ការសម្រាលកូនដោយវះកាត់អាចមកពីមូលហេតុសុខភាពម្ដាយ ឬសុខភាពរបស់កូននៅក្នុងផ្ទៃ ដែលគ្រូពេទ្យវាយតម្លៃថាត្រូវធ្វើការវះកាត់ដើម្បីសុវត្ថិភាពអ្នកទាំងពីរ។ ក្រៅពីនេះ ការសិក្សាមួយធ្វើធ្វើឡើងក្នុងរាជធានីភ្នំពេញកាលពីឆ្នាំ២០១៥ និងចេញផ្សាយនៅឆ្នាំ២០១៦ លើស្រ្តីចំនួន១៤៣នាក់ដែលបានសម្រាលកូនដោយវះកាត់ បានរកឃើញថាអ្នកទាំងនោះភាគច្រើនបានសុំគ្រូពេទ្យសម្រាលដោយវះកាត់។
បើតាមការសិក្សាខាងលើ ក៏ដូចជាការបញ្ជាក់របស់គ្រូពេទ្យ យ៉ាងហោចណាស់មានហេតុផលបួនយ៉ាងសំខាន់ដែលស្រ្តីសម្រេចចិត្ត ឬតម្រូវឲ្យទទួលការសម្រាលកូនដោយវះកាត់។
ទាក់ទងនឹងកាយសម្បទាម្ដាយនេះ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រីនៃមន្ទីរពេទ្យមិត្តភាពកម្ពុជា-ចិន សែនសុខ លើកឡើងថា បើសិនជាម្ដាយមានទំហំអាងត្រគាកតូចជាងក្បាលរបស់កូន គឺមិនអាចសម្រាលដោយធម្មជាតិបានទេ គឺពេទ្យអាចតម្រូវឲ្យម្ដាយវះកាត់ដើម្បីសម្រាល។
លោកបន្តថា កាលណាទំហំក្បាលកូនមិនសមាមាត្រទៅនឹងអាងត្រគាករបស់ម្ដាយ នោះកូនមិនអាចសម្រាលតាមធម្មជាតិបានទេ ហើយអាចគ្រោះថ្នាក់ដល់កូនផងដែរ បើសិនជាមិនធ្វើការវះកាត់ដើម្បីសម្រាល។
ចង់គណនាទម្ងន់ស្រ្តីពពោះ ចុចទីនេះ!
ទាក់ទងនឹងសុខភាពកូនវិញ លោក វេជ្ជបណ្ឌិត ចាន់ ស៊ីណេត លើកឡើងថា ជាការសំដៅដល់បញ្ហាសុករុំកកូនច្រើនជុំ កូនបញ្ច្រាស (គូទមកមុន កូនទទឹង ឬជើងកូនមកមុន) ឬសុខភាពកូនក្នុងផ្ទៃខ្សោយ ដោយសារម្ដាយឈឺពោះយូរពេក មានបញ្ហាបែកទឹកភ្លោះ ហើយស្បូនមិនបើកជាដើម។ ក្នុងករណីទាំងនោះ លោកវេជ្ជបណ្ឌិត ថាគ្រូពេទ្យនឹងណែនាំឲ្យម្ដាយសម្រាលដោយវះកាត់ ដើម្បីសុវត្ថិភាពទាំងម្ដាយ និងកូន។
ស្រ្តីពពោះមួយចំនួនអាចជួបបញ្ហាទឹកភ្លោះតិច ឬបែកទឹកភ្លោះមុនកំណត់ ដែលជាហេតុនាំឲ្យគ្រូពេទ្យណែនាំឲ្យម៉ាក់ៗសម្រាលដោយវះកាត់ដែរ។ លោក វេជ្ជបណ្ឌិត ចាន់ ស៊ីណេត លើកឡើងថា ម៉ាក់ៗអាចដឹងថាមានទឹកភ្លោះតិចតាមរយៈការឆ្លុះអេកូ ហើយការមានទឹកភ្លោះតិចនេះធ្វើឲ្យកូនពិបាកធ្វើចលនា និងពិបាកសម្រាលតាមធម្មជាតិ។
មួយវិញទៀត ការបែកទឹកភ្លោះមុនពេលស្បូនបើកពេញលេញ ក៏ជាជាកត្តានាំឲ្យគ្រូពេទ្យណែនាំឲ្យម៉ាក់ៗសម្រាលដោយវះកាត់ដូចគ្នា។ លោក វេជ្ជបណ្ឌិត ឲ្យដឹងថាការបែកទឹកភ្លោះនេះ អាចធ្វើឲ្យកូនខ្សោយ មិនអាចធ្វើចលនាបាន ហើយបើមិនវះកាត់ទាន់ពេលទេ អាចគ្រោះថ្នាក់ដល់កូនក្នុងផ្ទៃ។
ម៉ាក់ៗមួយចំនួនមានជំនឿលើថ្ងៃកើតរបស់កូន ថាជាថ្ងៃសំណាង ដែលនាំឲ្យមានការសម្រេចរៀបផែនការវះកាត់សម្រាលកូនទៅតាមថ្ងៃដែលខ្លួនចង់បាន ក្រោយពីកូនគ្រប់ខែ។ ការសិក្សាមួយចេញផ្សាយកាលពីឆ្នាំ២០១៦ ទាក់ទងនឹងស្រ្តីជ្រើសរើសការសម្រាលកូនដោយវះកាត់នៅភ្នំពេញបានរកឃើញថា ក្នុងចំណោមហេតុជាច្រើន ក្រៅពីហេតុផលបញ្ហាសុខភាព ការជ្រើសរើសថ្ងៃល្អ ឬថ្ងៃមានហុងស៊ុយល្អ ក៏ជាហេតុផលមួយដែលម្ដាយសម្រេចរៀបផែនការសម្រាលដោយវះកាត់ដែរ។ ហេតុផលផ្សេងទៀត មានដូចជាស្រ្តីជាម្ដាយខ្លាចខូចទ្រង់ទ្រាយទ្វារមាស និងឈឺចាប់ពេលសម្រាលដោយធម្មជាតិជាដើម។
បើនិយាយពីការសម្រាលដោយវះកាត់មន្ទីរពេទ្យកាលម៉ែតបានផ្សាយលើវិបសាយរបស់ខ្លួនថាក្នុងមួយឆ្នាំផ្នែកសម្ភពរបស់មន្ទីរពេទ្យនេះបានទទួលសម្រាលកូនឲ្យស្រ្តីចំនួន១មឺននាក់ ក្នុងចំណោមនោះមាន២ ៧០០នាក់ត្រូវសម្រាលដោយវះកាត់ ឬស្មើ២៧ភាគរយ។ ដូចគ្នាដែរ នៅចក្រភពអង់គ្លេស ស្រ្តីមានផ្ទៃពោះម្នាក់ ក្នុងចំណោមបួននាក់បានសម្រាលកូនដោយវះកាត់ ដោយផ្អែកតាមហេតុផលផ្សេងៗគ្នា។
យ៉ាងណាក៏ដោយ លោក វេជ្ជ បណ្ឌិត ចាន់ ស៊ីណេត ប្រធានផ្នែកសម្ភព និងរោគស្រ្តី របស់មន្ទីរពេទ្យបង្អែកមិត្តភាពកម្ពុជា-ចិន សែនសុខ ថាជាទូទៅគ្រូពេទ្យតែងណែនាំឲ្យស្រ្តីសម្រាលកូនតាមធម្មជាតិ លើកលែងតែក្នុងករណីការសម្រាលតាមធម្មជាតិអាចបង្កគ្រោះថ្នាក់ដល់ម្ដាយ ឬកូន ឬទាំងពីរនាក់ ទើបគ្រូពេទ្យតម្រូវឲ្យសម្រាលដោយវះកាត់។
អត្ថបទគួរអាន៖
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Maternity, https://www.calmette.gov.kh/patient-care/clinics-and-services/gynecology-maternity-neonatology/maternity/
Cephalopelvic Disproportion (CPD), https://americanpregnancy.org/healthy-pregnancy/labor-and-birth/cephalopelvic-disproportion/
Factors associated with caesarean sections in Phnom Penh, Cambodia, https://pubmed.ncbi.nlm.nih.gov/28024672/
Caesarean section, https://www.nhs.uk/conditions/caesarean-section/
កំណែប្រែបច្ចុប្បន្ន
10/09/2024
អត្ថបទដោយ ទូច សុខា
ត្រួតពិនិត្យដោយ វេជ្ជ. ចាន់ ស៊ីណេត
បច្ចុប្បន្នភាពដោយ៖ Editor HK
ត្រួតពិនិត្យដោយ
វេជ្ជ. ចាន់ ស៊ីណេត
ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម
