”គេង” ជាផ្នែកមួយដ៏សំខាន់ ចូលរួមក្នុងការលូតលាស់ផ្នែករាងកាយ និងប្រាជ្ញាស្មារតីក្មេងៗ ហើយជាទូទៅក្មេងៗ ចំណាយពេលប្រហែល ៤០% ទៅលើការគេង។ ជាប៉ាម៉ាក់គេ ត្រូវដឹងថា កូនគួរគេងប៉ុន្មានម៉ោងទើបល្អសុខភាព និងប្រាជ្ញាស្មារតី ហេតុនេះ “Hello គ្រូពេទ្យ” នឹងណែនាំពេលវេលាគេងត្រឹមត្រូវសម្រាប់ក្មេងៗ អាស្រ័យលើវ័យនីមួយៗ។
ពេលវេលាគេងសម្រាប់ក្មេងៗ អាស្រ័យលើអាយុ ចុះជាមធ្យមក្មេងត្រូវគេងប៉ុន្មានម៉ោងទើបត្រឹមត្រូវ?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- សារៈសំខាន់នៃការគេង
យើងទាំងអស់គ្នាសុទ្ធតែបានដឹង គេង ពិតជាមានសារៈសំខាន់ណាស់សម្រាប់ក្មេង ប៉ុន្តែដឹងអត់? គេងចូលរួមក្នុងការជួយដល់សុខភាពក្មេងបានយ៉ាងច្រើនដូចជា៖
– គេងជួយដល់ការលូតលាស់៖ បើយោងតាមវេជ្ជបណ្ឌិត Judith Owens, M.D នាយកផ្នែកដំណេក នៃមជ្ឈមណ្ឌលកុមារជាតិវេជ្ជសាស្ដ្រអាមេរិក បានលើកឡើងថា គេងស្កប់ស្កល់ និងមានរយៈពេលយូរ អាចជួយឲ្យរាងកាយក្មេងបញ្ចេញអ័រម៉ូនលូតលាស់ ទៅធ្វើការផ្ទាល់ជាមួយផ្នែកស្មារតី និងរាងកាយរបស់ក្មេង។ ការសិក្សាជាច្រើន បានលើកឡើងថា ក្មេងៗមានកម្រិតប្រាជ្ញាស្មារតីខ្ពស់ (IQ) ជាទូទៅ គេងបានច្រើនម៉ោងក្នុងមួយថ្ងៃ ហើយបើគេងមិនគ្រប់គ្រាន់ ពិសេសនៅលើក្មេងមានអាយុចន្លោះពី ៣-៤ ឆ្នាំ គឺមានទាក់ទងជាមួយបញ្ហាប្រព័ន្ធប្រសាទ ធ្វើការខ្លាំងពេក និងប្រាជ្ញាស្មារតីក្មេង ក៏ធ្វើការមិនបានល្អដូចគ្នា។
– គេងជួយដល់សុខភាពបេះដូង៖ សុខភាពខួរក្បាល ត្រូវបានគេចាត់ទុកជារឿងសំខាន់ និងជាមូលហេតុប៉ាម៉ាក់គ្រប់រូប នាំកូនៗចូលគេងឲ្យបានលឿន។ ប៉ុន្តែការគេង មិនត្រឹមតែទាក់ទងជាមួយខួរក្បាលមួយមុខទេ វាក៏ជួយរៀបចំ ជួសជុលប្រព័ន្ធសរសៃឈាមបេះដូងទៀតផង ហើយផ្ទុយមកវិញ បើគេងមិនបានគ្រប់គ្រាន់ ក្មេងនឹងប្រឈមមុខខ្ពស់ ជាមួយជំងឺសរសៃឈាមបេះដូង ដូចជា ជំងឺលើសឈាម និងដាច់សរសៃឈាមខួរក្បាល ជាដើម។
– គេងអាចគ្រប់គ្រងបម្រែបម្រួលគីឡូ៖ គេងបានតិច អាចទទួលយកកាឡូរីបានច្រើនជាង ក្មេងគេងបានគ្រប់គ្រាន់ នេះបើយោងតាមការបង្ហាញរបស់អ្នកស្រាវជ្រាវនៃសាកលវិទ្យាល័យ College London ចក្រភពអង់គ្លេស។ អ្នកជំនាញលើកឡើងថា គេងមិនបានគ្រប់គ្រាន់ ជាមូលហេតុ ធ្វើមានការរាំងស្ទះ ដំណើរការបញ្ចេញ អ័រម៉ូនឡឹបទីន (អ័រម៉ូនប្រាប់ទៅខួរក្បាលពេលញ៉ាំឆ្អែត) នាំឲ្យក្មេងគេងមិនបានគ្រប់គ្រាន់ នឹងបន្តញ៉ាំកាន់តែច្រើន។ ការសិក្សាមួយទៀត ធ្វើឡើងដោយសកលវិទ្យាល័យ John Hopkins បានបញ្ជាក់ដូចគ្នាដែរថា អត្រាធ្វើឲ្យក្មេងលើសទម្ងន់ នឹងថយចុះប្រហែល ៩% បើក្មេងគេងបានគ្រប់គ្រាន់។
– គេងជួយភ្ញោចប្រព័ន្ធការពារ៖ ការផលិតសារធាតុស៊ីតូគីន (សារធាតុកោសិកាប ញ្ចេញប្រាប់ជាសញ្ញា ធ្វើឲ្យខ្លួនយើងឆ្លើយតបជាមួយការរលាក និងស្រ្តេស) គឺកើនឡើងទៅតាមចំនួនម៉ោងយើងគេង។ គេពន្យល់ថា នេះជាមូលហេតុយើងតែងតែមានអារម្មណ៍ថាងងុយគេង នៅពេលផ្ដាសាយ ឬក្ដៅខ្លួន។ គេងមិនគ្រប់គ្រាន់ នឹងធ្វើឲ្យប៉ះពាល់ដល់ចំនួនសារធាតុស៊ីតូគីន អាចបណ្ដាលឲ្យក្មេងប្រឈមមុខជាមួយជំងឺជាច្រើន។
២- រយៈពេលគេងត្រឹមត្រូវតាមវ័យក្មេងៗ
– ទារក អាយុចន្លោះពី ៤ -១២ ខែ៖ គេងឲ្យបាន ១២-១៦ ម៉ោង
– កូនក្មេង អាយុចន្លោះពី ១-២ ឆ្នាំ៖ គេងឲ្យបាន ១១-១៤ ម៉ោង
– ក្មេងមត្តេយ្យ អាយុចន្លោះពី ៣-៥ ឆ្នាំ៖ គេងឲ្យបាន ១០-១៣ ម៉ោង
– ក្មេងថ្នាក់បឋម អាយុចន្លោះពី ៦-១២ ឆ្នាំ)៖ គេងឲ្យបាន ៩-១២ ម៉ោង
– ក្មេងជំទង់ (អាយុចន្លោះពី ១៣-១៨ ឆ្នាំ)៖ គេងឲ្យបាន ៨-១០ ម៉ោង។
អត្ថបទពាក់ព័ន្ធ៖
- តិចនិកដោះស្រាយបញ្ហាកូនដេកនោមដាក់ពូក
- ប៉ាម៉ាក់ចូលចិត្តឲ្យក្មេងលេងទូរសព្ទ មុនចូលគេង ប្រយ័ត្នលើសដើម!
៣- គន្លឹះពិសេសជួយក្មេងគេងមានសុខភាពល្អ
– រៀបចំកាលវិភាគគេងឲ្យបានច្បាស់លាស់៖ វាជារឿងសំខាន់ ប៉ាម៉ាក់ ត្រូវរៀបចំម៉ោងគេងសម្រាប់កូន ដើម្បីឲ្យកូនអាចកំណត់វដ្ដនៃការគេងបានត្រឹមត្រូវ។ បែបនេះ នៅពេលខាងមុខ ប៉ាម៉ាក់ ក៏មានភាពងាយស្រួល ពេលប្រាប់កូនឲ្យចូលគេងត្រូវម៉ោង ត្រូវពេលដូចគ្នា។
– ជំរុញឲ្យគេមានសកម្មភាពច្រើននៅពេលថ្ងៃ៖ ហាត់ប្រាណ មិនត្រឹមតែជួយដល់ការលូតលាស់រូបរាង និងកម្ពស់ក្មេងមួយមុខនោះទេ វាថែមទាំងអាចជួយឲ្យកូនយើង គេងបានស្កប់នៅពេលយប់បានថែមទៀតផង។ អ្នកជំនាញបានណែនាំថា នេះដោយសារតែមានបម្រែបម្រួលសីតុណ្ហភាពក្នុងខ្លួនក្មេងនៅអំឡុងពេលធ្វើចលនា និងក្រោយពេលហាត់ប្រាណ ជាហេតុជំរុញឲ្យក្មេងងងុយគេង។
– យកគ្រឿងអេឡិចត្រូនិចចេញពីក្នុងបន្ទប់កូន៖ ការសិក្សាបានលើកឡើងថា ពន្លឺភ្លើងពណ៌ខៀវ ជះចេញពីទូរសព្ទ ឬទូរទស្សន៍ អាចរំខានដល់ការគេងរបស់ក្មេងបាន។
– ចៀសវាងអាហារប៉ះពាល់ដល់ការគេង៖ មិនត្រូវឲ្យកូនញ៉ាំអាហារមានជាតិកាហ្វេអ៊ីន ឬញ៉ាំជាតិផ្អែមមុនពេលគេគេងជាដាច់ខាត មិនថាគេងថ្ងៃ ឬគេងពេលយប់ក៏ដោយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។
Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម