ទម្រាំធំពេញវ័យមានសុខភាពរឹងមាំល្អ អាអូនតូចៗច្បាស់ជាជួបបញ្ហាសុខភាពទូទៅមួយចំនួនដែលនាំទុក្ខ ពិបាកក្នុងខ្លួន ដូចផ្ដាសាយ គ្រុនក្ដៅ ឬហើមពោះ ចុកពោះជាដើម។ ម៉ាក់ប៉ាមួយចំនួនសង្កេតឃើញថា បញ្ហាចុក ឬហើមពោះ កើតឡើងញឹកញាប់ទៅលើកូនខ្លួនផ្ទាល់ និងក្មេងដទៃទៀត ធ្វើឲ្យអាអូនយំ ត្អូញត្អែរពិបាកក្នុងខ្លួន។ ខាងក្រោមនេះ អាចជាមូលហេតុដែលបណ្ដាលឲ្យក្មេងឧស្សាហ៍ហើមពោះ ចុកពោះ តែងតែយំរករឿង។
កូនឧស្សាហ៍ហើមពោះ យំរករឿងច្រើនមកពីអី? ប៉ះពាល់ដល់ការលូតលាស់ទេ?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. លេបខ្យល់ចូលពោះ
ការលេបខ្យល់បន្ថែមចូលពោះ មិនត្រឹមតែធ្វើឲ្យកូនហើមពោះប៉ុណ្ណោះទេ ថែមទាំងអាចបណ្ដាលឲ្យកូនចង្អោរ និងបាត់បង់ចំណង់អាហារទៀត។ ក្មេងខ្លះលេបខ្យល់ចូលពោះ នៅពេលដែលពួកគេកើតអារម្មណ៍ធុញថប់ ឬពេលបារម្ភរឿងអ្វីមួយ។ ក្នុងករណីនេះ ប៉ាម៉ាក់បង្រៀនកូនឲ្យដកដង្ហើមវែងៗ ពេលកូនភ័យ ឬបារម្ភ ឬអាចប្រើថ្នាំបំបាត់ការហើមពោះតាមការណែនាំរបស់គ្រូពេទ្យក៏បាន។
២. ទល់លាមក
នេះជាបញ្ហាដ៏ធំមួយក្នុងចំណោមក្មេងៗ ពិសេសក្មេងដែលញ៉ាំម្សៅទឹកដោះគោ នៅពេលអាអូនដល់វ័យចេះចូលបន្ទប់ទឹកជុះខ្លួនឯង។ មូលហេតុទូទៅមួយ កុមារអាចនឹងទប់មិនព្រមបន្ទោរបង់ពេលទៅសាលា ព្រោះពួកគេមិនទម្លាប់ប្រើបន្ទប់ទឹកនៅសាលា (ឬ សម្រាប់ក្មេងតូចៗ អាចមិនព្រមជុះតាមការបង្រៀន potty training ជាហេតុអាចនាំឲ្យទល់លាមក និងហើមពោះ។ល។ ដូចនេះ ម៉ាក់ប៉ាគួរបន្ថែមអាហារមានជាតិសរសៃ ឬឲ្យអាអូនញ៉ាំទឹកឲ្យច្រើន ដើម្បីស្រួលជុះ ហើយបើកូនទល់លាមកយូរ គួរពិគ្រោះជាមួយគ្រូពេទ្យ។
៣. អាលែកហ្សីទឹកដោះគោ
នៅក្នុងម្សៅទឹកដោះគោមួយចំនួនអាចមានគ្រឿងផ្សំដែលធ្វើឲ្យកូនយើងប្រតិកម្មជាមួយ ជាហេតុអាចបណ្ដាលឲ្យអាអូនហើមពោះ ឬចុកពោះបាន។ បើតាមលោកវេជ្ជបណ្ឌិត អ៊ុន យូ ឯកទេសរោគកុមារ បានឲ្យដឹងថា ករណីដែលទារកមានខ្យល់ក្នុងពោះ អាចដោយសារ កូនឆ្លងមេរោគចូលពោះ ឬអាលែកហ្ស៊ីម្សៅទឹកដោះគោ ធ្វើឲ្យមានបាតុភូតខុសប្រក្រតីនៅក្នុងពោះវៀនរបស់ក្មេង វាអាចបម្លែងទៅជាហ្គាស ឬរហូតអាចបណ្ដាលឲ្យរាកទៀតក៏មាន។ បើកូនមានបញ្ហានេះ ម៉ាក់ប៉ាគួរពិគ្រោះជាមួយគ្រូពេទ្យឯកទេសកុមារ ដើម្បីរកដំណោះស្រាយត្រឹមត្រូវ។
ការជ្រើសរើសអាហារ ឬម្សៅទឹកដោះគោ ឲ្យកូនយើងជារឿងសំខាន់ណាស់ដែលប៉ាម៉ាក់គ្រប់រូបមិនគួរប្រហែសឡើយ ព្រោះបើជ្រើសខុស សុខភាពកូនច្បាស់ជាប្រឈមបញ្ហាដូចដែលបានរៀបរាប់ខាងលើនេះដែរ។ ដូចនេះ បើមិនចង់ឲ្យអាអូនយំច្រើន ឬពិបាកក្នុងខ្លួនដោយសារបញ្ហាហើមពោះ ទល់លាមកនេះ ម៉ាក់ប៉ាអាចបន្ថែមអាហារដែលមានជាតិសរសៃច្រើន ងាយស្រួលរំលាយ ឬអាចឲ្យកូនញ៉ាំទឹកឲ្យបានច្រើន ឬមួយក៏ជ្រើសរើសយកម្សៅទឹកដោះគោដែលល្អ មានជីវជាតិគ្រប់គ្រាន់ និងផ្ដល់ភាពងាយស្រួលដល់ក្រពះពោះវៀនកូនយើង។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម