ខែ​របស់​ស្រី​ៗ​យើង​ត្រូវ​បាន​កំណត់​​ដោយ​ការ​ប្រែប្រួល​នៃ​កម្រិត​អ័រម៉ូនអឺស្រ្តូហ្សែន​ និង​Progesterone​។​ អ័រម៉ូន​​ទាំង​ពីរ​​នេះ​​​​​មាន​សារសំខាន់​ណាស់​សម្រាប់​ឲ្យ​សុដន់​ និង​ប្រព័ន្ធ​បន្ត​ពូជ​របស់​យើងដែល​​ត្រៀម​រួចរាល់​ក្នុង​​ការ​មាន​គភ៌​។​

អារម្មណ៍​ឈឺ​សុដន់​ គឺ​ជា​រឿង​ធម្មតា​ប៉ុណ្ណោះ​ ​ហើយ​វា​​បណ្ដាល​មក​ពី​ក្លែប​សុដន់​ ​និង​បំពង់​សុដន់​រីក​ធំ​នៅ​អំឡុង​ពេល​បញ្ចេញ​ពង​អូវុល​។​ ការ​ឈឺ​ចាប់​នេះ​អាច​កាន់​តែ​ធ្ងន់ធ្ងរ​មុន​ពេល​មក​រដូវ​ ហើយ​ធូរ​ស្រាល​បន្តិច​ម្ដង​ៗ​​អំឡុង​ពេល​ និង​បន្ទាប់​ពី​អស់​រដូវ​។​ ចំពោះ​ស្ត្រី​មួយ​ចំនួន​ ​ការ​ឈឺ​ចាប់​សុដន់​​​​ដែល​កើត​ឡើង​ជា​វដ្ដ​​​ គឺ​មិន​មែន​ជា​រោគ​សញ្ញា​នៃ​ជំងឺ​មហារីក​សុដន់​ឡើយ​។

ចង់គណនារង្វាស់ចង្វាក់បេះដូង ចុចទីនេះ!

ចង់ពិនិត្យជំងឺមហារីកសុដន់ ចុចទីនេះ!

ចង់ពិនិត្យជំងឺមហារីកមាត់ស្បូន ចុចទីនេះ!

តិចនិក​ដោះស្រាយ​បញ្ហា​ឈឺ​​សុដន់​

ដើម្បី​​​បញ្ចៀស​ និង​កាត់​បន្ថយ​អាការៈ​ឈឺ​សុដន់​នៅ​អំឡុង​ពេល​​មក​រដូវ ស្រីៗ​យើង​អាច​អនុវត្ត​តិចនិក​​ខាង​ក្រោម​នេះ​។

• ស្អំ​កំណាត់​ក្ដៅ​​​ ឬ​ត្រជាក់​នៅ​លើ​​សុដន់​រយៈពេល​ត្រឹម​តែ​២០​នាទី​​
• ប្រើ​ថ្នាំ​បំបាត់​ការ​ឈឺ​ចាប់​
• កាត់​បន្ថយ​ការ​ញ៉ាំ​ភេសជ្ជៈ​ដែល​មាន​ជាតិ​កាហ្វេ​អ៊ីន​
• ញ៉ាំ​ទឹក​ឲ្យ​បាន​ច្រើន​ និង​កាត់​បន្ថយ​ការ​ញ៉ាំ​អំបិល​
• ញ៉ាំ​របប​អាហារ​ល្អ​ៗ​ ដូចជា​បន្លែ​ ផ្លែឈើ​ និង​គ្រាប់​ធញ្ញជាតិ​ទាំង​មូល​
• កាត់​បន្ថយ​ស្រ្តេស​

ពេល​ណា​យើង​​គួរ​​ទៅ​ជួប​នឹង​គ្រូពេទ្យ​?

ប្រសិនបើ​គ្នា​យើង​ជួប​ប្រទះ​ករណី​ទាំង​នេះ ​គប្បី​ពិគ្រោះ​យោបល់​ជាមួយ​នឹង​គ្រូពេទ្យ​ជំនាញ​​ ទើប​ជា​​ការ​ប្រសើរ​៖

• ​មាន​ឈាម​ ឬ​​ទឹក​រងៃ ចេញ​ពី​ចុង​សុដន់​
• ​សង្កេត​ឃើញ​ដុំ​ពក​ថ្មី​ដែល​មិន​បាត់​ទៅ​វិញ​ បន្ទាប់​ពី​អស់​រដូវ​
• ឈឺ​សុដន់​ខ្លាំង​ និង​​រ៉ាំរ៉ៃ​
• ចេញ​រោគ​សញ្ញា​នៃ​ការ​ឆ្លង​មេរោគ​សុដន់​ រួម​មាន​ក្រហម​ ​ខ្ទុះ​ និង​គ្រុន​ក្ដៅ​។

• ស្រីៗមក​រដូវ​មិន​ទៀង​ ក្រោយ​ចាក់វ៉ាក់សាំង​កូវីដ-១៩ គួរ​បារម្ភ​អត់​?
• ធ្លាក់​កំណក​ឈាម​ធំ​ៗ​ពេល​មក​រដូវ បណ្ដាល​មក​ពី​អ្វី​?​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​
• អំឡុង​ពេល​មក​រដូវ​ ស្រី​ៗ​អាច​ញ៉ាំ​អាហារ​ជូរ​បាន​អត់​?​​​​​​​​​​​​​​​​​​​​​​​​​​​​​​​​​​​​​​​​​​​​​​​
• មក​រដូវ​ច្រើន​ និង​ឈឺចាប់​ អាច​មក​ពី​បញ្ហា​សុខភាព​មួយ​នេះ​​​​​​​​​​​​​​​​​​​​​​​​​​​​​​​​​
• មូលហេតុមកឈាម​រដូវ​តិច​ជាង​​ធម្មតា អាច​មក​ពី​ហេតុផល​ទាំង​នេះ
• ពណ៌ឈាមរដូវ អាចបញ្ជាក់ឲ្យដឹងពីបញ្ហាសុខភាពមនុស្សស្រី