មានអីៗនឹងគ្នាហើយ ស្រីៗ​អាច​ជួប​បញ្ហា​ទាំង​នេះ

មិនថាស្រី មិនថាប្រុស ប៉ុន្តែស្រីៗគ្នាយើងធ្លាប់សង្កេតអត់ ក្រោយរួមភេទរួច មានអាការៈអីប្លែកៗកើតឡើងដែរទេ? បើមាន ចង់ដឹងថាហេតុអីអត់? គ្នាយើងខ្លះប្រាកដជាភ័យស្លន់ស្លោមិនខាន ជាពិសេសអ្នកទើបរួមភេទលើកដំបូង។ “Hello គ្រូពេទ្យ” មាន​បក​ស្រាយ​លម្អិត​ខាង​ក្រោម។

១- ហូរឈាមក្រោយរួមភេទ

ជារឿងធម្មតាទេ ក្រោយពេលរួមភេទ ទ្វារមាសមានឈាមហូរ ក៏មិនមែនជារឿងអាក្រក់ដែរ បើសិនជារក្សាអនាម័យបានត្រឹមត្រូវ និងពិនិត្យសុខភាពផ្លូវភេទទៀងទាត់។ យ៉ាងណា ករណីខ្លះក៏អាចវិវត្តជាមហារីកផងដែរ ខណៈរោគសញ្ញាហូរឈាមក្រោយអាចមកពីកត្តាដូចជា៖

– ការបង្ករោគ ដូចជា ជំងឺរលាកអាងត្រគាក ជំងឺកាមរោគ ក្លាមេឌៀ (chlamydia)

– ស្ងួតទ្វារមាស

– ដាច់រលាត់ទ្វារមាស

– បញ្ហាដុំសាច់ (polyp) នៅមាត់ស្បូន ឬស្រទាប់ស្បូន

– កោសិកាមាត់ស្បូនលៀនចេញមកក្រៅ (cervical ectropion)។

ចង់ពិនិត្យជំងឺមហារីកក្រពេញអូវែ ចុចទីនេះ!

ចង់ពិនិត្យជំងឺមហារីកមាត់ស្បូន ចុចទីនេះ!

២- ចុកពោះក្រោយពេលរួមភេទ

នេះអាចជាសញ្ញាបញ្ហានៅប្រព័ន្ធបន្តពូជស្រីៗ។ ពេលជួបបញ្ហានេះ គ្នាយើងគួរទៅព្យាបាលជាបន្ទាន់ ហើយកត្តាបង្កដូចជា៖

– រលាក

– ប្រតិកម្ម ឬអាលែកហ្ស៊ី

– គីស ឬដាច់ជាលិកាក្រពេញអូវែ

– មានបុកទង្គិចលើប្រដាប់ភេទស្រ្តី។

បើសិនជាមិនព្យាបាលឲ្យបានត្រឹមត្រូវ វាអាចធ្វើឲ្យមានបញ្ហាផ្លូវភេទ និងមិនប្រក្រតីសរីរាង្គបន្តពូជ។

៣- ចុក ឬឆ្អល់ពោះ

តិចនាំគ្នាច្រឡំថា ចុកពោះធម្មតា! ត្រូវស្វែងយល់ពីកន្លែងឈឺឲ្យបានច្បាស់លាស់។ បើសិនជាចុកនៅពោះខាងលើម្តុំក្រពះ អាចមកពី៖

– ការបង្ករោគ

– ជំងឺរលាកអាងត្រគាក

– ដុំសាច់ក្នុងស្រទាប់សាច់ដុំស្បូន

– ជំងឺអង់ដូមេទ្រីយ៉ូស៊ីស (ជំងឺស្រទាប់ស្បូន)

– រួមភេទដល់ចំណុចកំពូល ធ្វើឲ្យសាច់ដុំពោះកន្ត្រាក់

– បញ្ហាផ្លូវអារម្មណ៍ ថប់ ស្រ្តេស មួម៉ៅ ក៏អាចឲ្យចុកពោះដែរ

– រួមភេទដោយគំហុក ធ្វើឲ្យពោះផ្នែកខាងក្រោយរងសម្ពាធខ្លាំង។

៤- ស្ងួតទ្វារមាស

ជាញឹកញាប់កើតលើស្រ្តីពេលកំពុងរួមភេទ ដោយសារតែភាពកកិត និងដាច់រលាត់ទ្វារមាស ជាហេតុនាំបញ្ហាស្ងួតទ្វារមាសនេះ។ ការស្ងួតទ្វារមាស ក៏កើតឡើង បើសិន/ដោយសារ៖

– អស់រដូវ

– កាត់ក្រពេញអូវែ

– ការសម្អាតទ្វារមាស

– សម្រាល និងបំបៅកូន

– ព្យាបាលមហារីកដោយកាំរស្មី ឬគីមី

– ការភ្ញោចអារម្មណ៍ មុនពេលរួមភេទតិចតួចពេក

– ប្រតិកម្ម ថ្នាំផ្តាសាយ និងថ្នាំប្រឆាំងការធ្លាក់ទឹកចិត្តមួយចំនួន

– ថ្នាំប្រឆាំងអ័រម៉ូនភេទស្រ្តី សម្រាប់ព្យាបាលជំងឺដុំស្បូន និងជំងឺអង់មេទ្រីយ៉ូស៊ីស

– Sjögren’s syndrome (ប្រព័ន្ធការពារទៅបំផ្លាញកោសិកាផលិតជាតិសំណើម)។

៥- រមាស់

រមាស់ជាសញ្ញាបង្ហាញថា បរិយាកាសក្នុងទ្វារមាសខុសប្រក្រតី ហើយរមាស់ក្រោយពេលរួមភេទ អាចមកពី៖

– មេរោគផ្សិត

– រលាកទ្វារមាស

– មានដំបៅ ឬដុំ

– ទ្រីកូម៉ូណាស់ (Trichomoniasis) ពពួកមេរោគមានលើប្រដាប់ភេទស្ត្រី។

គ្នាយើងណា ធ្លាប់មានអាការៈក្រៅពីនេះទៀត?