ស្រីៗយើងបានធ្វើរឿងដ៏អស្ចារ្យបំផុតក្នុងជីវិត ក្រោយផ្តល់កំណើតអូនតូចគួរឲ្យស្រលាញ់ម្នាក់។ ក្លាយជាម៉ាក់ថ្មីថ្មោង ច្បាស់ជាត្រូវទទួលអម្រែកធ្ងន់បន្តិចហើយ។ យ៉ាងណាកុំគិតតែពីគ្រួសារ ស្រីៗគ្នាយើងក៏គួរគិតខ្លួនឯងដូចគ្នាដែរ។

“Hello គ្រូពេទ្យ” ចង់ណែនាំទម្លាប់ ៥ យ៉ាង មិនគួរបោះបង់ បើទោះក្លាយជាម្តាយគេក្តី។

១- មានពេលបន្ធូរអារម្មណ៍

ក្រោយក្លាយជាម៉ាក់ៗថ្មីថ្មោង ស្រីៗគ្នាយើងស្ទើរទាំងអស់ នឹងចំណាយពេលមើលថែកូន ដូចជា បំបៅដោះ ឬប្ដូរខោទឹកនោម ជាការងារធ្វើឲ្យយើងរវល់គ្មានថ្ងៃលស់។ យ៉ាងណា គ្នាយើងគួរមានពេលមើលថែខ្លួនឯង ដូចជា ឆ្លៀតសម្រាកឲ្យបាន ១៥-៣០ នាទី ក៏អាចជួយបន្ធូរអារម្មណ៍តានតឹងបានខ្លះដែរ។ បើបារម្ភខ្លាចអាអូនភ្ញាក់ពេលសម្រាក អាចសុំបងប្អូន ឬប្តីជួយមើលបន្តិចក៏បាន។

២- កុំចោលសម្លៀកបំពាក់ចង្អៀតៗ

មានផ្ទៃពោះ ធ្វើឲ្យរាងកាយគ្នាយើងរីកធំ ត្រូវការសម្លៀកបំពាក់ថ្មីរលុងៗ តែក្រោយសម្រាលរួច ត្រូវការពេលដើម្បីរាងត្រលប់មកសភាពដើមវិញ។ អ៊ីចឹងហើយកុំបោះចោលសម្លៀកបំពាក់ចង្អៀតៗនោះអី។ យកល្អ ហាត់ប្រាណ ញ៉ាំអាហារបែបសុខភាព អាចជួយឲ្យរាងកាយរឹងមាំ ព្រមទាំងមានរាងស្អាត។ ពេលរាងស្គមវិញអាចប្រើខោអាវទាំងនោះបានហើយ។

ចង់គណនាថ្ងៃមេជីវិតញីទុំធ្លាក់ ចុចទីនេះ !

ចង់គណនាថ្ងៃសម្រាលកូន ចុចទីនេះ !

ចង់គណនាទម្ងន់ស្រ្តីពពោះ ចុចទីនេះ !

ចង់ដឹងអត្ថន័យពណ៌ និងរូបរាងលាមកទារក ចុចទីនេះ !

ហាត់ប្រាណក្រោយសម្រាល

៣- ថែស្បែក

ស្រីៗគ្នាយើងពេលមានផ្ទៃពោះ អ័រម៉ូនក្នុងរាងកាយប្រែប្រួលខ្លាំង និងជះឥទ្ធិពលដល់ស្បែក។ គ្នាយើងខ្លះអាចនឹងមានស្បែកកាន់តែស្អាតភ្លឺរលោង ប៉ុន្តែខ្លះទៀតបែរជាឡើងមុនក៏មាន។ ផលិតផលថែរក្សាស្បែកអាចមានជាតិគីមី ធ្វើឲ្យយើងបារម្ភប៉ះពាល់កូនក្នុងផ្ទៃ មិនហ៊ានប្រើប្រាស់អំឡុងពេលពពោះ។ ប៉ុន្ដែក្រោយសម្រាលរួច ស្រីៗគ្នាយើងគួរចាប់ផ្ដើមថែរក្សាស្បែកជារៀងរាល់ថ្ងៃដើម្បីសម្រស់ស្អាតឡើងវិញ។

៤- ស្រឡាញ់ខ្លួនឯងឲ្យបានច្រើន

ស្រលាញ់ខ្លួនឯងឲ្យបានច្រើន មុនស្រលាញ់អ្នកដទៃ ជាសភាវគតិរបស់មនុស្ស ទោះក្នុងករណីមានអូនៗក៏ដោយ។ កុំព្យាយាមធ្វើជាម៉ាក់ៗល្អឥតខ្ចោះ និងចូលចិត្តបន្ទោសខ្លួនឯងនោះ។ ពេលអូនៗយំ កុំដាក់អារម្មណ៍អាណិតខ្លាំងពេក ព្រោះក្មេងណាក៏យំដូចគ្នា។ ករណីមួយចំនួនទៀត អារម្មណ៍គ្នាយើងមានសម្ពាធ និងមានជំងឺបាក់ទឹកចិត្តក្រោយសម្រាលកូនរួច ដោយសារយើងបាត់បង់នូវគោលដៅជីវិត។ អ៊ីចឹងហើយ យើងគួរនិយាយពីបញ្ហាកំពុងប្រឈមទៅគ្រួសារ ប្ដី ឬមិត្តជិតស្និទ្ធ។

៥- ហាមលាក់បាំងកង្វល់ម្នាក់ឯង

គ្នាយើងមួយចំនួនកើតជំងឺបាក់ទឹកចិត្តក្រោយសម្រាលអាអូន ដោយសារមិនបើកចិត្តឲ្យទូលាយជាមួយប្តី។ យ៉ាងណា ប្តីយើងក៏មានកាត្វកិច្ចមើលថែទាំអូនៗដូចគ្នា ដូច្នេះបើត្រូវការជំនួយ គួរតែនិយាយជាមួយប្តីយើង ពេលខ្លះប៉ាវាក៏មិនដឹងធ្វើម៉េច ឬជួយដោយរបៀបណាដែរ។ លើសពីនេះ កុំមានអារម្មណ៍ភ័យខ្លាច ឬខឹង ពេលប្តីបង្កកំហុស ព្រោះសុទ្ធតែជាម៉ាក់ប៉ាថ្មីថ្មោងអត់បទពិសោធន៍ដូចគ្នា។

ចំណុចសំខាន់

ទម្លាប់អ្វីខ្លះ ដែលស្រីៗយើងមិនគួរបោះបង់ ទោះក្លាយជាម៉ាក់ៗក្តី៖

មានពេលបន្ធូរអារម្មណ៍
កុំចោលសម្លៀកបំពាក់ចង្អៀតៗ
ថែស្បែក
ស្រឡាញ់ខ្លួនឯងឲ្យបានច្រើន
ហាមលាក់បាំងកង្វល់ម្នាក់ឯង

អត្ថបទគួរអាន៖

រឿង ៥ យ៉ាង ស្រីៗមិន​គួរ​បោះបង់ចោលឡើយ ទោះ​ក្លាយ​ជា​ម៉ាក់គេ​ក៏ដោយ