ការមានផ្ទៃពោះ គឺជាពេលវេលាដែលរាងកាយរបស់ម៉ាក់ៗឆ្លងកាត់ការផ្លាស់ប្ដូរមួយចំនួន ដើម្បីឲ្យកូនលូតលាស់ក្នុងផ្ទៃប្រកបដោយសុវត្ថិភាព ក៏ដូចជាសម្រាប់ផ្គត់ផ្គង់ដល់កូនក្រោយសម្រាលរួច។ ពិតណាស់ នៅអំឡុងពេលពពោះ សុដន់ និងក្បាលសុដន់របស់យើងច្បាស់ជាមានការផ្លាស់ប្ដូរមិនខាន។ យ៉ាងណាមិញ ប្រសិនបើម៉ាក់ៗមិនធ្វើការថែទាំឲ្យបានត្រឹមត្រូវទេនោះ ការផ្លាស់ប្ដូរទាំងនេះអាចបណ្ដាលឲ្យយើងមិនស្រណុកក្នុងខ្លួន ឬផ្លាស់ប្ដូររូបរាងសុដន់យ៉ាងខ្លាំង បន្ទាប់ពីសម្រាលកូនរួច។ ហេតុដូច្នេះហើយ ដើម្បីថែទាំរាងកាយ ក៏ដូចជាការពារបញ្ហាផ្សេងៗដែលបង្កឡើងដោយការផ្លាស់ប្ដូររូបរាង ម៉ាក់ៗគួរអនុវត្តតិចនិក និងទម្លាប់មួយចំនួន។
តិចនិកថែទាំសុដន់ និងចុងសុដន់ អំឡុងពេលមានគភ៌
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ការផ្លាស់ប្ដូរសុដន់ អំឡុងពេលពពោះ
ពិតណាស់ ការពពោះនាំឲ្យមានការផ្លាស់ប្ដូរទាំងរូបរាង និងអារម្មណ៍ចំពោះសុដន់របស់យើងយ៉ាងខ្លាំង ហើយវាក៏អាចបង្កជាការឈឺចាប់តិចតួចដល់យើងផងដែរ។ ការផ្លាស់ប្ដូរសុដន់ជាទូទៅ ដែលយើងអាចសង្កេតឃើញក្នុងអំឡុងពេលពពោះមានដូចខាងក្រោម៖
- សុដន់រីកធំ និងមានការឈឺចាប់
- ក្បាលសុដន់ឡើងខ្មៅ
- ចេញទឹកដោះ
- ឡើងសរសៃខ្មៅនៅបរិវេណសុដន់
- ក្បាលសុដន់រីកធំ
តិចនិកថែទាំសុដន់ និងក្បាលសុដន់ នៅអំឡុងពេលពពោះ
ស្រីៗយើងភាគច្រើនតែងតែមិនសូវយកចិត្តទុកដាក់ក្នុងការថែទាំសុដន់នៅអំឡុងពេលពពោះ ដែលធ្វើឲ្យសុដន់ងាយរងគ្រោះកាន់តែខ្លាំង។ ដូចនេះហើយ ដើម្បីថែទាំសុដន់ឲ្យបានត្រឹមត្រូវ អំឡុងពេលពពោះ ម៉ាក់ៗអាចអនុវត្តតាមគន្លឹះពិសេសៗប្រចាំថ្ងៃទាំងនេះ។
១. ជ្រើសរើសអាវទ្រនាប់ត្រឹមត្រូវ
ដោយសារតែសុដន់របស់យើងបន្តរីកធំ ចាប់ពីត្រីមាសទី១មក ដូច្នេះហើយ ម៉ាក់ៗត្រូវផ្លាស់ប្ដូរទំហំអាវទ្រនាប់ដូចគ្នា។ ចូរជ្រើសរើសតែទំហំអាវទ្រនាប់ដែលសក្ដិសម ដើម្បីជៀសវាងការថប់ដង្ហើម និងមិនស្រួលខ្លួន។ ម្យ៉ាងវិញទៀត ម៉ាក់ៗមិនគួរពាក់អាវទ្រនាប់ដែលមានឆ្អឹងនោះទេ ពីព្រោះឆ្អឹងអាវទ្រនាប់អាចរាំងស្ទះដល់ការផលិតទឹកដោះ ដោយការបិទថង់ទឹកដោះ។ អាវទ្រនាប់ដែលមានប៉ុងទន់ល្មើយ និងអាចទ្រទ្រង់ខ្នងរបស់យើងបាន គឺមានសារសំខាន់ខ្លាំងណាស់សម្រាប់ការលូតលាស់របស់សុដន់។
២. ម៉ាស្សា
ក្បាលសុដន់របស់យើងអាចស្ងួតខ្លាំង និងប្រេះ នៅអំឡុងពេលពពោះ។ ដូចនេះ ការផ្ដល់សំណើមដល់បរិវេណក្បាលសុដន់ គឺមានសារសំខាន់ខ្លាំងណាស់។ ម៉ាក់ៗអាចប្រើប្រាស់ប្រេងអូលីវ ឬប្រេងដូង ដោយម៉ាស្សាក្បាលសុដន់នៅមុនពេលងូតទឹក។ ការម៉ាស្សាសុដន់ជាមួយនឹងប្រេងដូងនេះ ក៏អាចជួយសម្រួលដល់ចរន្តឈាម លើកសុដន់ឲ្យខ្ពស់ និងណែនល្អ ក៏ដូចជាការពារកុំឲ្យសុដន់យារធ្លាក់ថែមទៀតផង។
៣. រក្សាអនាម័យ
ក្បាលសុដន់អាចហៀរចេញទឹកដោះ នៅអំឡុងត្រីមាសចុងក្រោយ។ កត្តានេះកើតឡើងជាញឹកញាប់ណាស់ ហេតុនេះហើយ ម៉ាក់ៗគួរផ្លាស់ប្ដូរអាវទ្រនាប់ដើម្បីកុំឲ្យក្បាលសុដន់សើមពេក ដែលអាចបណ្ដាលឲ្យក្បាលសុដន់ប្រេះ និងឆ្លងមេរោគបាន។ បន្ថែមពីនេះ យើងក៏អាចប្រើទ្រនាប់សុដន់ ដើម្បីឲ្យក្បាលសុដន់ស្ងួតល្អ ក៏ដូចជាលាងសម្អាតក្បាលសុដន់ជាទៀងទាត់ ដើម្បីការពារកុំឲ្យសារធាតុរាវ កកើតជាក្រមរនៅបរិវេណសុដន់។
៤. កុំប្រើសាប៊ូនៅលើក្បាលសុដន់
ជាមួយគ្នានេះដែរ ម៉ាក់ៗមិនគួរប្រើសាប៊ូនៅលើក្បាលសុដន់ នៅរាល់ពេលងូតទឹកឡើយ។ សាប៊ូអាចធ្វើឲ្យក្បាលសុដន់ស្ងួត និងអាចបង្កើតជាក្រមរនៅបរិវេណនោះ។
៥. ប្រើក្រែមផ្ដល់សំណើម
បន្ទាប់ពីងូតទឹករួច ចូរលាបក្រែមផ្ដល់សំណើមនៅលើក្បាលសុដន់ ប្រសិនបើក្បាលសុដន់មានសភាពស្ងួតខ្លាំង។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម