ស្ថានភាពជំងឺគ្រុនឈាមពាក់កណ្ដាលឆ្នាំនេះ ថយចុះរហូតដល់ ៨៤ ភាគរយ

ក្រសួងសុខាភិបាលបានប្រកាសព័ត៌មានស្ដីពីស្ថានភាពជំងឺគ្រុនឈាមនៅក្នុងប្រទេសកម្ពុជា ដែលគិតចាប់ពីខែមករា-មិថុនា ឆ្នាំ ២០២០ មានអ្នកជំងឺសរុប ៣ ៣៣៩ ករណី និងស្លាប់ ៤ ករណី (អត្រាស្លាប់ ០.៣ ភាគរយ)។ អំឡុងពាក់កណ្ដាលឆ្នាំនេះ ករណីជំងឺគ្រុនឈាមបានថយចុះជាង ៨៤ ភាគរយ បើប្រៀបធៀបជាមួយឆ្នាំ ២០១៩ ក្នុងរយៈពេលដូចគ្នាដែលមាន ២៨ ២៨៥ ករណី និងស្លាប់ ៣២ នាក់។

ក្នុងសេចក្ដីប្រកាសរបស់ក្រសួងសុខាភិបាលបានបញ្ជាក់ថា ទោះជា ៦ ខែនៃដើមឆ្នាំ ២០២០ នេះជំងឺគ្រុនឈាមបានថយចុះក៏ពិតមែន តែករណីរាយប៉ាយដុំៗតាមភូមិសាស្ត្រប្រជុំជនមួយចំនួន ពិសេសនៅរាជធានីភ្នំពេញ ខេត្តព្រះសីហនុ ប៉ៃលិន សៀមរាប កណ្ដាល កំពង់ធំ តាកែវ មណ្ឌលគិរី រតនគិរី និងខេត្តព្រះវិហារ។

តាមការសន្និដ្ឋានរបស់ក្រសួង ស្ថានភាពជំងឺគ្រុនឈាមក្នុងប្រទេសកម្ពុជាស្ថិតនៅក្នុងស្ថានភាពធម្មតា ក្រោមការគ្រប់គ្រងយ៉ាងល្អកម្មវិធីប្រយុទ្ធជំងឺគ្រុនឈាមទូទៅប្រទេស ដែលមានការចូលរួមអន្តរាគមន៍ និងសហការពេញលេញរបស់ដៃគូពាក់ព័ន្ធ និងប្រជាជនក្នុងសហគមន៍។

ជំងឺគ្រុនឈាម