កាហ្វេជួយឲ្យស្បែកភ្លឺរលោង និងមើលទៅក្មេងជាងវ័យ។ ជាមួយនឹងសារធាតុប្រឆាំងនឹងអុកស៊ីតកម្ម ព្រមទាំងប្រឆាំងនឹងភាពចាស់ កាហ្វេក៏មានសមត្ថភាពក្នុងការចិញ្ចឹមបំប៉នស្បែកផងដែរ។ ការប្រើប្រាស់ម៉ាសកាហ្វេអាចកាត់បន្ថយការហើមស្បែក និងស្នាមដក់ ដោយជួយជំរុញចលនាឈាមរត់។ ស្រីៗយើងដែលចង់ទទួលបានស្បែកស្អាត និងភ្លឺរលោង អាចសាកល្បងធ្វើម៉ាសកាហ្វេដូចខាងក្រោមនេះ។
តិចនិកធ្វើម៉ាសកាហ្វេ ជួយឲ្យស្បែកភ្លឺរលោង និងបំប៉នស្បែក
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. ម៉ាសកាហ្វេ និងទឹកឃ្មុំ
គ្នាយើងអាចលាយម្សៅកាហ្វេ១ស្លាបព្រាបាយ និងទឹកឃ្មុំ១ស្លាបព្រាបាយ ដោយកូរវាឲ្យសព្វល្អ។ បន្ទាប់មកលាបម៉ាសនៅលើផ្ទៃមុខ លើកលែងតែបរិមាណនៅជុំវិញភ្នែក និងធ្វើការម៉ាស្សាថ្នមៗ រួចទុកចោលរយៈពេល២០នាទី។ បន្ទាប់មកលាងជម្រះចេញជាមួយនឹងទឹកត្រជាក់។
ការប្រើម៉ាសទឹកឃ្មុំ និងកាហ្វេអាចជួយផ្ដល់សំណើមដល់ស្បែក និងកាត់បន្ថយស្នាមជ្រីវជ្រួញ ភាពស្ងួត និងស្នាមអុចខ្មៅយ៉ាងពូកែស័ក្ដិសិទ្ធិ។
២. ម៉ាសកាហ្វេ និងទឹកដោះគោ
ដើម្បីធ្វើម៉ាសមួយប្រភេទនេះ យើងត្រូវលាយកាហ្វេកិនហ្មត់ចំនួន១ស្លាបព្រាបាយ ជាមួយនឹងទឹកដោះគោ១ ឬ២ស្លាបព្រាបាយ ដោយកូរវាឲ្យសព្វ រួចយកមកលាបនៅលើមុខ។ បន្ទាប់ពីទុកចោលរយៈពេល១០ទៅ១៥នាទី យើងអាចលាងជម្រះចេញជាមួយនឹងទឹកក្ដៅឧណ្ហៗ។
ម៉ាសមួយប្រភេទនេះល្អបំផុតសម្រាប់អ្នកដែលមានពណ៌ស្បែកមិនស៊ីគ្នា ហើយវាក៏ជួយកម្ចាត់ភាពកខ្វក់ចេញពីផ្ទៃមុខ ព្រមទាំងជួយឲ្យស្បែកភ្លឺរលោងផងដែរ។
៣. ម៉ាសកាហ្វេ រមៀត និងទឹកដោះគោជូរ
ជាមួយគ្នានេះដែរ ចូរលាយម្សៅកាហ្វេ១ស្លាបព្រាកាហ្វេ រមៀត១ស្លាបព្រាកាហ្វេ និងទឹកដោះគោជូរ១ស្លាបព្រាកាហ្វេ។ បន្ទាប់មកយកល្បាយនេះមកលាបនៅលើផ្ទៃមុខ រួចទុកចោលរយៈពេល២០នាទី។ ស្រីៗយើងអាចម៉ាស្សាថ្នមៗជារាងរង្វង់ និងលាងជម្រះចេញជាមួយនឹងទឹកក្ដៅឧណ្ហៗ ដើម្បីទទួលបានស្បែកភ្លឺរលោង។
រមៀតមានសមត្ថភាពប្រឆាំងនឹងការរលាក ព្រមទាំងផ្ទុកវីតាមីនC ដែលអាចជួយកម្ចាត់បញ្ហាស្បែកស្រអាប់ និងស្នាមអុជខ្មៅ ខណៈពេលដែលទឹកដោះគោជូរផ្ទុកអាស៊ីដAlpha-hydroxy ដែលជួយកាត់បន្ថយខ្លាញ់ពីផ្ទៃមុខ និងជួយបំប៉នស្បែកមុខ។
៤. ម៉ាសកាហ្វេ និងប្រទាលកន្ទុយក្រពើ
លាយម្សៅកាហ្វេ ចំនួន២ស្លាបព្រាកាហ្វេ និងជែលប្រទាលកន្ទុយក្រពើចំនួន២ស្លាបព្រាកាហ្វេ។ ចូរកូរវាឲ្យសព្វល្អ ទើបយកមកលាបនៅលើមុខ ដោយទុកចោលរយៈពេល១៥ទៅ២០នាទី មុនពេលលាងជម្រះចេញជាមួយនឹងទឹកក្ដៅឧណ្ហៗ។
ពិតណាស់ ប្រទាលកន្ទុយក្រពើជាសមាសភាពប្រឆាំងនឹងអុកស៊ីតកម្ម និងប្រឆាំងនឹងបាក់តេរីដ៏មានឥទ្ធិពល ហើយវាអាចដោះស្រាយបញ្ហាកើតមុន ស្នាម ឬត្រអកយ៉ាងមានប្រសិទ្ធភាព។ រីឯសារធាតុកាហ្វេអ៊ីននៅក្នុងកាហ្វេអាចប្រឆាំងនឹងការកើតមុន ស្នាមអុជខ្មៅ និងជួយឲ្យពណ៌ស្បែកស៊ីគ្នា ព្រមទាំងជួយឲ្យស្បែកភ្លឺរលោង និងតឹងណែនល្អ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម