ការស្ទះចរាចរណ៍ ការរំខានដោយសំឡេង និងការសាយភាពផ្សែងពុល ចេញពីយានយន្ត គឺជាបញ្ហារួមមួយ និងមិនងាយដោះស្រាយនោះទេ នៅតាមទីក្រុងមួយចំនួន ដែលសម្បូរដោយមនុស្សរស់នៅកកកុញ និងមានយានយន្តច្រើន។ បើតាមកាសិក្សា បញ្ហាចរាចរណ៍ទាំងនេះ ជាមូលហេតុមួយ បង្កឲ្យមនុស្សកើតជំងឺដាច់សរសៃឈាមខួរក្បាល។
ការសិក្សានេះ ធ្វើឡើងដោយក្រុមអ្នកស្រាវជ្រាវ មកពីសាកលវិទ្យាល័យ Brown របស់អាមេរិក និងសាកលវិទ្យាល័យមួយចំនួនទៀត នៅទីក្រុង Barcelona របស់អេស្ប៉ាញ។ ក្រុមអ្នកស្រាវជ្រាវ បានពិនិត្យលើទិន្នន័យព័ត៌មានអ្នកជំងឺដាច់សរសៃឈាមខួរក្បាល ២.៧៦១នាក់ ពីឆ្នាំ ២០០៥-២០១៤។
ក្រុមអ្នកស្រាវជ្រាវបកស្រាយថា ការរំខានដោយសំឡេងយានយន្តតាមដងផ្លូវ បង្កផលប៉ះពាល់យ៉ាងខ្លាំង ដែលបណ្ដាលឲ្យកោសិកាក្នុងសរសៃឈាមមិនដំណើរការបានល្អ (Endothelial Dysfunction) ដោយបង្កើតកំណកឈាមជាច្រើន។ នៅពេលកំណកឈាម រត់ក្នុងតសរសៃឈាម ទៅកាន់ក្បាល ឬក វាអាចរារាំងលំហូរឈាម និងអុកស៊ីសែនទៅខួរក្បាល ហើយបង្កជាជំងឺដាច់សរសៃឈាមខួក្បាល។
