ហេតុអ្វីស្រ្តីមានផ្ទៃពោះ ចេះតែយល់សប្ដិឃើញរឿងមិនល្អច្រើន?

យល់សប្តិ តែងកើតមានជាធម្មតាសម្រាប់មនុស្សយើងនៅពេលគេងលង់លក់ ហើយការយល់សប្តិក៏អាចចាត់ទុកថាជាផ្នែកមួយនៃដំណេកល្អរបស់មនុស្សយើងដែរ។ ប៉ុន្តែ សម្រាប់ស្រ្តីមានផ្ទៃពោះ អាចខុសប្លែកបន្តិចរឿងយល់សប្ដិនេះ ដោយអាចឧស្សាហ៍មានសុបិនអាក្រក់ ឬយល់សប្តិឃើញស្ដែងៗពីអ្វីមួយញឹកជាងធម្មតា កាលមុនមានផ្ទៃពោះ។

ខាងក្រោមនេះជាការប្រែប្រួលផ្នែកយល់សប្តិមួយចំនួនដែលស្រ្តីមានផ្ទៃពោះអាចជួបប្រទះ៖

១. យល់សប្ដិប្លែកៗច្រើន

មនុស្សទូទៅមានការយល់សប្ដិប្លែកៗពេលគេងលង់លក់ ដែលការយល់សប្ដិទាំងនោះមានដូចជាការយល់សប្ដិបែបមានមហិទ្ធិឫទ្ធិ ក្ដុកក្ដួលអារម្មណ៍ខ្លាំង ហើយមានរូបភាពច្បាស់ៗជាដើម។ អ្វីក្នុងយល់សប្ដិទាំងនេះ គឺហាក់ដូចជាការពិតជាក់ស្ដែងអ៊ីចឹងដែរ។

ទោះបីជាសុបិនប្លែកៗបែបនេះអាចកើតមានលើមនុស្សគ្រប់គ្រប់គ្នា តែសម្រាប់ស្រ្តីមានផ្ទៃពោះ សុបិនបែបនេះអាចកើតមានច្រើនដងជាង។ ខុសពីរូបភាពបែបស្រមើស្រមៃ ដែលពិបាកដាក់បញ្ចូលគ្នាឲ្យទៅជារឿងអ្វីមួយបាន ការយល់សប្ដិរបស់ស្រ្តីមានផ្ទៃពោះហាត់ដូចជាជីវិតពិតអ៊ីចឹងដែរ។ ស្រ្តីមានផ្ទៃពោះមួយចំនួនអាចភ្ញាក់ពីដំណេក ដោយសារតែការយល់សប្ដិនោះ និងអាចគិតថាតើវាជារឿងពិត ឬជាការយល់សប្ដិទៀតផង។

គណនាថ្ងៃសម្រាលកូន

គណនាទម្ងន់ស្ត្រីអំឡុងពពោះ

២. ឧស្សាហ៍យល់សប្ដិ

ស្រ្តីមានផ្ទៃពោះមួយចំនួនជឿថាខ្លួនយល់សប្តិច្រើនជាងធម្មតាពេលកំពុងមានផ្ទៃពោះ។ វាអាចដែរថាស្រ្តីមានផ្ទៃពោះអាចយល់សប្ដិច្រើនពេលគេងយប់ ឬកើនលើសនេះទៅទៀតនៅពេលគេងថ្ងៃថែមទៀត។ ការមានផ្ទៃពោះ អាចធ្វើឲ្យស្រីៗយើងអង់កម្លាំង ហើយពេលណាយើងគេងសម្រាកច្រើន យើងក៏អាចនឹងយល់សប្ដិច្រើនដូចគ្នា។

៣. យល់សប្ដិឃើញកូន

វាមិនចម្លែកទេនៅពេលដែលយើងដឹងថានឹងមានសមាជិកថ្មីចូលមកនៅក្នុងគ្រួសារ ដែលនេះជាពេលមួយដែលស្រ្តីសប្បាយចិត្ត និងរំភើបបំផុតមួយ។ ការសប្បាយចិត្ត និងរំភើបនេះ គឺជារឿងធម្មជាតិ និងធម្មតាមួយនាំឲ្យស្រីៗយើងយល់សប្តិឃើញខ្លួនឯង និងកូន។

ដូចគ្នាដែរ យើងពពោះកូនរាល់ថ្ងៃ គិតពីកូនរាល់ថ្ងៃ នោះពិតណាស់ថាពេលខ្លះនឹងយល់សប្ដិឃើញថាកូនបានកើត ឬយើងបានកាន់ឱបកូនក្នុងដៃជាដើម។ ស្រ្តីមួយចំនួនទៀត យល់សប្ដិឃើញទាំងបានដាក់ឈ្មោះឲ្យកូន និយាយជាមួយកូន និងដឹងពីភេទរបស់កូនក៏មាន។

យល់សប្ដិពពោះ

៤. យល់សប្ដិអាក្រក់

ទន្ទឹមនឹងការយល់សប្ដិឃើញពីភាពរំភើបរីករាយ ក្នុងអំឡុងពេលមានផ្ទៃពោះ ក៏មានដែរស្រ្តីមានផ្ទៃពោះអាចយល់សប្ដិអាក្រក់។

ការសិក្សាមួយធ្វើឡើងនៅឆ្នាំ២០១៦ បានសម្គាល់ថាស្រ្តីមានផ្ទៃពោះយល់សប្ដិអាក្រក់ មិនមែនជារឿងធម្មតានោះទេ ដោយថាការយល់សប្ដិអាក្រក់នេះអាចមកពីមានការភ្ញោចខាងផ្លូវអារម្មណ៍។ ការយល់សប្ដិអាក្រក់នេះ អាចមកពីស្រ្តីមានផ្ទៃពោះមានអារម្មណ៍ថប់បារម្ភពីរឿងសម្រាល ឬបារម្ភពីរឿងដែលអាចកើតមានលើកូន។

ការយល់សប្ដិមិនល្អនេះ អាចមានទម្រង់ផ្សេងៗគ្នា។ ស្រ្តីមានផ្ទៃពោះ អាចយល់ឃើញដូចជាធ្លាក់កូនពីដៃ ឬវង្វេងកូន ឬអ្នកធ្លាប់មានប្រវត្តិរលូតកូន អាចនឹងយល់សប្ដិឃើញការរលូតកូនជាថ្មី ជាដើម។

ហេតុអ្វីស្រ្តីមានផ្ទៃពោះសុបិនប្រែប្រួល?

ការប្រែប្រួលនៃសុបិនអំឡុងពេលមានផ្ទៃពោះអាចពន្យល់បានថាមកពីការប្រែប្រួលកម្រិតអ័រម៉ូន ដែលជាកត្តាធំបំផុតមួយនៃការប្រែប្រួលនេះ។

អ័រម៉ូនឡើងចុះ អំឡុងពេលពពោះ អាចមានឥទ្ធិពលខ្លាំងក្លាលើរាងកាយស្រ្តីយើង។ ដោយសារតែអ័រម៉ូនប្រែប្រួលនេះហើយ បានជាធ្វើឲ្យស្រីៗយើងមានអារម្មណ៍ប្រែប្រួលដែរ។ ការប្រែប្រួលអ័រម៉ូនអាចធ្វើឲ្យអារម្មណ៍ប្រែប្រួលខ្លាំង នាំឲ្យយើងមានការយល់សប្ដិកាន់តែច្រើនដែរ។

បន្ថែមពីនេះ ការប្រែប្រួលអ័រម៉ូនពេលពពោះ ក៏អាចធ្វើឲ្យមានអារម្មណ៍អស់កម្លាំងកាន់តែខ្លាំង មានន័យថាស្រ្តីពពោះត្រូវការគេងកាន់តែច្រើន ដែលនាំឲ្យមានការយល់សប្ដិច្រើនដែរ។

តិចនិកគេងសម្រាប់ស្ត្រីមានផ្ទៃពោះ

កុំផឹកទឹកច្រើនពេកមុនពេលចូលគេង ដើម្បីកុំឲ្យត្រូវឡើងចូលបន្ទប់ទឹកញឹកញាប់
បន្ទប់គេងត្រូវងងឹត មានសីតុណ្ហភាពសមស្រប និងស្ងាត់ល្អ
បិទទូរទស្សន៍ និងទុកទូរសព្ទឲ្យឆ្ងាយពីខ្លួន
គេងថ្ងៃជារឿងល្អ តែកុំគេងយូរពេក អាចនាំឲ្យរំខានដល់ការគេងពេលយប់
អាចអានសៀវភៅ ឬស្ថាប់ភ្លេងមុនចូលគេង។

អត្ថបទគួរអាន៖

ត្រួតពិនិត្យដោយ គ្រូពេទ្យឯកទេស.វេជ្ជ. ចាន់ ស៊ីណេតឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ទូច សុខា · កែ 04/04/2023

ហេតុអ្វីស្រ្តីមាន​ផ្ទៃពោះ ចេះតែយល់សប្ដិឃើញរឿង​មិនល្អច្រើន?

១. យល់​សប្ដិ​ប្លែកៗ​ច្រើន​

២. ឧស្សាហ៍​យល់សប្ដិ

៣. យល់សប្ដិ​ឃើញ​កូន​

៤. យល់សប្ដិ​អាក្រក់​

ហេតុ​អ្វី​ស្រ្តី​មាន​ផ្ទៃពោះ​សុបិន​ប្រែ​ប្រួល​?

តិចនិក​គេង​សម្រាប់​ស្ត្រី​មាន​ផ្ទៃពោះ