កូនកណ្តុរ ឬក្រពេញទឹករងៃគឺជាក្រពេញតូចប៉ុនគ្រាប់សណ្តែក ហើយក្រពេញ​នេះមាន​ពាសពេញ​រាងកាយ​របស់មនុស្ស​យើង។ នៅពេលដែលប្រព័ន្ធការពាររាង​កាយ​ក្មេងៗមិន​អាចទប់ទល់​នឹង​ការឆ្លងមេរោគពីខាងក្រៅ កូនកណ្តុរអាចចាប់បាក់តេរី វីរុស ឬកោសិកាមិនប្រក្រតីទាំងនោះទុក ដែលជាហេតុបណ្តាល​ឱ្យ​ហើមកូនកណ្តុរ ។ តើក្មេងៗហើមកូនកណ្តុរដោយសារមូលហេតុអ្វីខ្លះ?

ជាធម្មតាកូនកណ្តុរនឹងហើមនៅជិតកន្លែងដែលមានការបង្ករោគ។ ឧទាហរណ៍ ទារកដែល​មាន​មេរោគ​លើស្បែកក្បាលអាចហើមកូនកណ្តុរនៅខាងក្រោយក។ អូនតូចដែល​ហើមកូនកណ្តុរ​នៅ​ជុំវិញ​ថ្គាមអាចជាសញ្ញានៃការឆ្លងមេរោគនៅក្នុងធ្មេញ ឬមាត់។ ក្មេងៗហើម​កូនកណ្តុរ​អាច​បណ្តាល​មក​ពី៖

• ជំងឺរលាកផ្លូវដង្ហើមផ្នែកខាងលើ ដូចជា គ្រុនផ្តាសាយ
• ការឆ្លងបាក់តេរីដូចជា រលាកបំពង់ក ឬការឆ្លងមេរោគក្នុងត្រចៀក
• ការឆ្លងវីរុសដូចជា​ ជំងឺ mononucleosis អុតស្វាយ ឬកញ្រ្ជិល
• ជំងឺកម្រមួយចំនួនដែលប៉ះពាល់ដល់ប្រព័ន្ធការពាររាងកាយ
• មហារីក តែកម្រណាស់

ចង់ស្វែងយល់ពីអត្ថន័យពណ៌ និងរូបរាងលាមកទារក ចុចទីនេះ

ជាទូទៅគ្រូពេទ្យនឹងព្យាបាលការហើមកូនកណ្តុរតាមប្រភេទជំងឺ ឬការបង្ករោគ។ កូនកណ្តុរនឹង​វិល​ត្រឡប់មកទំហំធម្មតាវិញ បន្ទាប់ពីជាពីជំងឺ ឬការបង្ក​រោគណាមួយ។ យ៉ាងណាមិញ​គ្រូពេទ្យនឹង​ធ្វើ​ការ​ពិនិត្យឱ្យអូនតូចបន្ថែម​ទៀត ប្រសិនបើ៖

• កូនកណ្តុរហើមធំជាង ២,៥ សង់ទីម៉ែត្រ
• បន្ទាប់ពីការព្យាបាលហើយ អូនតូចនៅតែហើមកូនកណ្តុរ
• កូនកណ្តុរដែលហើមឡើងរឹង គ្មានការឈឺចាប់ និងស្ថិតជាប់នៅមួយកន្លែង
• ស្រកទម្ងន់ដោយគ្មានមូលហេតុ ឬបែកញើសពេលយប់
• ហើមកូនកណ្តុរពេញរាងកាយ

ប្រសិនបើអូនតូចមានរបួស ប៉ាម៉ាក់អាចការពារអូនតូចមិនឱ្យហើម​កូនកណ្តុរដោយ​សម្អាតរបួស​របស់​អូនតូចឱ្យបានត្រឹមត្រូវ និងត្រូវឱ្យអូនតូច​ញុំា​ថ្នាំ​ផ្សះតាម​វេជ្ជបញ្ជា​ ប្រសិនបើរបួសនោះធ្ងន់ធ្ងរ និងមានការអនុញ្ញាតិពីគ្រូពេទ្យ។