នៅពេលអាកាសធាតុប្រែប្រួល ធ្លាក់ភ្លៀងញឹកញាប់ វាអាចធ្វើឲ្យសុខភាពយើងប្រឈមនឹងការកើតជំងឺផ្ដាសាយ ឬមានអារម្មណ៍ថារងាៗ។ ចំពោះម៉ាក់ៗពពោះ កាន់តែត្រូវមើលថែសុខភាពឲ្យបានល្អ បើមិនប្រយ័ត្នអាចឈឺជំងឺផ្សេងៗ ប៉ះពាល់ដល់កូន។

ទាក់ទងនឹងការថែទាំសុខភាពពេលរដូវភ្លៀងធ្លាក់ លោកវេជ្ជបណ្ឌិត ឃួន សុវណ្ណារិទ្ធ ជំនាញផ្នែកសម្ភព និងរោគស្ត្រី បានពន្យល់ឲ្យដឹងថា ជាធម្មតា នៅក្នុងរដូវភ្លៀងធ្លាក់ មានកន្លែងសើមច្រើនដែលធ្វើឲ្យប្រឈមនឹងការដួល អ៊ីចឹងហើយ ពេលម៉ាក់ៗដើរទៅណាមកណា ត្រូវចេះប្រយ័ត្នកុំឲ្យដួលអុកគូទ ព្រោះអាចប៉ះទង្គិចដល់កូន។ ដូចគ្នានេះដែរ ចំណីអាហារដែលស្ត្រីពពោះគួរញ៉ាំវិញ គឺជាប្រភេទអាហារដែលជួយពង្រឹងដល់ប្រព័ន្ធភាពស៊ាំរបស់ម៉ាក់ៗដូចជា បន្លែ ផ្លែឈើ ស៊ុបក្ដៅៗ ទឹកខ្ញី និងអាហារដែលសម្បូរទៅដោយវីតាមីនផ្សេងៗជាច្រើនទៀត។

គណនាថ្ងៃសម្រាលកូន

គណនាទម្ងន់ស្ត្រីអំឡុងពពោះ

“ជាទូទៅ ពេលមេឃធ្លាក់ខ្យល់ ធ្លាក់ភ្លៀង ស្ត្រីពពោះច្រើនតែកើតផ្ដាសាយតូច ឬផ្ដាសាយធំ ប៉ុន្តែម៉ាក់ៗត្រូវចេះបង្ការជំងឺនេះដោយខ្លួនឯងផង និងដោយការចាក់វ៉ាក់សាំងជំងឺផ្ដាសាយអំឡុងពេលពពោះផង។”

វេជ្ជបណ្ឌិតរូបនេះបានបន្ថែមថា ជំងឺដែលស្ត្រីពពោះគួរចៀសឲ្យផុតខ្លាំងមែនទែននោះគឺ ជំងឺគ្រុនឈាម។ កាលណាម្ដាយកើតជំងឺគ្រុនឈាមហើយ វាអាចបង្កជាហានិភ័យដល់សុខភាពខ្ពស់ដូចជា៖

– គំរាមរលូត

– កូនកើតមិនគ្រប់ខែ

– ហូរឈាមក្នុងពោះ

– កូនស្លាប់

– គ្រាប់ឈាមប្លាកែតចុះទាប។ល។

ប្រសិនបើម៉ាក់ៗពពោះ ខ្លាចមូសខាំ ហើយបែរជាទៅប្រើថ្នាំ ឡេ ឬគ្រីមលាបការពារកុំឲ្យមូសខាំវិញ ត្រូវបញ្ឈប់ភ្លាម ព្រោះពពួកផលិតផលអស់នោះ មិនល្អប៉ុន្មានទេសម្រាប់ស្ត្រីមានផ្ទៃពោះ។

លោកវេជ្ជបណ្ឌិតបានណែនាំថា យកល្អ នៅក្នុងរដូវមានភ្លៀងធ្លាក់ខ្លាំង ម៉ាក់ៗពពោះគួរគេងនៅក្នុងមុង ឬស្លៀកពាក់ឲ្យបានជិត ពាក់ស្រោមជើង ស្រោមដៃ បើសិនរងា។ មួយវិញទៀត បើសិនជាអាកាសធាតុត្រជាក់ហើយនោះ មិនគួរបើកម៉ាស៊ីនត្រជាក់ខ្លាំងៗឲ្យកាន់តែត្រជាក់លើសដើមទេ ហើយម៉ាក់ៗក៏មិនគួរគេងនៅក្រោមកង្ហារយូរពេកដែរ ក៏ដូចជាត្រូវធ្វើអនាម័យខ្លួនប្រាណឲ្យបានស្អាតគ្រប់កន្លែងទើបល្អ។

អត្ថបទគួរអាន៖

ភ្លៀងនោះភ្លៀង! ម៉ាក់ៗពពោះគួរថែទាំសុខភាពបែប​ណា ទើបចៀសពីជំងឺផ្សេងៗ

ភ្លៀងនោះភ្លៀង! ម៉ាក់ៗពពោះគួរថែទាំសុខភាពបែបណា ទើបចៀសពីជំងឺផ្សេងៗ