ហាត់យ៉ូហ្កាមុនពេលសម្រាលកូន ឬហាត់យ៉ូហ្កាពេលពពោះផ្ដល់ផលល្អជាច្រើនដល់ស្ត្រីនៅអំឡុងពេលមានផ្ទៃពោះ។ ប៉ុន្តែម៉ាក់ៗត្រូវតែប្រាកដឲ្យច្បាស់ជាមួយបញ្ហាមួយនេះ ប្រសិនបើទើបពពោះលើកដំបូង ហើយម៉ាក់ៗក៏ត្រូវមានពេលសម្រាកគ្រប់គ្រាន់ក្នុងអំឡុងពេលហាត់។ ម៉ាក់ៗមិនចាំបាច់ត្រូវប្រញប់ពេកនោះទេ ដោយសារតែអ្វីដែលយើងចង់បានអំពីកាត់ហាត់យ៉ូហ្កាពេលពពោះគឺអារម្មណ៍សុខស្រួល និងភាពធូរស្រាលក្នុងអារម្មណ៍។ ខាងក្រោមនេះគឺជាគុណប្រយោជន៍សំខាន់ទាំង៧របស់ការហាត់យ៉ូហ្កានៅមុនមុនសម្រាល ដែលអាចឲ្យជីវិតពពោះរបស់ស្រីយើងមានអារម្មណ៍ខុសប្លែកពីធម្មតា។
អត្ថបទពាក់ព័ន្ធ៖ ស្រីៗពពោះ និងសម្រាលកូនរួច ហាត់យ៉ូហ្កា ផ្តល់ប្រយោជន៍ហួសស្មាន
១- ធ្វើឲ្យរាងកាយមានសុខភាពល្អ និងមានកម្លាំងជាងមុន
អំឡុងពេលមានផ្ទៃពោះ ដងខ្លួនរបស់ម៉ាក់ៗនឹងចាប់ផ្ដើមមានបម្រែបម្រែទាំងផ្លូវកាយ និងផ្លូវចិត្ដ។ អ័រម៉ូនមួយចំនួនដូចជា អឺស្ត្រូហ្សែន (Estrogen) ប្រូចេស្តេរ៉ូន (Progesterone) ប្រូឡាក់ទីន (Prolactin) រីឡាក់ស៊ីន (Relaxin) និងអុកស៊ីតូស៊ីន (Oxytocin) ចាប់ផ្ដើមកើនឡើងជាខ្លាំង។ ការហាត់យ៉ូហ្កាពេលពពោះអាចជួយឲ្យខ្លួនរបស់ម៉ាក់ៗស៊ាំជាមួយការប្រែប្រួលភ្លាមៗដែលកើតឡើងនៅលើដងខ្លួនរបស់ស្ត្រីមានផ្ទៃពោះ។ ការហាត់ប្រាណមុនពេលសម្រាលផ្ដល់ផលប្រយោជន៍ជាច្រើនជាពិសេសជួយកាត់បន្ថយការលូតលាស់នៃស្បែកពោះ ជាពិសេសផ្នែកខាងក្រោមតែម្ដង មិនតែប៉ុណ្ណោះវាក៏ជួយឲ្យសុខភាពរបស់ម៉ាក់ៗល្អជាងមុន និងផ្ដល់ថាមពល ក៏ដូចជាធ្វើឲ្យយើងមានអារម្មណ៍ស្រស់ស្រាយ និងស្រណុកក្នុងខ្លួន។
អត្ថបទពាក់ព័ន្ធ៖
- សម្រាលកូនរួច ពេលណាម៉ាក់ៗអាចហាត់ប្រាណបាន?
- ឧស្សាហ៍ឈឺចាប់ខ្លាំងពេលមករដូវ “យ៉ូហ្កា” ប៉ុន្មានក្បាច់នេះអាចជួយបាន
២- រៀនពីរបៀបដកដង្ហើមឲ្យបានប្រសើរជាងមុន
ហេតុអ្វីបានជាវិធីដកដង្ហើមពេលពពោះមានសារៈសំខាន់? ការហ្វឹកហាត់តិចនិកដកដង្ហើមផ្ដល់ផលវិជ្ជមានមិនត្រឹមតែសម្រាប់រាងកាយតែមួយមុខនោះទេ តែវាក៏ផ្ដល់ផលល្អដល់សុខភាពផ្លូវចិត្ដរបស់ម៉ាក់ៗដូចគ្នា។ បម្រែបម្រួលអ័រម៉ូនដែលកើតឡើងលើដងខ្លួនស្ត្រីពពោះមានទាក់ទងជាមួយនឹងផ្លូវអារម្មណ៍។ អារម្មណ៍របស់យើងអាចប្រែប្រួលដោយគ្មានហេតុផល។ ម៉ាក់ៗអាចយល់ច្រឡំទៅលើដៃគូរបស់ខ្លួន ពេលម៉ាក់ៗមានអារម្មណ៍មិនល្អខ្វល់ខ្វាយច្រើន។ ដើម្បីគ្រប់គ្រងអារម្មណ៍នេះ ការដឹងពីរបៀបដកដង្ហើមចូលកុំខ្វល់ខ្វាយច្រើននៅពេលអ្នកកំពុងតែពពោះគឺសំខាន់។ ការហាត់ប្រាណមុនពេលសម្រាលបុត្របានបង្រៀនឲ្យយើងចេះដកដង្ហើមបានល្អជាងមុន ដែលវាមានផលប្រយោជន៍ជាច្រើនសម្រាប់កាត់បន្ថយ ឬគ្រប់គ្រងបញ្ហាពិបាកដកដង្ហើមពេលពពោះ និងធ្វើឲ្យអុកស៊ីហ្សែនរត់ចូលទៅចិញ្ចឹមកូនក្នុងផ្ទៃបានគ្រប់គ្រាន់។ លើសពីនេះថែមទៀតការរៀនដកដង្ហើមអាចជួយឲ្យម៉ាក់ៗកាត់បន្ថយការឈឺចាប់នៅពេលសម្រាលកូនបានថែមទៀតផង។ ជាមួយគ្នានេះដែរក៏មានការលើកឡើងថា “ការដកដង្ហើមជាមិត្ដភក្ដិជិតស្និទ្ធរបស់អ្នកពេលអ្នកសម្រាលបុត្រ’។
អត្ថបទពាក់ព័ន្ធ៖
៣- កាត់បន្ថយការឈឺខ្នង
មូលហេតុដែលច្រើនឃើញកើតលើស្រ្តីមានផ្ទៃពោះនោះគឺ ការបាត់តុល្យភាពនៃដងខ្លួនក៏ដូចជាបញ្ហាឈឺខ្នងក៏ច្រើនកើតមានដូចគ្នា។ ការហាត់យ៉ូហ្កាមុនពេលសម្រាលបុត្រនឹងជួយដល់ចរន្ដឈាមរត់ក្នុងខ្លួនរបស់យើង ផ្ដល់ថាមពល និងតុល្យភាពទៅកាន់ខ្លួនប្រាណ និងបន្តឹង ក៏ដូចជាធ្វើឲ្យសាច់ដុំខ្នងរបស់ម៉ាក់ៗកាន់តែរឹងមាំ។
៤- ហ្វឹកហាត់សាច់ដុំដើម្បីទប់ទល់ជាមួយការឈឺចាប់ក្នុងពេលសម្រាល
ការហាត់យ៉ូហ្កាមុនពេលសម្រាលគឺមានលក្ខណៈពិសេសដើម្បីពង្រឹងសាច់ដុំសម្រាប់ត្រៀមទុកពេលសម្រាល ដែលវានឹងជួយដល់ការបត់បែន និងធ្វើឲ្យភ្លៅរបស់ម៉ាក់ៗកាន់តែបត់បែនបានល្អ។ ការហាត់អង្គុយចោងហោង (Squat) គឺល្អខ្លាំងណាស់សម្រាប់បន្តឹងសាច់ដុំត្រគៀក និងសាច់ដុំភ្លៅ។ ក្នុងពេលហាត់ប្រាណ ការធ្វើចិត្ដឲ្យស្ងប់ពេលហាត់យ៉ូហ្កាមិនត្រឹមតែចូលរួមជាមួយការដកដង្ហើម និងកាយវិការរបស់យើងតែមួយមុខនោះទេ វាថែមទាំងអាចគ្រប់គ្រងការឈឺចាប់ពេលមានការកន្រ្តាក់របស់ស្បូនបានថែមទៀតផង។ ដូចនេះវាជួយឲ្យខ្លួនរបស់យើងរួចចេញពីការតានតឹងអារម្មណ៍ និងមានអារម្មណ៍ល្អពេលសម្រាលកូនតាមបែបធម្មជាតិ។
៥- ជួយឲ្យអារម្មណ៍អ្នកធូរស្រាល និងស្កប់ស្កល់
ជាធម្មតាស្ត្រីមានផ្ទៃពោះភាគច្រើនមានអារម្មណ៍ខ្វល់ខ្វាយច្រើនអំពីពោះរបស់ខ្លួនដែលកំពុងតែរីកធំ ការរៀបចំត្រៀមខ្លួនសម្រាប់ការសម្រាល និងជ្រើសរើសអាហារល្អសម្រាប់សុខភាពមកទទួលទានជាដើម។ កត្តាទាំងអស់នេះនឹងបណ្ដាលឲ្យម៉ាក់ៗកើតជំងឺបាក់ទឹកចិត្ដ និងគេងមិនគ្រប់ ឬគេងមិនលក់។ ការហាត់យ៉ូហ្កាជាប្រចាំ វាជួយឲ្យម៉ាក់ៗអាចដកដង្ហើមចេញ និងចូលបានយឺតៗនិងជ្រៅៗតាមរន្ធច្រមុះ និងធ្វើឲ្យម៉ាក់ៗអាចគេចចេញពីទឹកមុខបែបពិបាកចិត្ដបានថែមទៀតផង។ ការពត់ដងខ្លួនបែបស្ងប់អារម្មណ៍នៅចុងបញ្ចប់នៃការហាត់យ៉ូហ្កាគឺមានប្រសិទ្ធភាពខ្ពស់ក្នុងការព្យាបាលជំងឺគេងមិនលក់បាន។
អត្ថបទពាក់ព័ន្ធ៖ ពពោះ? សាកតិចនិកញ៉ាំអាហារប៉ុន្មានចំណុចនេះ ធានាល្អទាំងម៉ាក់ៗ និងបេប៊ី
៦- បង្កើតទំនាក់ទំនងជាមួយកូនក្នុងផ្ទៃ
នៅពេលហ្វឹកហាត់យ៉ូហ្កាមុនពេលសម្រាល កាយវិការជាច្រើន និងការបត់បែនដងខ្លួនរបស់ម៉ាក់ៗគឺធ្វើឡើងដើម្បីឲ្យបេប៊ីមានអារម្មណ៍ងាយស្រួល ហើយមានពេលខ្លះគ្រូបង្វឹកបនឹងង្រៀនយើងអំពីរបៀបទាក់ទងគ្នាជាមួយបេប៊ីក្នុងផ្ទៃ ដូចជាបបោសអង្អែលក្បាលពោះមុនពេលចាប់ផ្ដើមហាត់យ៉ូហ្កា និងនិយាយទៅកាន់កូនក្នុងពោះ បបួលកូនធ្វើចលនាទាំងអស់គ្នាជាដើម។ វានឹងធ្វើឲ្យម៉ាក់ៗមានអារម្មណ៍ល្អក្នុងអំឡុងពេលហាត់ និងធ្វើឲ្យម៉ាក់ៗអាចទាក់ទងជាមួយកូនក្នុងផ្ទៃបានកាន់តែច្រើន។
៧- ជួយឲ្យម៉ាក់ៗរាប់អានមិត្តភក្ដិមានផ្ទៃពោះដូចគ្នាដទៃទៀត
ការទៅក្លឹបហាត់ប្រាណ និងចាប់ផ្ដើមហាត់យ៉ូហ្កាមុនពេលសម្រាលបុត្រគឺជាកាយវិការដ៏ល្អមួយដើម្បីបង្កើតទំនាក់ទំនងជាមួយស្ត្រីមានផ្ទៃពោះដទៃទៀត។ ម៉ាក់ៗអាចចែករំលែកអំពីបម្រែបម្រួលដងខ្លួន អំពីមន្ទីពេទ្យ គ្រូពេទ្យផ្នែកសម្ភព ក៏ដូចជាអាចចែករំលែកបទពិសោធន៍អំពីការជ្រើសរើសខោទឹកនោមកូនជាដើមទៅកាន់មិត្តភក្ដិទាំងនោះ។ ម៉ាក់ៗក៏អាចបង្កើតការសន្ទនាជក្រុមតាមសារអេឡិចត្រូវនិច និងអាចទាក់ទងគ្នាទៅជួបនិយាយគ្នាក្រៅពីម៉ោងហាត់ប្រាណបានថែមទៀតផង។ ការហាត់ប្រាណមិនត្រឹមតែជួយឲ្យម៉ាក់ៗមានសុខភាពល្អតែមួយមុខនោះទេ អ្នកថែមទាំងអាចរាប់អានមិត្តភក្ដិថ្មីៗបានថែមទៀតផង។
អត្ថបទពាក់ព័ន្ធ៖
- ៦ចំណុចងាយៗ កាត់បន្ថយអាការៈឈឺចង្កេះពេលពពោះ
- ឈឺចង្កេះពេលពពោះ អាចពាក់ព័ន្ធបញ្ហាសុខភាព មិនមែនធម្មតាៗទេ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-due-date]
