កូនង៉ែតកើតលឿងគឺជារឿងធំដុំ ដែលម៉ាក់ប៉ាគ្រប់រូបគួរតែយកចិត្តទុកដាក់ ព្រោះវាអាចឲ្យខ្សោយបញ្ញាស្មារតីបាន ប្រសិនបើធ្លាក់ដល់ដំណាក់កាលខ្លាំង ។ ដូចនេះយើងគួរតែមកដឹងពីវិធីព្យាបាល ការថែទាំកូនឲ្យបានល្អ និងមូលហេតុនៃការកើតលឿង។
រឿងគួរបារម្ភ បើកូនតូចកើតលឿង
លោកគ្រូពេទ្យ ប៉ែន កក្កដា ឯកទេសរោគកុមារ និងទារក នៅមន្ទីរពេទ្យកុមារជាតិបានឲ្យដឹងថា កើតលឿងនេះមិនជាធ្ងន់ធ្ងរទេ តែបើមិនមើលឲ្យបានដិតដល់អាចវិវត្តជាជំងឺធ្ងន់ធ្ងរ ពិបាកក្នុងការព្យាបាល។
តើមូលហេតុអ្វីដែលបណ្ដាលឲ្យកើតលឿង?
ចំពោះក្មេងដែលកើតមិនគ្រប់ខែស្ទើរតែ ១០០ % នឹងកើតលឿងនេះ តែបើកូនគ្រប់ខែមានតែជាង ៦៦ % ប៉ុណ្ណោះ។ ការចេញលឿងរបស់ទារក ជាធម្មតានៅចន្លោះពីអាយុ ២-១០ថ្ងៃ ដោយគ្មានរោគសញ្ញាអ្វីទាំងអស់ ដូចជា ក្ដៅ ឬត្រជាក់ខ្លួន ថយបៅ កន្ត្រាក់ដៃជើងអ្វីនោះទេ។ ផ្ទុយមកវិញទារកអាចបៅបានជាធម្មតា និងឡើងទម្ងន់ថែមទៀតផង។
ជាតិលឿង នេះកើតឡើងដោយសារការចាល់ពពួកបីលីរុយប៊ីនក្នុងគ្រាប់ឈាម និងនៅក្នុងសរសៃឈាម ហើយក៏ជ្រាបចូលក្រោមស្បែកទារកដែលមិនអាចបញ្ចេញទាន់តាមថ្លើមទៅកាន់លាមកវិញ។ មូលហេតុបណ្ដាលមកពី ឈាមក្រហមទារកដែលត្រូវជម្រុះចោលមានចំនួនច្រើន និងមុខងារថ្លើមមិនទាន់ដំណើរការល្អ រួមផ្សំនឹងពោះវៀនមិនទាន់មានពពួកបាក់តេរីល្អនៅលើពោះវៀន ដែលជំរុញឲ្យស្រូបជាតិលឿងទៅវិញច្រើន។ នៅពេលដល់កម្រិតធ្ងន់ធ្ងរជាតិលឿងនេះមិនត្រឹមតែមានលើស្បែកប៉ុណ្ណោះទេ គឺទាំងភ្នែក ឬខ្លួនទាំងមូលខ្លាំងតែម្ដង។
សម្រាប់ដំណោះស្រាយពេលកូនកើតមានជំងឺលឿង គឺយើងត្រូវយកកូនទៅហាលថ្ងៃ ព្រោះពន្លឺថ្ងៃមានកាំរស្មីអ៊ុលត្រាវីយូឡេ (UV) ជួយឲ្យប៊ីលីរុយប៊ីនទាំងនោះអាចចេញតាមទឹកនោមបាន និងកាត់បន្ថយជាតិលឿងរបស់ទារក។
ប្រសិនបើការចេញលឿងមុន ២៤ ម៉ោង និងលើសពី ១០ ថ្ងៃទៅ រួមទាំងរោគសញ្ញាដទៃទៀត គឺជារឿងអាក្រក់បំផុតសម្រាប់ទារក ដែលទាមទារការព្យាបាលត្រឹមត្រូវ និងទាន់ពេលវេលា។ ក្រៅពីហាលថ្ងៃ គ្រូពេទ្យមានម៉ាស៊ីនពន្លឺ ដើម្បីជួយ ឬត្រូវការផ្លាស់ប្ដូរឈាមជាបន្ទាន់ ទើបអាចយកជាតិលឿងចេញពីខ្លួនទារកបាន។
កើតលឿងនេះមានផលវិបាកមួយចំពោះទារកមិនគ្រប់ខែ គឺប៉ះពាល់ខួរក្បាលដែលអាចបណ្ដាលឲ្យប្រកាច់ ឬពិការ កាយសម្បទា។
អត្ថបទពាក់ព័ន្ធ៖
- ក្មេងទើបកើត កុំធ្វើរឿងទាំងប៉ុន្មាននេះដាក់ឲ្យសោះ
- ភ្នែកប៊េបីងាយមានបញ្ហាណាស់ ម៉ាក់ៗត្រូវប្រយ័ត្ន ចៀសបញ្ហាទាំងនេះ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម