វីរុសណូរ៉ូ (Norovirus) មានវត្តមានយូរមកហើយ និងមិនមែនជាវីរុសផ្ទុះថ្មីទេ ប៉ុន្តែឆ្លងខ្លាំង និងមិនទាន់មានវ៉ាក់សាំងការពារនៅឡើយទេ។ វីរុសណូរ៉ូ (Norovirus) ឆ្លងខ្លាំងបំផុតនៅខែត្រជាក់ និងកើតជាប្រចាំនៅបណ្តាប្រទេសត្រជាក់។ លើសពីនេះ កុមារអាយុក្រោម ៥ ឆ្នាំ មនុស្សចាស់ និងអ្នកដែលមានប្រព័ន្ធការពាររាងកាយខ្សោយងាយប្រឈមនឹងការឆ្លងវីរុសនេះជាងគេ។ តើវីរុសណូរ៉ូ (Norovirus) អាចបង្កឱ្យយើងមានបញ្ហាសុខភាពអ្វីខ្លះ ហើយយើងគួរការពារខ្លួនពីវីរុសនេះដោយរបៀបណា?

១. អ្វីទៅជាវីរុសណូរ៉ូ (Norovirus)?

វីរុសណូរ៉ូ (Norovirus) គឺជាវីរុសដែលបង្កឱ្យរលាកក្រពះពោះវៀនស្រួចស្រាវ និងបណ្តាលឱ្យយើងចង្អោរ រាក និងក្អួតច្រើនដង ឈឺពោះ ឈឺក្បាល ខ្សោយ ឈឺរាងកាយ ឬក្តៅខ្លួន។ ភាគច្រើនអ្នកជំងឺអាចធូរស្បើយក្នុងអំឡុងពេល ២ ទៅ ៣ ថ្ងៃ។ បើទោះជាអ្នកជំងឺជាពីជំងឺបង្កឡើងដោយវីរុសនេះក៏ដោយ ក៏អ្នកជំងឺនៅតែអាចបន្តចម្លងវីរុសនេះទៅបុគ្គលផ្សេងទៀតបានក្នុងអំឡុង ២ សប្តាហ៍ ឬលើស បន្ទាប់ពីជាសះស្បើយ។

ចង់គណនា BMI ចុចទីនេះ!

ចង់គណនារង្វាស់ចង្វាក់បេះដូងលោត ចុចទីនេះ !

ចង់គណនាថ្ងៃមេជីវិតញីទុំធ្លាក់ ចុចទីនេះ!

ចង់ពិនិត្យសុខភាពប្រព័ន្ធរំលាយអាហារ ចុចទីនេះ !

២. វិធីបង្ការវីរុសណូរ៉ូ (Norovirus)

ថ្វីត្បិតតែវីរុសណូរ៉ូ (Norovirus) ជាវីរុសឆ្លងខ្លាំង ប៉ុន្តែយើងអាចការពារខ្លួន និងសមាជិកគ្រួសារពីការឆ្លងវីរុសនេះបានដោយធ្វើតាមការណែនាំដូចខាងក្រោម៖

នៅឱ្យឆ្ងាយពីអ្នកជំងឺឆ្លងវីរុសណូរ៉ូ (Norovirus)
ចៀសវាងកន្លែងមានមនុស្សច្រើនអ៊ូអរ នៅអំឡុងពេលផ្ទុះការឆ្លងវីរុសណូរ៉ូ (Norovirus)
ឧស្សាហ៍លាងសម្អាតផ្ទៃដែលយើងអាចប៉ះពាល់ញឹកញាប់
ប្រសិនបើយើងឆ្លងវីរុសណូរ៉ូ (Norovirus) កុំរៀបចំ ចាត់ចែង ឬធ្វើម្ហូបអាហារ ឬថែទាំសមាជិកក្នុងគ្រួសារ ឬអ្នកផ្សេង ត្រូវរង់ចាំយ៉ាងហោចណាស់ ២ ថ្ងៃ (៤៨ ម៉ោង) បន្ទាប់ពីយើងឈប់ចេញរោគសញ្ញា ឬអាការជំងឺ ជាពិសេសអ្នកធ្វើការនៅក្នុងភោជនីយដ្ឋាន សាលារៀន កន្លែងមើលថែទាំកុមារ និងទារក
ប្រសិនបើយើងឆ្លងវីរុសណូរ៉ូ (Norovirus) ចៀសវាងចេញក្រៅ និងនៅជិតសមាជិកគ្រួសារ ឬអ្នកផ្សេង ហើយត្រូវរងចាំយ៉ាងហោច ៤៨ ម៉ោង បន្ទាប់ជាសះស្បើយ
លាងសម្អាតដៃឱ្យបានស្អាតល្អជាមួយសាប៊ូ និងទឹកយ៉ាងហោចណាស់ ២០ វីនាទី ជាពិសេសពេល
– ក្រោយពេលចេញពីបន្ទប់ទឹក ឬប្តូរខោទឹកនោម

– មុនពេលរៀបចំ ឬញុំាអាហារ

– មុនញុាំថ្នាំ ឬរៀបចំថ្នាំឱ្យសមាជិកគ្រួសារ ឬអ្នកផ្សេង

– ក្រោយពេលប៉ះពាល់ជាមួយសម្លៀកបំពាក់ ឬផ្ទៃដែលប្រឡាក់កំអួត ឬលាកមក ជាពិសេស កំអួត ឬលាកមកអ្នកឆ្លងវីរុសណូរ៉ូ (Norovirus)
ត្រូវចម្អិនអាហារឱ្យឆ្អិនល្អ ជាពិសេសគ្រឿងសមុទ្រ
លាងបន្លែ និងផ្លែឈើដោយបានស្អាតល្អ
ចៀសវាងញុំាទឹកឆៅ
សម្អាត និងអនាម័យសម្ភារផ្ទះបាយ ជ្រញ់ ផ្ទៃនានាក្នុងផ្ទះបាយជាប្រចាំ ជាពិសេសបន្ទាប់ពីរៀបចំអាហារឆៅ
ទុកដាក់អាហារឆៅឱ្យដាច់ដោយឡែកពីអាហារឆ្អិន ជាពិសេសគ្រឿងសមុទ្រ
កុំបរិភោគអាហារណាដែលយើងគិតថា អាចឆ្លងវីរុសណូរ៉ូ (Norovirus)
ចៀសវាងញុំាអាហារ និងភេជ្ជៈរួមជាមួយអ្នកជំងឺឆ្លងវីរុសណូរ៉ូ (Norovirus)
លាងសម្អាតផ្ទៃដែលប្រឡាក់កំអួត ឬលាមកភ្លាមៗជាមួយសាប៊ូ និងទឹកក្តៅដោយពាក់ស្រោមដៃជ័រ ឬស្រោមដៃថង់ដែលប្រើហើយបោះចោល
ត្រូវដោះសម្លៀកបំពាក់ដែលប្រឡាក់កំអួត ឬលាមកចេញភ្លាមៗ
ត្រូវបោកសម្លៀកបំពាក់ដែលប្រឡាក់កំអួត ឬលាមកឱ្យស្អាតល្អ ជាមួយទឹកក្តៅ និងហាលថ្ងៃឱ្យស្ងួត

សូមរំលឹកថា ជេលលាងដៃសម្លាប់មេរោគមិនអាចសម្លាប់វីរុសណូរ៉ូ (Norovirus) ទេ យើងអាចប្រើជេលលាងដៃសម្លាប់មេរោគបន្ថែមពីលើការលាងដៃ ប៉ុន្តែជេលលាងដៃសម្លាប់មេរោគមិនអាចជំនួសការលាង សម្អាតដៃជាមួយសាប៊ូ និងទឹកទេ។

អត្ថបទគួរអាន៖

ចំណុចសំខាន់

ថ្វីត្បិតតែវីរុសណូរ៉ូ (Norovirus) ឆ្លងខ្លាំង និងមិនទាន់មានវ៉ាក់សាំងការពារនៅឡើយ ប៉ុន្តែយើងអាចការពារខ្លួន និងសមាជិកគ្រួសារពីការឆ្លងវីរុសនេះបានដោយប្រកាន់ភ្ជាប់អនាម័យក្នុងការរស់នៅ និង ចៀសវាងនៅជិតអ្នកឆ្លងវីរុសនេះ។

តោះមកដឹងពីវិធីបង្ការជំងឺបង្កឡើងដោយវីរុសណូរ៉ូ (Norovirus)

១. អ្វីទៅជាវីរុសណូរ៉ូ (Norovirus)?

២. វិធីបង្ការវីរុសណូរ៉ូ (Norovirus)

ចំណុចសំខាន់