ការធ្វើការពីផ្ទះអាចថាស្រួលម្យ៉ាងដែរ ដូចជាមិនចាំបាច់ខ្វល់ច្រើនលើការស្លៀកពាក់ ឬមិនចាំបាច់ត្រូវធ្វើដំណើរជាដើម។ ប៉ុន្តែការធ្វើការពីផ្ទះក៏មានផលវិបាកខ្លះដែរព្រោះថាយើងអាចរំលងការហាត់ប្រាណ ការញ៉ាំអាហារច្រើនជ្រុល ឬប្រែប្រួលការគេងជាដើម ប្រសិនជាយើងមិនយកចិត្តទុកដាក់ទៅលើទម្លាប់ដែលជួយដល់សុខភាព។ ដូចនេះយើងគួរយកចិត្តទុកដាក់ទៅលើការថែរក្សាសុខភាពពេលធ្វើការពីផ្ទះ។
១. រៀបចំរបបអាហារ និងអាហារសម្រន់
អាហារដែលមានសារធាតុចិញ្ចឹមអាចជួយដល់ការផ្ចង់អារម្មណ៍ក្នុងការធ្វើការ និងជួយដល់សុខភាពផងដែរ។ ពេលធ្វើការនៅផ្ទះ យើងអាចរៀបចំអាហាររបស់យើងជាមុនដូចជាអាហារពេលព្រឹក ឬពេលថ្ងៃត្រង់ជាដើម។ ការរៀបចំអាហារទុកជាមុនអាចជួយបន្ថយការញ៉ាំអាហារសម្រន់ផ្សេងៗ ឬការញ៉ាំហួសកំណត់។ បន្ថែមពីនេះទៀត យើងគួរកំណត់ពេលវេលាក្នុងការសម្រាកថ្ងៃត្រង់ឲ្យដូចម៉ោងសម្រាកនៅការិយាល័យដែរ ដែលនេះអាចជួយកុំឲ្យយើងរំលងអាហារថ្ងៃត្រង់។ សម្រាប់អាហារសម្រន់ អ្យើងគួរជ្រើសរើសផ្លែឈើស្រស់មកជំនួសអាហារសម្រន់ដែលមានកាឡូរី ឬជាតិស្ករច្រើន។ យើងក៏គួរប្រយ័ត្នទៅលើការញ៉ាំច្រើនហួសកំណត់ពេលធ្វើការពីផ្ទះដែរ។
អត្ថបទពាក់ព័ន្ធ៖
- នៅតែផ្ទះ ឬធ្វើការពីផ្ទះអាចនាំឲ្យញ៉ាំហួសកំណត់ សាកវិធីនេះជួយដោះស្រាយបាន
- ត្រូវការថាមពលបំពេញការងារបានយូរម៉ោង ញ៉ាំអាហារទាំងនេះ
- អាហារព្រឹកល្អបំផុតចំពោះសុខភាព ប៉ុន្តែមនុស្សតិចណាស់ដឹង
២. កាត់បន្ថយជាតិកាហ្វេអ៊ីន
ពេលធ្វើការនៅផ្ទះយកល្អគួរផឹកទឹកឲ្យច្រើន ព្រោះការខ្វះជាតិទឹកបណ្ដាលឲ្យហត់ ឬឈឺក្បាល។ ដើម្បីជួយដល់ការផឹកទឹកឲ្យបានច្រើនយើងអាចដាក់កែវទឹក ឬដបទឹកនៅតុធ្វើការ។ បន្ថែមពីនេះ គួរប្រយ័ត្នទៅការផឹកកាហ្វេច្រើន។ ផឹកកាហ្វេច្រើនអាចបង្កឲ្យអាការៈឈឺក្បាល ហត់ ថប់បារម្ភ និងបញ្ហាក្នុងការរំលាយអាហារ។ ដូចនេះមិនគួរផឹកឲ្យលើសពីពីរកែវក្នុងមួយថ្ងៃទេ។
៣. ហាត់ប្រាណឲ្យបានទៀងទាត់
ការហាត់ប្រាណឲ្យបានទៀងទាត់ផ្តល់ប្រយោជន៍ច្រើនមានដូចជាជួយពង្រឹងប្រព័ន្ធភាពស៊ាំ បង្កើនថាមពល និងជួយដល់ការផ្ចង់អារម្មណ៍ទៀតផង។ ពេលនៅផ្ទះតែងធ្វើឲ្យខ្ជិលមិនចង់ហាត់ប្រាណ ហេតុនេះយកល្អគួរមានផែនការ និងកំណត់ម៉ោងសម្រាប់ហាត់ប្រាណច្បាស់លាស់។ អ្នកអាចហាត់ប្រាណនៅពេលព្រឹកព្រលឹមមុនធ្វើការ ឬពេលល្ងាចក្រោយពីម៉ោងធ្វើការ។
៤. រក្សាទម្លាប់នៃការគេង
វិធីដែលល្អគឺរក្សាពេលវេលានៃការចូលគេង និងក្រោកពីគេងឲ្យបានល្អ។ ការធ្វើបែបនេះអាចជួយយើងគេងលក់ស្រួល និងមិនមានអារម្មណ៍ហត់នៅពេលព្រឹក។ អំឡុងពេលថ្ងៃយើងអាចនឹងចង់គេងយូរ ប៉ុន្តែជំនួសឲ្យការគេងថ្ងៃយើងអាចដើរនៅខាងក្រៅបន្តិច ដែលនេះអាចមានប្រយោជន៍ដល់ផលិតភាពការងារ ឬបើចង់សម្រាកគឺសម្រាកត្រឹមតែ២០នាទីបានហើយ។
៥. សម្រាកពីការធ្វើការ
ការធ្វើការពីផ្ទះមានភាពងាយស្រួលដល់ការសម្រាក។យើងអាចសម្រាកក្នុងចន្លោះពេលធ្វើការដោយការបន្ធូរអារម្មណ៍ ឬសម្រាកភ្នែករបស់អ្នកដោយការចម្អិនអាហារ គូររូប ងើបឡើងនិងធ្វើចលនា ឬយ៉ូហ្គា ប៉ុន្តែអ្នកមិនគួរសម្រាកដោយការគេងទេ។
៦. រក្សាទំនាក់ទំនង
ការរក្សាទំនាក់ទំនងរវាងមិត្តរួមការងារអាចជួយដល់សុខភាពផ្លូវចិត្ត និងជួយជំរុញយើងក្នុងការបំពេញកិច្ចការផងដែរ។ ក្រៅពីរក្សាទំនាក់ទំនងជាមួយមិត្តរួមការងារ ការទំនាក់ទំនងជាមួយមិត្តភកិ្ត និងគ្រួសារក៏ជួយដល់យើងដែរ ដោយអាចនិយាយពីការព្រួយបារម្ភ ឬការងាររបស់យើងបាន។
អត្ថបទពាក់ព័ន្ធ៖
- ផឹកទឹកគ្រប់គ្រាន់ រាងកាយទទួលបានអត្ថប្រយោជន៍យ៉ាងច្រើន
- ផឹកទឹកគ្រប់គ្រាន់សំខាន់ចំពោះសុខភាព ចុះធ្វើម៉េចដឹងថាគ្រាប់គ្រាន់?
- អាកាសធាតុក្ដៅ ញ៉ាំបន្លែ ផ្លែឈើ ទាំងនេះអាចជួយបំពេញជាតិទឹកបានល្អ
- វីរុស COVID-19 រាតត្បាត ធ្វើឲ្យយើងគេងមិនលក់ ថុញថប់ ឆាប់ខឹង នេះជាវិធីដោះស្រាយ
- ៥ចំណុច គួរធ្វើពេលសម្ងំតែក្នុងផ្ទះ អំឡុងCOVID-19 កំពុងរាតត្បាត
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-heart-rate]
