ជឿថា គ្នាយើងមួយចំនួនធ្លាប់ឆ្លងកាត់ការញ៉ាំតាមអារម្មណ៍ ពោលគឺយកចំណីចំណុកមកដោះស្រាយបញ្ហាអារម្មណ៍ ដើម្បីធ្វើឲ្យមានអារម្មណ៍សប្បាយ ឬធូរស្រាលវិញ។ យើងសង្កេតឃើញថា ក្មេងៗវ័យជំទង់មានអារម្មណ៍ប្រែប្រួលច្រើន ហើយក៏និយមយកអាហារមកជួយបន្ធូរអារម្មណ៍ដែរ។ ចុះការញ៉ាំតាមអារម្មណ៍នេះផ្ដល់ផលល្អ ឬអាក្រក់ដល់ក្មេងៗវ័យជំទង់?
ការញ៉ាំតាមអារម្មណ៍ជាអ្វី? ល្អ ឬមិនល្អចំពោះក្មេងៗ?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
តើអ្វីទៅជាការញ៉ាំតាមអារម្មណ៍?
ការញ៉ាំតាមអារម្មណ៍ ឬ emotional eating កើតឡើងនៅពេលដែលយើងឆ្លើយតបទៅនឹងអារម្មណ៍ដូចជា ពិបាកចិត្ត ស្ត្រេស ថប់បារម្ភ ធុញទ្រាន់ អផ្សុក ឬជួនកាល សប្បាយចិត្តដោយការញ៉ាំអាហារ តែវាមិនមែនដោយសារតែយើងឃ្លាននោះទេ។ ហើយ ៧៥% នៃការញ៉ាំលើសកម្រិតកើតឡើងដោយសារ Emotional eating នេះឯង។ ដោយសារតែក្មេងៗវ័យជំទង់ ជាវ័យមួយដែលងាយទទួលសម្ពាធផ្លូវអារម្មណ៍ ការញ៉ាំតាមអារម្មណ៍នេះអាចជាវិធីមួយដែលក្មេងៗយកមកដោះស្រាយបញ្ហាអារម្មណ៍។
Emotional Eating ល្អ ឬអត់ដល់សុខភាពក្មេងៗវ័យជំទង់?
ដ្បិតតែ ការញ៉ាំតាមអារម្មណ៍ជួយបន្ធូរភាពតានតឹងបាន ប៉ុន្តែ វាអាចជាបញ្ហាមួយបំផ្លាញសុខភាពរបស់ខ្លួនទៅវិញ។ តាមពិតទៅ Emotion Eating មិនល្អចំពោះសុខភាពទេ ទាំងផ្លូវកាយ និងផ្លូវអារម្មណ៍ ព្រោះវាអាចធ្វើឲ្យយើងញ៉ាំច្រើនហួសកម្រិត។ នៅពេលដែលយើងញ៉ាំយូរៗទៅ អាហារទាំងនោះនឹងបន្ថែមកាឡូរីធ្វើឲ្យយើងងាយឡើងទម្ងន់ ឬលើសទម្ងន់ កាន់តែយ៉ាប់ទៀតនោះ គឺកើតជំងឺធាត់ ។ យើងដឹងហើយថា ជំងឺធាត់អាចបង្កហានិភ័យដល់សុខភាពយើងច្រើនដូចជា ទឹកនោមផ្អែមប្រភេទ២ជាដើម។ វាក៏អាចធ្វើឲ្យយើងងាយកើតជំងឺបាក់ទឹកចិត្តទៅថ្ងៃខាងមុខទៀតដែរ។
អាហារដែលក្មេងៗវ័យជំទង់ យកមកជួយរង្គប់អារម្មណ៍មិនមែនជាប្រភេទអាហារល្អ សម្បូរវីតាមីន ឬសារធាតុចិញ្ចឹមដែលរាងកាយត្រូវការទេ តែភាគច្រើនវាជាការ៉េម ពពួកនំកញ្ចប់ ឬជាប្រភេទ fast food មានជាតិខ្លាញ់ច្រើននោះ។
ចុះមានវិធីអ្វីអាចជួយដោះស្រាយការញ៉ាំតាមអារម្មណ៍បានទេ?
ដោយសារតែ Emotional eating មិនសូវជាផ្ដល់ផលល្អដល់សុខភាព យើងគួរតែព្យាយាមគ្រប់គ្រងការញ៉ាំតាមអារម្មណ៍ឲ្យមានកម្រិតត្រឹមត្រូវ ឬអាចដោះស្រាយដោយ៖
១. ខល លេងអ៊ីនធើណេត ជាមួយមិត្តភ័ក្ដិប្រសិនបើមានអារម្មណ៍ថាធុញ ឬមួយក៏ហាត់ប្រាណយករាងស្អាក៏បាន
២. ដើរលេង ឬបង្កើតទម្លាប់ថ្មី បើស្ត្រេស
៣. ប្ដូរទម្លាប់ចេញ បើមានទម្លាប់ញ៉ាំកំដរមាត់ ព្រោះវាកំដរបានត្រឹមមាត់ តែរាងកាយ និងសុខភាពមិននៅកំដរជាមួយទេ
និយាយរួម យើងគួរព្យាយាមធ្វើអ្វីប្លែកៗ ឬខំបញ្ចេញញើសជំនួសឲ្យការញ៉ាំតាមអារម្មណ៍វិញ បើមិនឃ្លានមែនទែនទេនោះ។ មួយវិញទៀត បើយើងអាចពិគ្រោះជាមួយអ្នកជំនាញអាហារូបត្ថម្ភ និងផ្នែកកាយសម្បទា ដើម្បីរកដំណោះស្រាយពីបញ្ហា Emotional eating និងហាត់ប្រាណ ដើម្បីរក្សាសុខភាព និងរាងកាយលូតលាស់បានល្អ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម