មានម៉ាក់ៗជាច្រើននៅធ្វើតាមចាស់បុរាណដែលមិនព្រមធ្វើចលនា ក្រោកឈរ អង្គុយ ឬធ្វើអ្វីសោះ ព្រោះខ្លាចចាស់ទៅចុករួយដៃជើង ឬខ្លាចជួបបញ្ហាទាស់សរសៃព្រោះលើករបស់ធ្ងន់។
ម៉ាក់ៗក្រោយសម្រាលមិនធ្វើអ្វីសោះ ពិតជាល្អចំពោះសុខភាពដូចចាស់ៗថាមែនអត់?
លោកវេជ្ជបណ្ឌិត ចាន់ ស៊ីណេត បានឲ្យដឹងថា ស្ត្រីដែលសម្រាលកូនដោយធម្មជាតិ ក្រោយ ៦-៨ ម៉ោង ពេទ្យតម្រូវឲ្យចុះពីលើគ្រែដើរតិចៗ ហើយសម្រាប់អ្នកវះកាត់វិញ គឺ ២៤ ម៉ោងក្រោយបន្ទាប់ពីដកទុយយោសុងទឹកនោម ពេទ្យក៏នឹងឲ្យងើបដើរឲ្យបានច្រើន។ លោកបន្តថា តាមបទពិសោធន៍កន្លងទៅ អ្នកមកសម្រាលមានចាស់ទុំមកជាមួយ មិនចង់ឲ្យម៉ាក់ៗក្រោកដើរ ឈរ ឡើយ តម្រូវឲ្យដេកតែមួយមុខគត់ ហើយបើមុជទឹក កក់សក់ សិតសក់ រឹតតែមិនឲ្យធ្វើទៀត ព្រោះខ្លាចទាស់ ឈឺក្បាល ដែលទាំងនោះទៅវិញទេជាដើមហេតុនៃបញ្ហាមិនស្រួលខ្លួន។
ប្រធានផ្នែកសម្ភព និងរោគស្ត្រីនៃមន្ទីរពេទ្យបង្អែកមិត្តភាពកម្ពុជា-ចិន សែនសុខ អំឡុងពេលគេងពេទ្យ ៣ យប់ ៤ ថ្ងៃ ស្រួលតាមដាន តែបើមិនដើរ ឬធ្វើចលនា ហើយឈាមមិនធ្លាក់សោះ ពេលត្រឡប់ទៅផ្ទះវិញ អាចមានបញ្ហាឈឺក្បាល ក្ដៅខ្លួន វិលមុខ ពេទ្យពិបាកធ្វើរោគវិនិច្ឆ័យ។
លោកបានបន្ថែមទៀតថា កាលណាម៉ាក់ៗឆាប់ងើបដើរ នោះមានតែឆាប់ស្រួលខ្លួនដែរ ហើយការគេងច្រើននៅមួយកន្លែង ឈាមក៏មិនងាយធ្លាក់អស់ និងសរសៃសសូងក៏មិនកម្រើក ញ៉ាំអាហារក្រៀមក្រោះ អាការៈក៏មិនងាយវិលមកដូចដើមវិញដែរ។ ទោះជាយ៉ាងណាទម្លាប់ទាំងនោះ ឥឡូវត្រូវបានកាត់បន្ថយច្រើនហើយ ដោយសារពួកគាត់ទទួលបានការអប់រំ និងមានការផ្សព្វផ្សាយច្រើន។
អត្ថបទពាក់ព័ន្ធ៖
- ទាំងនេះជាសញ្ញាឈឺពោះសម្រាលកូន ម៉ាក់ៗថ្មីថ្មោងត្រូវដឹង
- ពិតអត់ ស្រីៗសម្រាលកូនរួច ញ៉ាំក្បាលជ្រូក ផ្នែខ្នុរ ធ្វើឲ្យទាស់?
- ម៉ាក់ៗបែកទឹកភ្លោះហើយ តែមិនទាន់ឈឺពោះ អាចនាំឲ្យគ្រោះថ្នាក់
- គុណសម្បត្តិ-គុណវិបត្តិ នៃការសម្រាលកូនដោយធម្មជាតិ និងវះកាត់
- ឈឺស្បូនទ្រាំមិនបាន ចាក់ថ្នាំបំបាត់ឈឺចាប់ក្រោយសម្រាល អាចមានផលប៉ះពាល់ទេ?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕