ស្រីៗគ្នាយើងច្បាស់ជាធ្លាប់ឮមិនខាន ថ្នាំគ្រាប់ពន្យារកំណើតពិតជាអាចព្យាបាល ” មុន ” ដោយប្រសិទ្ធភាពខ្ពស់មែន ប៉ុន្តែត្រូវដឹងថ្នាំជាអាវុធមុខពីរ។ បើចង់ប្រើ ថ្នាំគ្រាប់ពន្យារកំណើតព្យាបាលមុខមុន គួរស្វែងយល់ ពីអត្ថប្រយោជន៍ និងគុណវិវបត្តិជាមុនសិន។
ដឹងអត់ថា ថ្នាំពន្យារកំណើត អាចជួយព្យាបាលមុនដែរ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- អត្ថប្រយោជន៍ថ្នាំគ្រាប់ពន្យាកំណើត
អ្នកវិទ្យាសាស្រ្តរកឃើញថា កម្រិតអរ័ម៉ូនក្នុងរាងកាយមានទំនាក់ទំនងផ្ទាល់ ជាមួយករណីកើតមុន ពិតមែន។ ស្រីៗភាគច្រើន ឡើងមុន អាចនៅមុនពេលមករដូវ ដោយសារតែបម្រែបម្រួលអ័រម៉ូន។ ជាធម្មតា រាងកាយស្រីៗយើង ផលិតអ័រម៉ូន អង់ដ្រូហ្សែន (Androgen) បានតិច (ក្នុងកម្រិតទាប) ជាក្រុមនៃប្រភេទអ័រម៉ូន តេស្តូស្តេរ៉ូន (Testosteone) ប៉ុន្តែនៅពេលអ័រម៉ូន អង់ដ្រូហ្សែន កើនខ្ពស់ ធ្វើឲ្យស្បែកបញ្ចេញសារធាតុ សេបូម (ខ្លាញ់) ច្រើនលើសកម្រិតបង្កឲ្យ ស្ទះរន្ធរោម ក៏ជាមូលហេតុបង្កឲ្យកើតមុន។ ថ្នាំគ្រាប់ពន្យារកំណើត មានផ្ទុកអ័រម៉ូន អឺស្រ្តូហ្សែន និង ប្រូហ្សេសស្តេរ៉ូន អាចធ្វើឲ្យអ័រម៉ូន អង់ដ្រូហ្សែន ថយចុះ ទើបការផលិតខ្លាញ់ សេបូម ថយចុះដូចគ្នា មិនធ្វើឲ្យកើតមុន។
និយាយឲ្យចំទៅ បើថ្នាំពន្យារកំណើតអីក៏បានដែរ ជួយរឿងមុនផង ហើយការពារការបង្កកំណើតផង ឲ្យតែស្របតាមការណែនាំរបស់ពេទ្យ។
២- ប្រភេទថ្នាំពន្យារកំណើតព្យាបាលមុនសម្រាប់ស្ត្រី
ថ្នាំគ្រាប់ពន្យារកំណើត ២ប្រភេទ ដែលរដ្ឋបាលចំណីអាហារ និងឱសថអាមេរិក (FDA) អនុញ្ញាតឲ្យប្រើព្យាបាលមុន សុទ្ធតែមានផ្ទុក អ័រម៉ូនអឺស្រ្តូហ្សែន ដូចជា៖
– ថ្នាំ Ortho Tri-Cyclen៖ មាន អឺស្រ្តូសែន និង ប្រូហ្សេសស្ទីន ឈ្មោះថា Norgestimate ដែលជា ទម្រង់សំយោគនៃអ័រម៉ូន ប្រូហ្សេសស្តេរ៉ូន។ ចំពោះកម្រិត ប្រូហ្សេសស្ទីន តែងមានផ្សេងៗគ្នា នៅក្នុងប្រភេទថ្នាំមួយនេះ។
– ថ្នាំ YAZ ៖ ផ្សំដោយអ័រម៉ូន អឺស្រ្តូសែន និង ប្រូហ្សេសស្ទីន ហៅថា Drospirenone។ ប៉ុន្តែ FDA អះអាងថាថ្នាំគ្រាប់ ពន្យារកំណើត ផ្ទុកសារធាតុ Drospirenone អាចមានហានិភ័យខ្ពស់ក្នុងការកើតមានបញ្ហាកំណកឈាម ជាងថ្នាំមានផ្ទុក ប្រូហ្សេសស្ទីន ដទៃ។
៣- ផលរំខាន
បើគ្នាយើងប្រើថ្នាំគ្រាប់ពន្យារកំណើត ដើម្បីព្យាបាលមុន ត្រូវដឹងផលរំខាន មួយចំនួនដូចជា៖
– ក្អួតចង្អោរ
– រមួលក្រពះ
– ហើមពោះ
– ប្រែប្រួលវដ្តរដូវ
– ឈឺក្បាល
– ឈឺសុដន់
– ដួលសន្លប់
– អារម្មណ៍ផ្លាស់ប្តូរ និងធ្លាក់ទឹកចិត្ត
– ផ្លាស់ប្តូរទម្ងន់ (ឡើង ឬ ស្រកទម្ងន់)។
ផលរំខានធ្ងន់ធ្ងរ មួយចំនួនដោយប្រើថ្នាំ ពន្យារកំណើត អាចបង្កជាជំងឺកំណកដុំឈាម សរសៃវ៉ែនជ្រៅ លើសឈាម ក៏ដូចជា ជំងឺពាក់ព័ន្ធថ្លើម និងថង់ទឹកប្រម៉ាត់។ ចំពោះស្រីៗជក់បារី អាយុលើសពី ៣៥ឆ្នាំ អាចមានហានិភ័យជំងឺបេះដូង និងសសៃឈាម ងាយគាំងបេះដូង ដាច់សសៃឈាមខួរក្បាល និងបញ្ហាកំណកដុំឈាមធ្ងន់ធ្ងរ នៅជើង និងសួត។
គួរពិភាក្សាជាមួយអ្នកផ្តល់សេវាថែទាំសុខភាព និងអ្នកជំនាញឯកទេសស្បែក ដើម្បីព្យាបាលជំងឺមុនឲ្យមានប្រសិទ្ធភាព តាមរយៈថ្នាំគ្រាប់ពន្យារកំណើត។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម