ចម្អិនម្ហូបអាហារម្តងៗ យើងតែងប្រើគ្រឿងផ្សំជាច្រើនមុខ ដើម្បីបន្ថែមរសជាតិអាហារឲ្យកាន់តែឆ្ងាញ់ ក្នុងនោះមានគ្រឿងផ្សំ ៣ មុខ ដែលគេប្រើញឹកញាប់ជាងគេ គឺ អំបិល ស្ករ និងប៊ីចេង។ ចំពោះគ្រឿងផ្សំទាំង៣នេះ អ្នកជំនាញអះអាងថា បើយើងប្រើច្រើនពេកប៉ះពាល់ចំពោះសុខភាពខ្លាំងណាស់។
១. អំបិល
អំបិលជាគ្រឿងផ្សំដ៏ពេញនិយម ដែលសឹងគ្រប់មុខម្ហូបមិនអាចខ្វះអំបិលបានឡើយទោះតិច ឬច្រើ។ តែទោះយ៉ាងណាយើងម្នាក់ៗត្រូវកំណត់បរិមាណវាតិចជាង ៥ ក្រាម/ថ្ងៃ (១ស្លាបព្រាកាហ្វេ) ប៉ុណ្ណោះ ទើបមិនមានផលប៉ះពាល់ចំពោះសុខភាព បើតាមអង្គការសុខភាពពិភពលោក។ ញ៉ាំប្រៃជាមូលហេតុឈានទៅមានជំងឺលើសសម្ពាធឈាម គ្រោះថ្នាក់សរសៃឈាមខួរក្បាល ជំងឺបេះដូង មហារីកក្រពះ- ពោះវៀន ក្រួសតម្រងនោម និងជំងឺជាច្រើនទៀត។
អត្ថបទពាក់ព័ន្ធ៖
- មើលឲ្យហើយអ្នកចូលចិត្តញ៉ាំប្រៃ អាចមានគ្រោះថ្នាក់ធំពីរយ៉ាង
- ថៃរៀបចំពន្ធថ្មីលើអាហារកែច្នៃ អាហារកាន់តែប្រៃពន្ធកាន់តែខ្ពស់ ដោយសារ…
២. ស្ករ
អង្គការសុខភាពពិភពលោកណែនាំឱ្យមនុស្សពេញវ័យញ៉ាំជាតិស្ករសរុបតិចជាង ១០% ក្នុងចំណីអាហារសរុបប្រចាំថ្ងៃ ឯកុមារវិញតិចជាង ៥%។ “ស្ករ” ជាសារធាតុបន្ថែមក្នុងចំណីអាហារ ជួយឲ្យមានរសជាតិផ្អែម ឆ្ងាញ់ ទាក់ទាញ និងចង់ញ៉ាំ។ យ៉ាងណា បើយើងញ៉ាំជាតិស្ករច្រើនពេក នាំឲ្យមានបញ្ហាគ្រោះថ្នាក់ចំពោះសុខភាព ពិសេសទៅជាធាត់លើសទម្ងន់ ប្រឈមនឹងកើតជំងឺសរសៃឈាមបេះដូង លើសសម្ពាធឈាម ទឹកនោមផ្អែម ជំងឺបេះដូងជាដើម។
អត្ថបទពាក់ព័ន្ធ៖
- ក្រៅពីជំងឺទឹកនោមផ្អែមទេ ជំងឺបេះដូង ក៏បង្កឡើងដោយសារជាតិស្ករដែរ!
- ស្វែងយល់ពីប្រភេទស្ករ និងវិធីប្រើប្រាស់ត្រឹមត្រូវ ចំមុខម្ហូប
- កូនតូចៗចូលចិត្តញ៉ាំចំណីចំណុកផ្អែមៗ ប្រឈមបញ្ហាសុខភាពច្រើនយ៉ាង
៣. ប៊ីចេង
ប៊ីចេងជាម៉ូលេគុលគីមី ប្រើជាគ្រឿងបន្ថែមរសជាតិ និងរក្សាគុណភាពអាហារ។ ជាយូរមកហើយ យើងតែងឮពាក្យចចាមអារ៉ាមលើកឡើងថា ញ៉ាំប៊ីចេងធ្វើឲ្យពុកឆ្អឹង តែមកដល់ពេលនេះមិនទាន់មានភស្តុតាងណាបញ្ជាក់រឿងនេះជាការពិតនៅឡើយ។ ទោះមិនបង្កឲ្យពុកឆ្អឹង ប៊ីចេងអាចបង្កឲ្យមានជំងឺផ្សេងៗជាច្រើន។ ប៊ីចេង ដែលជាសារធាតុរំញោចរសជាតិ អាចបង្កឲ្យយើងឈឺក្បាល ដូច្នេះដើម្បីទទួលបានសុខភាពល្អ គួរតែប្រើប៊ីចេងនៅក្នុងកម្រិតតិចបំផុត ហើយបើគិតថាខ្លួនឯងប្រតិកម្មដូចជា ឈឺក្បាល បែកញើស វិលមុខ ស្ពឹកដៃជើង ឬកន្លែងផ្សេង ឈឺទ្រូង ក្អួត ចង្អោរ គួរចៀសវាងអាហារមានជាតិប៊ីចេង។
អត្ថបទពាក់ព័ន្ធ៖
- ញ៉ាំអាហារមានប៊ីចេងច្រើន ធ្វើឲ្យពុកឆ្អឹង វិលមុខ ជារឿងពិតអត់?
- ដើម្បីសុខភាពល្អ កុំប្រើគ្រឿងផ្សំទាំងនេះច្រើនពេកក្នុងម្ហូបអាហារ
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmr]
