ជាធម្មតា មនុស្សយើងតែងមានពេលណាមួយ ជួបនូវអារម្មណ៍តូចចិត្ត ឬសោកស្ដាយអំពីអ្វីមួយក្នុងអតីតកាល។ ការសិក្សាស្រាវជ្រាវបានបង្ហាញថាការឈឺចិត្តដោយវិប្បដិសារីអាចបង្កឲ្យមានការរំខានដល់សុខភាពរាងកាយនិងផ្លូវអារម្មណ៍។ តោះអញ្ចឹងយើងនាំគ្នាទៅស្វែងរកប្រភពនៃវិប្បដិសារី និងរបៀបដែលធ្វើឲ្យយើងដោះស្រាយបញ្ហានេះបាន។
ការជឿទុកចិត្តលើខ្លួនឯង
អ្នកណាៗក៏មានរឿងដែលស្ដាយក្រោយដែរ។ ជាធម្មតាមនុស្សយើងក្នុងមួយឆាកជីវិតតែងមានជួបរឿងស្ដាយក្រោយ ដែលទំនងគ្មានអ្នកអាចចៀសរួចនោះទេ។ ទោះយ៉ាងណា ការរំដោះខ្លួនពីវិប្បដិសារីនេះ គឺអាចធ្វើទៅបាន និងថែមទាំងនាំមកវិញឲ្យជីវិតរបស់យើងវិលទៅរកភាពរីករាយផងដែរ។ យើងត្រូវដឹងថាអ្នកផ្សេងអាចរំដោះខ្លួនពីបញ្ហាជីវិតបាន រឿងអីយើងមិនអាចធ្វើបាននោះ។ យើងត្រូវដឹងថាខ្លួនយើង ក៏មានសក្ដានុពលដូចអ្នកផ្សេងដើម្បីប្រឈម នឹងដោះស្រាយនូវរាល់អ្វីដែលជាកំហុសឆ្គង បានកើតឡើងនាពេលកន្លងមកដូចគ្នា។
អត្ថបទពាក់ព័ន្ធ៖
- បើដឹងខ្លួនឯងបាក់ទឹកចិត្ត កុំតាមដានរឿង Sad ពេក ប្រយ័ត្នលើសដើម
- កុំច្រឡំថាបាក់ទឹកចិត្ត សញ្ញាទាំងនេះជាការសោកសៅធម្មតាប៉ុណ្ណោះ
- ស្តាប់តន្រ្តី ផ្ដល់គុណប្រយោជន៍ច្រើនយ៉ាងដល់សុខភាពផ្លូវចិត្ត
ទទួលយកការពិតថាគ្មាននរណាម្នាក់ល្អឥតខ្ចោះនោះទេ
ជាការពិតណាស់ ការទទួលខុសត្រូវលើអ្វីដែលយើងបានធ្វើគឺជារឿងចាំបាច់ ជាពិសេសចំពោះកំហុសដែលយើងបានសាងឡើង។ ដូចនេះហើយបានជាយើងត្រូវពិនិត្យឲ្យបានល្អិតល្អន់ទៅលើសកម្មភាពរបស់យើង។
ជាមួយគ្នានេះដែរ យើងត្រូវហ៊ានទទួលស្គាល់ និងថ្លឹងថ្លែងពីអ្វីដែលយើងអាចធ្វើបានដូចគ្នា។ ជាធម្មតាសមត្ថភាពរបស់មនុស្សយើងម្នាក់ៗតែមានកម្រិត ដែលនេះជាអ្វីដែលយើងមិនអាចប្រកែកបាន។ មានរឿងជាច្រើនដែលយើងអាចធ្វើបាន និងក៏មានរឿងផ្សេងជាច្រើនទៀតដែរ ដែលយើងមិនអាចធ្វើបាន នេះជាធម្មជាតិរបស់មនុស្សទៅហើយ។ ទោះបីជាយើងបានដឹងរឿងខ្លះបានច្បាស់ហើយក៏ពិតមែន តែពេលខ្លះក៏យើងនៅតែអាចវាយតម្លៃរឿងនោះខុសបានដដែល។ គ្នាយើងត្រូវដឹងដែរថា ពេលខ្លះយើងអាចធ្វើរឿងខ្លះទៅតាមអារម្មណ៍ និងគ្មានហេតុផលផងក៏ថាបាន ព្រោះថាគ្រប់គ្នាមិនល្អឥតខ្ចោះនោះទេ ពេលខ្លះគឺអាចមានកំហុសបែបនេះឯង។
យើងគួរគិតបែបនេះវិញថា យើងអាចទទួលយកភាពមិនល្អឥតខ្ចោះរបស់សមាជិកគ្រួសារ និងមិត្តភក្ដិរបស់យើងបាន ចុះហេតុអ្វីយើងមិនអាចទទួលយកភាពមិនល្អឥតខ្ចោះរបស់ខ្លួនឯងបាន។ យើងគួរចាំថា កំហុសមិនមែនសម្ដៅដល់ការបរាជ័យទាំងស្រុងរបស់យើងនោះទេ តែបញ្ជាក់ថាយើងគឺជាមនុស្ស។
តើគួរដោះលែងខ្លួនឯងពីកំហុសឆ្គងយ៉ាងដូចម្ដេច?
ការខិតខំរបស់យើងដើម្បីដោះស្រាយជាមួយនឹងអារម្មណ៍ស្ដាយក្រោយ មិនមែនមានន័យថាយើងអាចបានធូរចិត្តវិញទាំងស្រុងនោះទេ ពេលខ្លះយើងនៅតែមានអារម្មណ៍សោកសៅ ទុក្ខសោក និងគិតថាខ្លួនឯងមានកំហុសដដែល។ បើសិនជាយើងព្យាយាមដោះស្រាយហើយនៅតែមានអារម្មណ៍បែបនេះទៀត យើងអាចសាកល្បងដោះស្រាយតាមវិធីនេះបាន។
១. ទទួលយកអារម្មណ៍ទាំងនេះហើយខំលួងចិត្តខ្លួនឯងដូចនឹងការដែលយើងលួងលោមកូនក្មេងអញ្ចឹង។
២. ប្រាប់ទៅខ្លួនឯងថាអ្វីៗនឹងប្រសើរឡើង និងត្រូវចេះអាណិតខ្លួនឯង ហើយយើងក៏អាចដើរស្រូបខ្យល់អាកាសឬត្រាំទឹកក្ដៅ ដើម្បីបន្ធូរអារម្មណ៍ខ្លះ។
៣. ណាត់ជួបជាមួយមិត្តភក្ដិ និងប្រាប់ពីអារម្មណ៍យើងទៅអ្នកទាំងនោះ។
៤. ប្រសិនជាអាចគួរនិយាយថាសុំទោសទៅកាន់មនុស្សដែលយើងបានធ្វើឲ្យឈឺចាប់។
យើងប្រហែលជាអាច ឬមិនអាចទទួលបានការអត់ទោសពីមនុស្សដែលយើងបានបង្កកំហុសលើ។ យើងក៏គួរចេះកត់សម្គាល់នូវការអាក់អន់ចិត្តរបស់ខ្លួន និងកាត់បន្ថយទៅលើការគិតរបស់អ្នកដទៃមកលើខ្លួនយើង។ យើងគួរចេះសម្រាលបន្ទុកខ្លួនឯ៝ងពីអារម្មណ៍ស្ដាយក្រោយដែលយើងមាន។ យើងគួរតែខំសម្លឹងមើលមកចំណុចល្អរបស់យើងច្រើនជាងកំហុសដែលយើងបានសាង។
អត្ថបទពាក់ព័ន្ធ៖
- ស្តាប់ចម្រៀង មានឥទ្ធិពលល្អខ្លាំងលើខួរក្បាល
- ឧស្សាហ៍ខឹង ឬមួម៉ៅញឹក នេះវិធីងាយៗជួយឲ្យអារម្មណ៍ល្អឡើងវិញ
- តិចនិកសាមញ្ញៗ តែបំបាត់អារម្មណ៍ឯកោពេលនៅម្នាក់ឯង ហើយបើអផ្សុក អាចសាកបាន
- ទទួលបានវីតាមីន N ពីធម្មជាតិបៃតង ស្មើនឹងថ្នាំទិព្វជួយសុខភាពផ្លូវចិត្ត
- តិចនិកជួយថែរក្សាសុខភាព ពេលកំពុងបាក់ទឹកចិត្ត
- មានសញ្ញាទាំងនេះអត់ បើមានស្ត្រេសដល់កំពូលហើយ
ក្នុងករណីមានសំណួរ មន្ទិលសង្ស័យជុំវិញសុខភាពអ្នកជម្រើសល្អបំផុតសូមពិគ្រោះនិងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជាមិនធ្វើរោគវិនិច្ឆ័យឬព្យាបាលជូនទេ៕
