ចូលចិត្តស្រែកគំហក ឬជេរកូនខ្លាំងៗ ជាទម្លាប់មិនល្អទេ មិនត្រឹមតែមិនអាចជួយឲ្យកូនយើងទទួលបានដំបូន្មានល្អៗ ថែមទាំងបែរជាបង្កើតគំរូ ទម្លាប់អាក្រក់ថ្មីមួយទៀតចំពោះក្មេង បង្កឲ្យពួកគេអាចមានបញ្ហានៅពេលធំឡើងទៀតផង។ ទោះកូនយើង រពឹសខ្លាំង មិនស្តាប់សម្តី ក៏មិនត្រូវស្រែកដាក់កូនដែរ។ អត្ថបទនេះ”Hello គ្រូពេទ្យ” ចង់បង្ហាញប៉ាម៉ាក់ទាំងអស់ពីគុណវិបត្តិស្រែកទៅលើកូន និងវិធីរំងាប់អារម្មណ៍។
ចូលចិត្តស្រែកគំហកឲ្យកូនខ្លាំងៗ ប្រយ័ត្នស្តាយក្រោយ ព្រោះកូនអាចមានបញ្ហាទាំងនេះ...
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- គុណវិបត្តិពីស្រែក
ស្រែក គំហកខ្លាំងៗ មានគុណវិបត្តិជាច្រើន ដែលជាញឹកញាប់ ច្រើនកើតឡើងដោយសារតែមានអារម្មណ៍ខឹង។ នៅពេលយើងខឹង ហើយមិនអាចគ្រប់គ្រងកំហឹងបាន ប៉ាម៉ាក់អាចនឹងនិយាយអ្វីមួយ ឬច្រើន ធ្វើឲ្យប៉ះពាល់ដល់អារម្មណ៍កូនបាន ថែមទាំងអាចធ្វើឲ្យកូនយើង មានអារម្មណ៍ស្អប់ខ្លួនឯងទៀតផង។ ក្នុងកាលៈទេសៈនេះ គ្រប់យ៉ាងអាចនឹងកាន់តែធ្ងន់ធ្ងរ បើកូនយើង យកចិត្តទុកដាក់ខ្លាំងលើសម្តីគំរោះគំរើយរបស់យើង នាំឲ្យកូនមានជំងឺថប់បារម្ភ និងគ្មានទំនុកចិត្តលើខ្លួនឯង។
ក្រៅពីស្រែក អាចមានឥទ្ធិពលអវិជ្ជមានផ្លូវអារម្មណ៍កូនយើងហើយនោះ វាក៏ប៉ះពាល់ដល់ការលូតលាស់បុគ្គលិកលក្ខណៈកូនយើងដូចគ្នា។ ក្នុងគ្រួសារមួយ ប៉ាម៉ាក់ គឺជាគំរូសម្រាប់កូនៗយើងយកតម្រាប់តាម ហេតុនេះបើប៉ាម៉ាក់ស្រែកដាក់កូនៗ ពេលកូនយើងធំឡើង នឹងរក្សាទម្លាប់នេះ ប្រើប្រាស្រ័យទាក់ទងក្នុងសង្គមជាមិនខាន នាំឲ្យមានការរើសអើងទាំងផ្លូវកាយ និងផ្លូវចិត្ត។ ក្នុងស្ថានភាពនេះដែរ កូនៗ អាចនឹងយកទម្លាប់ស្រែក គំហកនេះ ប្រើមកលើប៉ាម៉ាក់វិញ ពិសេសនៅពេលធំឡើងតែម្តង ហេតុនេះត្រូវប្រុងប្រយ័ត្ន មិនត្រូវស្រែកគំហក ស្តីបន្ទោសក្មេងខ្លាំងៗឡើយ។
២- វិធីបញ្ឈប់ទម្លាប់ស្រែកដាក់កូន
ជំហានដំបូង ដើម្បីបញ្ឈប់ទម្លាប់ស្រែក គំហក ត្រូវដឹងថា កត្តាអ្វីបណ្តាលឲ្យយើងមិនសប្បាយចិត្ត មានកំហឹង។ អាចបណ្តាលមកពីកូនយើងមិនធ្វើតាម មិនយកចិត្តទុកដាក់ ឬមិនអើពើចំពោះយើង។ ពេលខ្លះ ការស្រែកគំហក ជាវិធីសាស្ត្រមួយ ដើម្បីបន្ថយសម្ពាធពីការរយៈពេលយូរពេញមួយថ្ងៃ ឬបន្ទាប់ពីបានឈ្លោះគ្នាខ្លាំង ជាមួយនរណាម្នាក់ ឬប្តីប្រពន្ធយើង។ នៅពេលប៉ាម៉ាក់ បានដឹងពីមូលហេតុ និងពេលវេលាកើតកំហឹងនោះ ប៉ាម៉ាក់ អាចនឹងដោះស្រាយនូវទម្លាប់ស្រែកបានល្អប្រសើរជាងមុន។
ត្រូវដើរចេញឲ្យឆ្ងាយពីកូន នៅពេលយើងមានរម្មណ៍ខឹង ចង់ស្រែកដាក់កូន។ ពេលខ្លះ នៅស្ងៀមអាចជួយប៉ាម៉ាក់ឲ្យមានអារម្មណ៍ស្ងប់ និងគ្រប់គ្រងកំហឹងបានល្អជាងមុន។ ត្រូវគិតពីអ្វីកូនយើងអាចរៀនពីយើង ហើយការស្រែក អាចធ្វើឲ្យយើងដាក់ទណ្ឌកម្មអ្វីមួយមកលើកូន អាស្រ័យលើអារម្មណ៍កំពុងខឹង មិនមែនផ្អែកលើអ្វីកូនធ្វើខុសនោះទេ។ ទាំងនេះហើយ មិនអាចជួយកូនយើងរៀនចេះអ្វីត្រឹមត្រូវនោះទេ។
បន្ទាប់ពីប៉ាម៉ាក់បានសម្រួលអារម្មណ៍ហើយ គួរតែនិយាយជាមួយពួកគេយឺតៗ ហើយពន្យល់ពួកគេ អ្វីត្រូវ និងអ្វីមិនគួរធ្វើ។ ប៉ាម៉ាក់អាចមានភាពជាក់លាក់ ដោយនិយាយនូវអ្វីយើងចង់កូនធ្វើក៏បានដែរ។ បើកូនយើងមានអាយុច្រើន ហើយអាចដឹងពីអ្វីយើងចង់និយាយ គួរតែលើកទឹកចិត្តពួកគេ រកដំណោះស្រាយល្អៗ ដើម្បីដោះស្រាយបញ្ហាដោយខ្លួនឯង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម