ការពាក់ប្រេសពត់ធ្មេញគឺជាវិធីម្យ៉ាងដែលជួយតម្រង់ធ្មេញឲ្យរត់ត្រង់ជួរ រឹងមាំល្អ មិនតែប៉ុណ្ណោះក៏ជាផ្នែកមួយជួយលើកសម្រស់មាត់ធ្មេញមើល ទៅស្រស់ស្អាតផងដែរ។ ថ្វីដ្បិតតែការពាក់ប្រេសផ្ដល់អត្ថប្រយោជន៍ដល់យើងមែន តែវាក៏ជាមូលហេតុធ្វើឲ្យប៉ះពាល់ធ្មេញយើងវិញ ប្រសិនយើងមិនបានយល់ច្បាស់ពីវិធីសម្អាត។ ខាងក្រោមគឺជាបញ្ហាដែលងាយប្រឈម ក្រោយពេលពាក់ប្រេសធ្មេញបើយើងអនុវត្តតាមការណែនាំមិនបានត្រឹមត្រូវ។
១.កើតជំងឺអញ្ជាញធ្មេញ
ការពាក់ប្រេសពត់ធ្មេញអាចប្រឈមកើតជំងឺអញ្ចាញធ្មេញ ប្រសិនបើមិនបានដឹងពីវិធីសម្អាតធ្មេញឲ្យបានស្អាត។ ពពួកបាក់តេរីអាចតោងជាប់នឹងប្រេស ពេលយើងសម្អាតមិនបានស្អាតល្អបន្ទាប់ពីញ៉ាំអាហារ។ បញ្ហានេះអាចធ្វើឲ្យអញ្ចាញធ្មេញ ហូរឈាម និងរលាកជាដើម។ ក្នុងករណីដែលអញ្ចាញធ្មេញមានជំងឺ ហើយមិនបានព្យាលបាលឲ្យបានត្រឹមត្រូវទេនឹងនាំឲ្យប៉ះពាល់ដល់សុខភាពផ្នែកផ្សេងៗទៀតនៃរាងកាយផងដែរ។
២.ពុកធ្មេញ
ចំណុចនេះក៏ស្រដៀងនឹងផ្នែកខាងលើដែរ ប្រសិនបើការសម្អាតធ្មេញមិនបានល្អទេ ពពួកបាក់តេរីដែលតោងជាប់នឹងប្រេសអាចបង្កឲ្យធ្មេញពុកបាន។
៣.ធ្មេញលឿង
ការពាក់ប្រេសពត់ធ្មេញធ្វើឲ្យយើងពិបាកក្នុងសម្អាតធ្មេញឲ្យសព្វកន្លែង ដូច្នេះកន្លែងដែលយើងមិនអាចរុញច្រាស់ទៅដល់ គឺមិនអាចសម្អាតបានល្អនោះទេ ហេតុនេះហើយធ្មេញរបស់យើងនឹងប្រឈមប្រែទៅជាពណ៌លឿងបាន។
៤.ក្លិនមាត់មិនល្អ
ក្លិនមាត់អាចកើតមានជាទូទៅ ប្រសិនបើមិនបានសម្អាត ឬ អនាម័យមាត់ធ្មេញមិនបានល្អ។ ដូចគ្នាដែរចំពោះអ្នកពាក់ប្រេសពត់ធ្មេញ ដែលមានការលំបាកក្នុងការសម្អាតធ្មេញ គឺងាយនឹងមានក្លិនមាត់មិនល្អបើសម្អាតមិនបានត្រឹមត្រូវទេនោះ។
៥.ការរបូតប្រេស
ការរបូតប្រេសពត់ធ្មេញអាចកើតឡើងបាន ពិសេសសម្រាប់អ្នកទើបពាក់ដំបូងៗ មិនសូវគ្រប់គ្រងការហូមចុកបានល្អ។ របបអាហារដែលគួរចៀសវាង មានពពួកអាហាររឹង អាហារស្អិត និង ពពួកអាហារស្វិតជាដើម។ បញ្ហាស្រដៀងគ្នាដែរ ដូចជាការសណ្ដកប្រេស ឬក៏វៀចប្រេសជាដើម។
៦.មានស្នាមសលើធ្មេញ
ការពាក់ប្រេសពត់ធ្មេញ ក៏អាចប្រឈមកើតស្នាមសៗនៅលើធ្មេញបានដែរ ប្រសិនមិនបានសម្អាតឲ្យបានស្អាតល្អ។ ស្នាមសលើធ្មេញ គឺជាដំណាក់ដំបូងនៃការខូចខាត ផ្នែករឹងនៅខាងក្រៅធ្មេញរបស់យើង វាបង្កឡើងដោយសារពពួកបាក់តេរី ដែលតោងជាប់នឹងធ្មេញ ក្រោយពេលយើងញ៉ាំអាហារ ហើយសម្អាតមិនបានស្អាត។ ដូច្នេះគួរពិភាក្សាជាមួយគ្រូពេទ្យឲ្យច្បាស់លាស់អំពីវិធីនៃការសម្អាតធ្មេញឲ្យបានស្អាតពេលយើងពត់ធ្មេញ។
ចំណុចសំខាន់
- កើតជំងឺអញ្ចាញធ្មេញ
- ពុកធ្មេញ
- ធ្មេញលឿង
- ក្លិនមាត់មិនល្អ
- ការរបូតប្រេស
- មានស្នាមសលើធ្មេញ។
អត្ថបទគួរអាន៖
- ឧស្សាហ៍ឈឺអញ្ចាញធ្មេញ អាចពាក់ព័ន្ធបញ្ហាសុខភាពទាំងនេះ
- ទម្លាប់អាក្រក់ ៨ យ៉ាងធ្វើឲ្យធ្មេញខូចដោយមិនដឹងខ្លួន
- រោគសញ្ញាសាមញ្ញទាំងនេះកុំថាមិនអី បញ្ជាក់ថាធ្មេញចាប់ផ្តើមពុកហើយ
- ឧស្សាហ៍ស្រៀវធ្មេញ សាកតិចនិកទាំងនេះលមើល៍
- ជំងឺមាត់ធ្មេញ ២ ប្រភេទគួរឲ្យបារម្ភបំផុត បើមានឆាប់ទៅព្យាបាលឲ្យលឿន
[embed-health-tool-heart-rate]
