អ្នកវិទ្យាសាស្ត្របានបង្ហាញការធ្វើតេស្ដឈាមថ្មីអាចរកឃើញជំងឺមហារីក៥០ប្រភេទខុសៗគ្នា និងអាចរកមើលជំងឺមហារីកដំណាក់កាលដំបូងទៀតផង។
តេស្ដនេះគឺផ្អែកទៅលើ DNA ដែលដុំសាច់មហារីកបញ្ចូលទៅក្នុងឈាម ជាពិសេសគឺតេស្ដនេះផ្ដោតទៅលើការផ្លាស់ប្តូរគីមីរបស់DNAដែលគេហៅថា ទម្រង់ methylation។ តេស្ដនេះមិនត្រឹមតែអាចរកឃើញថាអ្នកណាមានជំងឺមហារីកទេ ប៉ុន្តែនៅអាចឲ្យដឹងពីប្រភេទជំងឺមហារីកទៀត។
វេជ្ជបណ្ឌិត Geoffrey Oxnard នៃវិទ្យាស្ថានជំងឺមហារីក Boston’s Dana-Farberបានលើកឡើងថាតេស្ដនេះកំពុងស្ថិតក្នុងការសាកល្បង។ តេស្ដនេះប្រើលើអ្នកដែលមានហានិភ័យនឹងជំងឺមហារីកដើម្បីឲ្យដឹងថាអាចរកឃើញជំងឺមហារីក និងរកវិធីដែលត្រូវព្យាបាលនៅពេលរកឃើញជំងឺមហារីក។
នៅក្នុងសារព័ត៌មាន Annals of Oncology អ្នកវិទ្យាសាស្ត្របានបង្ហាញថាតេស្ដនេះគឺបង្កើតឡើងដោយប្រើប្រាស់ម៉ាស៊ីនឆ្លាតវៃមួយប្រភេទសិក្សាទៅលើដំណើរការ algorithm។ ម៉ាស៊ីននេះគឺចាប់យកទម្រង់នៅក្នុងទិន្នន័យ និងរៀនចាត់ជាក្រុមទៅតាមប្រភេទផ្សេងៗ។
ដំបូងអ្នកវិទ្យាសាស្ត្របានបញ្ចូលទិន្នន័យទាក់ទងនឹងទម្រង់ methylation នៃDNA ដែលយកចេញពីសំណាកឈាមអ្នកជំងឺ ២ ៨០០នាក់ មុននឹងបន្តបញ្ចូលទិន្នន័យពីអ្នកចូលរួម ៣ ០៥៣នាក់ ក្នុងនោះ១ ៥៣១នាក់មានជំងឺមហារីក និង១ ៥២១នាក់ មិនមានជំងឺមហារីក។ ការប្រើប្រាស់ព័ត៌មានទាំងនេះធ្វើឲ្យម៉ាស៊ីនបែងចែកសំណាកទៅតាមក្រុមនីមួយៗដោយផ្អែកលើទម្រង់ methylation។ បន្ទាប់មកអ្នកវិទ្យាសាស្ត្របង្រៀនម៉ាស៊ីនឲ្យចាប់ប្រភេទជំងឺមហារីក។
វេជ្ជបណ្ឌិត Oxnard បានលើកឡើងទៀតថាសម្រាប់ស្ត្រីមានផ្ទៃពោះគឺត្រូវមើលទៅលើ free-floating DNA សម្រាប់ភាពមិនប្រក្រតីផ្សេងៗរបស់ទារកក្នុងផ្ទៃ។ វិធីនេះគឺធ្លាប់ប្រើប្រាស់រួចហើយ ប៉ុន្តែតើធ្វើយ៉ាងណាដើម្បីរកឃើញជំងឺមហារីកនៅក្នុង free-floating DNA ឲ្យបានច្បាស់នោះគឺជាអ្វីដែលម៉ាស៊ីនកំពុងនឹងរៀន។
អត្ថបទគួរអាន៖
- លម្អិតខ្ទេចរឿងស្រីៗ “ធ្លាក់ស” ខុសប្រក្រតី មានពណ៌ ធុំក្លិន និងការឆ្លងរោគ
- បើមានបញ្ហាទ្វារមាសទាំងនេះ អាចសាកតិចនិកក្នុងអត្ថបទបាន!
អ្នកវិទ្យាសាស្ត្រក៏បានឲ្យម៉ាស៊ីនសិក្សាទៅលើសំណាកផ្សេងពីខាងលើដែលយកពីអ្នកចូលរួម ១ ២៦៤នាក់ ក្នុងនោះពាក់កណ្ដាលមានជំងឺមហារីក។ លទ្ធផលបង្ហាញថាតិចជាង១%នៃអ្នកមិនមានជំងឺមហារីកគឺត្រូវបានម៉ាស៊ីនរកឃើញថាមានជំងឺដែលលទ្ធផលនេះគឺមិនត្រឹមត្រូវ។ ប៉ុន្តែសម្រាប់អ្នកមានជំងឺមហារីកវិញ អ្នកវិទ្យាសាស្ត្ររកឃើញថាក្នុងចំណោមប្រភេទមហារីកជាង៥០ប្រភេទ ម៉ាស៊ីនធ្វើការរកឃើញបានត្រូវរហូតដល់៤៤% ទោះបីជាអ្នកវិទ្យាសាស្ត្របានសង្កត់ធ្ងន់ថាតួលេខនេះនឹងមានភាពប្រែប្រួលនៅពេលប្រើប្រាស់ទៅលើមនុស្សទូទៅបើប្រៀបទៅនឹងអ្នកដែលគេដឹងថាមានជំងឺមហារីក។
ការរកឃើញនេះគឺកាន់តែមានភាពប្រសើរឡើងនៅពេលជំងឺមហារីកចូលដល់ដំណាក់កាលធ្ងន់ធ្ងរ។ ជារួម ម៉ាស៊ីនអាចចាប់រកជំងឺមហារីកបានត្រឹមត្រូវ១៨%សម្រាប់អ្នកមានជំងឺមហារីកដំណាក់កាលទី១ និង៩៣%សម្រាប់អ្នកមានជំងឺមហារីកដំណាក់កាលទី៤។ អ្នកវិទ្យាសាស្ត្របាននិយាយទៀតថាលទ្ធផលនេះគឺផ្តល់នូវវិធីសាស្ត្រថ្មីក្នុងការរកជំងឺមហារីកដែលមានការលំបាកក្នុងការរក។ ឧទាហរណ៍ ម៉ាស៊ីនអាចចាប់បានអ្នកជំងឺមហារីកលំពែងដំណាក់កាលទី១បានត្រឹមត្រូវ៦៣% និងកើនឡើងដល់១០០%សម្រាប់អ្នកជំងឺមហារីកដំណាក់កាលទី៤។
អត្ថបទពាក់ព័ន្ធ៖
- កត្តាសំខាន់ទាំងបីនេះ ជាមូលហេតុធ្វើឲ្យកើតមហារីកសុដន់ ពិតមែន?
- ខ្លាច! ត្រូវចេះបង្ការផង ប្រយ័ត្នលាប់ឡើងវិញ
- ស្រីៗគួរដឹង! នេះជាថ្នាំអាចបង្ការមហារីកសុដន់
បន្ថែមពីនេះទៀត អ្នកវិទ្យាសាស្ត្រក៏បានរកឃើញថាម៉ាស៊ីននេះអាចឲ្យជួយក្នុងការរកមើលប្រភេទជំងឺមហារីក។ ៩៦%នៃសំណាកដែលគេជឿថាមានជំងឺមហារីក តេស្ដនេះអាចផ្តល់ការព្យាករណ៍ទៅលើប្រភពមហារីកនេះដែល៩៣%នៃការព្យាករណ៍នេះគឺត្រឹមត្រូវ។
វេជ្ជបណ្ឌិត David Crosby ប្រធានផ្នែករកឃើញជំងឺមហារីកនៅដំណាក់កាលដំបូងនៅប្រទេសអង់គ្លេសបានឲ្យដឹងថាការរកឃើញជំងឺមហារីកនៅដំណាក់កាលដំបូងគឺសំខាន់ណាស់ព្រោះជំងឺអាចមានឱកាសព្យាបាលបាន។ ទោះបីជាតេស្ដនេះកំពុងស្ថិតនៅដំណាក់កាលដំបូងនៃការអភិវឌ្ឍន៍ក៏ដោយ ប៉ុន្តែលទ្ធផលដំបូងគឺមានភាពប្រសើរណាស់។ ប្រសិនជាអ្នកវិទ្យាសាស្ត្រអាចធ្វើឲ្យតេស្ដនេះកាន់តែមានប្រសិទ្ធភាពក្នុងការរកឃើញជំងឺមហារីកក្នុងដំណាក់កាលដំបូង តេស្ដនេះអាចនឹងក្លាយជាឧបករណ៍រកជំងឺមហារីកដំណាក់កាលដំបូង។ លោក David ក៏បានបន្តទៀតថាគេនៅត្រូវការការសិក្សាបន្ថែមដើម្បីជួយអភិវឌ្ឍសមត្ថភាពតេស្ដនេះក្នុងការរកជំងឺមហារីកដំណាក់កាលដំបូង និងសិក្សាបន្ថែមទៅលើការប្រើប្រាស់ជាក់ស្តែង។
អត្ថបទពាក់ព័ន្ធ៖
- ជំងឺមហារីកក្រពេញអូវែ ស្រីៗត្រូវយកចិត្តទុកដាក់
- WHO៖ ប្រទេសក្រីក្រអត្រាព្យាបាលជំងឺមហារីកកុមារជាសះស្បើយត្រឹម២០ភាគរយ
- អ្នកវិទ្យាសាស្រ្តរកឃើញពន្លឺថ្មី អាចវិនិច្ឆ័យនិងព្យាបាលជំងឺមហារីកបានលឿន
- ចិនបង្កើតឧបករណ៍តេស្តរកមើលមហារីកជំនាន់ថ្មីបានសម្រេច
- ដំណឹងល្អ! អ្នកវិទ្យាសាស្ត្ររកឃើញវ៉ាក់សាំង អាចព្យាបាលមហារីកជាសះស្បើយ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញ វេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
