ពិតណាស់ហាត់ប្រាណ ជាទម្លាប់រស់នៅល្អមួយ ជួយដល់សុខភាពបានច្រើន ទាំងផ្លូវកាយ និងផ្លូវចិត្ត។ ប៉ុន្តែក្នុងស្ថានភាពសុខភាពខ្លះ ពិសេសបើយើងមានទម្លាប់រស់នៅគ្មានសុខភាពល្អច្រើនឆ្នាំ ហើយចង់ចាប់ផ្តើមហាត់ប្រាណដើម្បីសុខភាព គួរប្រយ័ត្នប្រយែងបន្តិច គួរចាប់ផ្តើមឲ្យបានត្រឹមត្រូវ ហើយបើប្រទះឃើញសញ្ញាមិនប្រក្រតីណាមួយ ត្រូវបញ្ឈប់ជាបន្ទាន់ ព្រោះអាចឆក់យកជីវិតយើងបាន។ អត្ថបទនេះ នឹងលើកឡើងសញ្ញាបញ្ហាបេះដូងអំឡុងពេលហាត់ប្រាណ ឲ្យគ្នាយើងបានដឹង។
ពេលហាត់ប្រាណឃើញសញ្ញាបែបនេះ បញ្ជាក់ថាបេះដូងមានបញ្ហា
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- ទម្លាប់រស់នៅដែលប្រឈមជំងឺបេះដូង
ទម្លាប់រស់នៅអង្គុយច្រើន ជាកត្តាប្រឈមចម្បងនាំឲ្យកើតជំងឺបេះដូង។ យោងទៅតាមសហព័ន្ធសុខភាពបេះដូងពិភពលោក មិនហាត់ប្រាណ អាចបង្កើនកត្តាប្រឈមជំងឺបេះដូងរហូតដល់ទៅ ៥០ ភាគរយ ខណៈកត្តាប្រឈមផ្សេងទៀតរួមមាន៖
– របបអាហារមានខ្លាញ់អាក្រក់ច្រើន
– ជំងឺទឹកនោមផ្អែមប្រភេទ ២
– សម្ពាធឈាមឡើងខ្ពស់
– ជក់បារី
– កូលេស្តេរ៉ូលខ្ពស់
– ធាត់លើសទម្ងន់
– ប្រវត្តិគ្រួសារមានជំងឺបេះដូង
កាត់បន្ថយកត្តាប្រឈមទាំងនេះ អាចកាត់បន្ថយឱកាស គាំងបេះដូង ឬដាច់សរសៃឈាមខួរក្បាល និងតម្រូវការព្យាបាលដោយប្រើប្រាស់ថ្នាំផ្សេងៗ រួមបញ្ចូលទាំងការវះកាត់ទៀតផង។
បន្តធ្វើឲ្យរាងកាយបញ្ចេញសកម្មភាព ជាវិធីល្អបំផុត ដើម្បីកាត់បន្ថយកត្តាប្រឈមជំងឺបេះដូង។ វិធីហាត់ប្រាណស្រាលៗ និងទៀងទាត់ដូចជាដើរ ត្រូវគេអះអាង អាចជួយបង្កើនសុខភាពបេះដូងបានយ៉ាងខ្លះ។ ហាត់ប្រាណវិធីនេះ ក៏អាចកាត់បន្ថយកត្តាប្រឈមជំងឺសរសៃឈាមបេដូង ជួយសម្រកទម្ងន់ និងកាត់បន្ថយសម្ពាធឈាមបាន។
យ៉ាងណា ហាត់ប្រាណពេលខ្លះ ក៏អាចបង្កើនហានិភ័យគាំងបេះដូងគ្នាយើង ពិសេសសម្រាប់គ្នាយើង មានជំងឺបេះដូង និងមិនបានពិនិត្យការហាត់ប្រាណរបស់ខ្លួនបានត្រឹមត្រូវ។
២- ហេតុអីចាំបាច់ប្រុងប្រយ័ត្នមុនពេលចាប់ផ្តើមហាត់ប្រាណ?
ការហាត់ប្រាណ គឺសំខាន់ណាស់ជួយការពារយើងពីជំងឺបេះដូង។ ធម្មតាហាត់ប្រាណមានសុវត្តិភាពចំពោះមនុស្សទូទៅ ប៉ុន្តែគ្នាយើងគួរប្រុងប្រយ័ត្នជាមុន ពិសេសក្នុងករណី៖
– ពេទ្យប្រាប់ថាយើងមានកត្តាប្រឈមជំងឺបេះដូង មួយ ឬច្រើន
– ទើបតែមានបញ្ហាគាំងបេះដូង ឬបញ្ហាទាក់ទងនឹងបេះដូងថ្មីៗ
– ធ្លាប់មានបញ្ហាមិនអាចធ្វើសកម្មភាពបានពីមុនមក
គ្នាយើងមានជំងឺបេះដូង សឹងតែទាំងអស់ អាចហាត់ប្រាណបានដោយសុវត្តិភាព បើយើងបានធ្វើការវាយតម្លៃសុខភាពខ្លួនត្រឹមត្រូវជាមុន។
យ៉ាងណាក៏ដោយ ហាត់ប្រាណមិនសក្តិសមចំពោះគ្នាយើងមានជំងឺបេះដូងទាំងអស់នោះទេ។ បើយើងទើបតែធ្វើការហាត់ប្រាណ គន្លឹះចាំបាច់ ត្រូវចាប់ផ្តើមសន្សឹមៗ ដើម្បីទប់ស្កាត់ផលប៉ះពាល់ផ្សេងៗ។ ពិភាក្សាជាមួយគ្រូពេទ្យ មុននឹងចាប់ផ្តើមចូលរូមកម្មវិធីហាត់ប្រាណណាមួយ ហើយយើង ក៏ប្រហែលជាត្រូវចាប់ផ្ដើមការហាត់ប្រាណ ជាមួយនឹងការតាមដានវេជ្ជសាស្ត្រផងដែរ។
៣- សញ្ញាបង្ហាញថាយើងមានបញ្ហាបេះដូង
ទោះជាយើងធ្លាប់មានបញ្ហាគាំងបេះដូងពីមុនក៏ពិតមែន ក៏មានរោគសញ្ញាមួយផ្សេងទៀតអាចកើតមានដែរ។ សូមទៅជួបគ្រូពេទ្យភ្លាមៗ បើប្រទះឃើញរោគសញ្ញាទាំងអស់នេះ៖
– ចុក ឬមិនស្រួលក្នុងទ្រូង៖ គ្នាយើងជាច្រើន បានបង្ហាញពីទំនាក់ទំនងរវាងអាការៈចុកទ្រូងខ្លាំងភ្លាមៗ ជាមួយនឹងបញ្ហាគាំងបេះដូង។ ករណីគាំងបេះដូងមួយចំនួន អាចចាប់ផ្តើមមកពីបញ្ហានេះ។ យ៉ាងណាមិញ យើងចាប់ផ្តើមពីការមានអារម្មណ៍មិនសូវស្រួល សម្ពាធឡើងចុះមិនធម្មតា រមួល ឬតឹងនូវចំកណ្តាលដើមទ្រូង។ អាការៈឈឺចាប់នេះម្តងឈឺ ម្តងអត់ វាពិបាកនឹងប្រាប់ថា មានអ្វីកើតឡើងមែនទែន។ បញ្ឈប់ការហាត់ប្រាណភ្លាមៗ ហើយទៅជួបពេទ្យ បើមានអាការៈនេះកើតឡើងចាប់ ២-៣ នាទី។
– ហត់៖ មានអារម្មណ៍មិនស្រួលពេលដកដង្ហើម ដោយមិនស្រួលក្នុងទ្រូងពេលហាត់ប្រាណ ភាគច្រើនជាអាការៈគាំងបេះដូង។ អាការៈនេះ អាចកើតមានមុនពេល មិនស្រួលក្នុងទ្រូង ឬពេលគ្មានបញ្ហាក្នុងទ្រូងក៏ដោយ។
– វិលមុខ ឬស្រាលក្បាលធេងធោង៖ ការធ្វើសកម្មភាពហាត់ប្រាណ ប្រហែលជាធ្វើឲ្យយើងមានអារម្មណ៍អស់កម្លាំង ជាពិសេសបើមិនធ្លាប់ធ្វើពីមុនមក តែមិនគួរមានអារម្មណ៍វិលមុខ ឬស្រាលក្បាលធេងធោងនោះទេ។ ចាត់ទុកថា នេះជាសញ្ញាគ្រោះថ្នាក់ និងត្រូវឈប់ហាត់ប្រាណភ្លាម។
– បេះដូងលោតខុសចង្វាក់៖ ចង្វាក់បេះដូងលោតឈប់ៗ ញ័រទ្រូង ឬដង្ហក់ អាចបង្កបានជាបញ្ហាបេះដូង។ សូមទៅពិគ្រោះជាមួយគ្រូពេទ្យ បើមានអារម្មណ៍ថា ចង្វាក់បេះដូងលោតខុសប្រក្រតីអំឡុងពេលហាត់ប្រាណ។
– មានកន្លែងណាមួយផ្សេងទៀតក្នុងខ្លួនហាក់មិនស្រួល៖ បញ្ហាបេះដូង ក៏អាចបណ្តាលមកពីកន្លែងណាមួយផ្សេងក្នុងរាងកាយយើងបានដែរ។ រោគសញ្ញាទាំងនោះ រួមមាន ការមិនស្រួលក្នុងខ្លួន ឈឺចាប់ ឬចុកកដៃ ខ្នង ក ថ្គាម ឬក្រពះជាដើម។ គ្នាយើងប្រហែលមានបទពិសោធន៍ ឈឺប្រដេញគ្នាពីមួយកន្លែង ទៅមួយកន្លែងទៀតក្នុងរាងកាយ ដូចជាចាប់ពីឈឺទ្រូង ថ្គាម កញ្ចឹងកទៅស្មា កដៃ ឬខ្នងជាដើម។
– បែកញើសខុសធម្មតា៖ ទោះការបែកញើស ជាអាការៈធម្មតាពេលហាត់ប្រាណក៏ពិតមែន ប៉ុន្តែអាការៈចង្អោរ និងបែកញើសត្រជាក់ ជាសញ្ញាបញ្ជាក់ពីបញ្ហាដែលអាចកើតមាន។ បើយើងធ្លាប់មានបញ្ហាគាំងបេះដូង មានន័យថា សញ្ញានេះជាប្រថ្នូលអាក្រក់ ឬជាសញ្ញាគ្រោះថ្នាក់អាចកើតមានចំពោះយើង។
អត្ថបទពាក់ព័ន្ធ៖
៤- ពេលណាគួរហៅឡានពេទ្យ?
ពេលដែលយើងគិតថា សញ្ញាទាំងនោះ ពិតជាដោយសារបញ្ហាបេះដូងប្រាកដនោះ ពេលវេលា គឺសំខាន់បំផុតសម្រាប់យើង។ ត្រូវរាប់សូម្បីតែវិនាទី ហើយកុំអែរអង់អីទៀត ឬបង្ខំបញ្ចប់ការហាត់ប្រាណតែម្តង និងស្វែងរកគ្រូពេទ្យជំនាញ ក្នុងករណីយើងមានបញ្ហាដូចខាងលើ។
ជាការណែនាំ គឺមិនត្រូវចាំលើសពី ២-៣ នាទីទេ ឬយូរបំផុត ៥នាទី ត្រូវទាក់ទងទៅឡានពេទ្យភ្លាម។ បេះដូងអាចនឹងមិនដំណើរការ ពេលយើងគាំងបេះដូង ហេតុនេះមានតែអ្នកជំនាញសង្គ្រោះបន្ទាន់ប៉ុណ្ណោះ ដែលមានឯកទេស និងឧបករណ៍គ្រប់គ្រាន់សម្រាប់ជួយបេះដូងឲ្យដំណើរការឡើងវិញ។
សូមឲ្យនរណាម្នាក់ ជួយបើកឡានជូនយើងទៅពេទ្យជាបន្ទាន់ បើមានអាការៈជំងឺគាំងបេះដូងនេះ ហើយមិនអាចតេសុំជំនួយពីមន្ទីរពេទ្យបាន។ ចៀសវាង បើកបរដោយខ្លួនឯង លើងលែងតែមិនមានជម្រើសទាល់តែសោះ។
៥- គួរត្រៀមអ្វីខ្លះ?
ត្រៀមចម្លើយ ដើម្បីឆ្លើយសំណួរដូចខាងក្រោម បើដឹងថាខ្លួន នឹងត្រូវចូលបន្ទប់សង្គ្រោះបន្ទាន់ បន្ទាប់ពីប្រទះមានអាការៈទាំងនេះអំឡុងពេលហាត់ប្រាណ ដូចជា៖
– ចាប់ផ្តើមមិនស្រួល ឬឈឺចុកចាប់ តាំងពីពេលណា?
– តើបានធ្វើអ្វីខ្លះពេលអ្នកមិនស្រួលខ្លួន ឬឈឺចាប់?
– តើអាការៈឈឺចាប់ ចាប់ផ្តើមឈឺខ្លាំងភ្លាម ឬក៏ចាប់ផ្តើមឈឺម្តងបន្តិចៗ?
– មានកត់ចំណាំរោគសញ្ញាអ្វីផ្សេង ដូចជា ចង្អោរ បែកញើសខ្លាំង មានអារម្មណ៍ច្របូកច្របល់ ឬញ័រ ដែរទេ?
ចម្លើយសម្រាប់សំណួរខាងលើនេះ សុទ្ធតែជាជំនួយសម្រាប់គ្រូពេទ្យជំនាញ ក្នុងការជួយសង្គ្រោះជីវិតបាន។
៦- ព័ត៌មានយើងគួរដឹង?
យ៉ាងហោចណាស់មានមនុស្សប្រមាណជាង ៦០០.០០០នាក់ បានស្លាប់ដោយជំងឺបេះដូងជារៀងរាល់ឆ្នាំ។ ការហាត់ប្រាណ ជាវិធីមួយសម្រាប់ប្រឆាំង ក៏ដូចជាកាត់បន្ថយអត្រាស្លាប់ដោយសារជំងឺបេះដូង ប៉ុន្តែអ្វីដែលសំខាន់ត្រូវធ្វើ គឺប្រយ័ត្នប្រយែង។ ដើម្បីជាប្រយោជន៍ គ្នាយើងគួរប្រើប្រាស់ឧបករណ៍វាស់ចង្វាក់បេះដូងពេលហាត់ប្រាណ រក្សាឲ្យនៅចន្លោះ ៦០-៨០ ភាគរយ នៃកម្រិតអតិបរមាចង្វាក់បេះដូង។ ត្រូវប្រាកដថា បានរាយការណ៍ពីសញ្ញាព្រមានណាមួយនៃបញ្ហាបេះដូងអំឡុងពេលហាត់ប្រាណ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម