ស្ដាប់ទៅកខ្វក់បន្តិចមែន តែអាចម៍ត្រចៀកមានប្រយោជន៍មិនតិចទេ
គ្នាយើងមួយចំនួនចូលចិត្តសម្អាតអាចម៍ត្រចៀក រាល់ថ្ងៃ ដើម្បីឲ្យស្រឡះត្រចៀក និងម៉ាក់ៗខ្លះក៏ចូលចិត្តត្បារអាចម៍ត្រចៀកកូនតូចដែរ នេះមានន័យថា មិនទាន់ស្គាល់ពីអត្ថប្រយោជន៍នៃអាចម៍ត្រចៀក និងហានិភ័យដែលអាចកើតឡើងបាននៅឡើយទេ។ ទាក់ទងនឹងបញ្ហានេះ លោកវេជ្ជបណ្ឌិត ហ៊ាង រតនា ឯកទេសជំងឺទូទៅ និងកុមារ បានឲ្យដឹងថា ជំងឺរលាកត្រចៀកក្នុង (អំបៅអំបែក) ស្ទើរតែ ៩០% ដែលកើតឡើងលើក្មេង គឺដោយសារកំហុសឆ្គងឪពុកម្ដាយចូលចិត្តត្បារត្រចៀកកូនផ្ដេសផ្ដាស និងប្រើរបស់លូកចូលត្រចៀកគ្មានអនាម័យ។ ការដែលឧស្សាហ៍ខ្វេះយកអាចម៍ត្រចៀកក៏អាចធ្វើឲ្យមនុស្សធំកើតអំបៅអំបែក ឬរលាកត្រចៀកក៏មាន។ គណនា BMI គណនា BMR កម្មវិធីពិនិត្យជំងឺបម្រុងទឹកនោមផ្អែមអនឡាញ កម្មវិធីពិនិត្យបញ្ហាលិង្គមិនឡើងរឹងអនឡាញ លោកបន្ថែមថា អាចម៍ត្រចៀកមានតួនាទី និងផលប្រយោជន៍ច្រើនយ៉ាងដូចជា៖ ១. អាចម៍ត្រចៀកជួយសម្ងួតសំណើមក្នុងត្រចៀក ដែលសំណើមនេះជាកត្តាធ្វើឲ្យត្រចៀកងាយរលាក និងបង្ករោគដោយពពួកបាក់តេរី វីរុស និងផ្សិត ព្រោះពពួកមេរោគទាំងនេះចូលចិត្តកន្លែងសើមៗ។ ២. ការពារសត្វល្អិតចូលក្នុងត្រចៀក ព្រោះសត្វល្អិតទាំងនោះមិនចូលចិត្តក្លិន និងរសជាតិដ៏ល្វីងរបស់អាចម៍ត្រចៀកទេ។ ៣. អាចម៍ត្រចៀកជារនាំងជួយការពារពីសំឡេងខ្លាំងដែលអាចបណ្ដាលឲ្យខូចក្រដាសត្រចៀកបានផងដែរ។ ហេតុនេះហើយ ទើបវេជ្ជបណ្ឌិតខាងលើណែនាំមិនឲ្យយើងត្បារយកអាចម៍ត្រចៀកចេញនោះទេ ព្រោះវាមានគុណប្រយោជន៍ច្រើន ហើយណាមួយបើយើងខ្វារមិនបានត្រឹមត្រូវ នោះវាកាន់តែរុញអាចម៍ត្រចៀកចូលជ្រៅទៅក្នុងត្រចៀក អាចប៉ះពាល់ដល់ក្រដាសត្រចៀក។ ជាចុងក្រោយ លោកបន្តថា អាចម៍ត្រចៀកនឹងធ្លាក់ចេញមកក្រៅដោយឯកឯង នៅពេលដែលវាដល់កំណត់មួយ តែយើងអាចត្បារចេញបាន ប្រសិនបើវាមានច្រើនពេករហូតដល់រំខានក្នុងការស្ដាប់។ ទន្ទឹមនឹងនេះ យើងក៏ត្រូវដឹងដែរថា ផលវិបាកនៃជំងឺរលាកត្រចៀកក្នុង គឺអាចធ្វើឲ្យទៅជាថ្លង់បាន ដូច្នេះគួរទៅជួបគ្រូពេទ្យជំនាញ ក្នុងករណីចាប់អារម្មណ៍ថាមានភាពមិនប្រក្រតីកើតឡើងលើត្រចៀក។ អានបន្ថែម៖ ចេះតែរមាស់ត្រចៀកមិនបាត់ អាចឆ្លងរោគផ្សិតត្រចៀក តិចនិកងាយៗ […]
ពិនិត្យដោយ វេជ្ជ. ចាន់ ស៊ីណេត • Mar 15, 2022
