ចេញអាការៈទាំងនេះ ខ្វះជាតិកាល់ស្យូមក្នុងឈាមហើយ

ខ្វះជាតិកាល់ស្យូមក្នុងឈាម (Hypocalcemia) មានន័យថាកម្រិតកាល់ស្យូមក្នុងឈាមថយចុះ ដែលមិនអាចបំពេញតម្រូវការប្រើប្រាស់របស់រាងកាយគ្រប់គ្រាន់។ អាការៈបែបនេះ ប្រសិនបើយើងមិនយកចិត្ដទុក​ដាក់ អាចបណ្ដាលឲ្យសុខភាពយើងប្រឈមជំងឺផ្សេងៗច្រើន។

ចង់គណនា BMR ចុចទីនេះ!

ចង់គណនា BMI ចុចទីនេះ!

ចង់គណនារង្វាស់ចង្វាក់បេះដូង ចុចទីនេះ!

ចង់ពិនិត្យសុខភាពប្រព័ន្ធរំលាយអាហារ ចុចទីនេះ!

កង្វះជាតិកាល់ស្យូមក្នុងឈាម ក្នុងដំណាក់កាលដំបូងមិនបង្ហាញរោគសញ្ញាណាគួរកត់សម្គាល់នោះទេ។ ករណីខ្លះបញ្ហានេះ កើតឡើងក្នុងរយៈពេលខ្លីហើយបាត់ទៅវិញដោយខ្លួនឯង ប៉ុន្ដែបើកើតឡើងអូសបន្លាយរយៈពេលយូរ នឹងស្ដែង​ចេញ​​រោគសញ្ញាផ្សេងៗ និងបង្កផលលំបាកដល់រាងកាយមួយ​ចំនួន​ផង​ដែរ​។​

១.បញ្ហាសាច់ដុំ

អ្នកដែលមានកង្វះជាតិកាល់ស្យូមក្នុងឈាមអាចជួបប្រទះ ចុះខ្សោយសាច់ដុំ ការឈឺចាប់សាច់ដុំ ការរមួលក្រពើ និងឈឺចាប់ត្រង់ភ្លៅ និងដៃ នៅ​ពេលធ្វើចលនា។ បន្ថែមពីនេះអ្នកជំងឺអាចមានអាការៈស្ពឹកដៃជើង ព្រមទាំងជុំវិញមាត់។

២.អស់កម្លាំង

ថយចុះជាតិកាល់ស្យូមក៏អាចបណ្ដាលឲ្យអ្នកជំងឺជួបអាការៈ អស់កម្លាំង បាត់បង់ថាមពល អារម្មណ៍ស្ពឹកស្រពន់ នឹងឈានដល់ការគេងមិនលក់។ លើសពីនេះ អ្នកជំងឺអាចមានអាការៈឈឺក្បាល វិលមុខ ឬ​ភ្លេចភ្លាំងច្រើន។

៣.សុខភាពស្បែក

អ្នកជំងឺខ្លះអាចប្រឈមនឹងអាការៈស្បែកស្ងួត ជ្រុះសក់ ងាយរលាក បើធ្ងន់ធ្ងរអាចចេញកន្ដួលរមាស់លើស្បែក ឈានដល់ការកើតជំងឺសើស្បែក (psoriasis)។

៤.ជំងឺពុកឆ្អឹង

សុខភាពឆ្អឹងត្រូវការជាតិកាល់ស្យូមជាចាំបាច់ ដើម្បីបំពេញតម្រូវការលូតលាស់ និងភាពរឹងមាំ មិនត្រឹមតែប៉ុណ្ណោះឆ្អឹងក៏មានមុខងារសំខាន់ជួយរក្សាបរិមាណសារធាតុសំខាន់នេះផងដែរ។ នៅពេលបរិមាណកាល់ស្យូមទាប ខណៈដែលរាងកាយត្រូវការប្រើប្រាស់ច្រើន នោះវានឹងបង្វែរសារធាតុនេះ ចេញពីឆ្អឹង ទើបបណ្ដាលកំហាប់ឆ្អឹងគ្មានភាពរឹងមាំ។

៥.ងាយកើតស្ដ្រេស

អ្នកបាត់បង់កាល់ស្យូមងាយប្រឈមបញ្ហាផ្នែកសុខភាពផ្លូវចិត្ដ ដូចជា អារម្មណ៍ស្មុគស្មាញ កើតស្ដ្រេស និងថប់បារម្ភ។ ក្នុងស្ថានភាពបែបនេះអ្នកជំងឺត្រូវទៅជួបពិភាក្សាជាមួយគ្រូពេទ្យ និងព្យាបាលឲ្យលឿនបំផុត ព្រោះការកើតមានអារម្មណ៍តានតឹងច្រើន ក៏អាចឈានឲ្យប៉ះពាល់ទៅដល់ការឡើងសម្ពាធឈាមផងដែរ។

តើគួរធ្វើបែបណាដើម្បីទទួលបានជាតិកាល់ស្យូមនេះគ្រប់គ្រាន់ឡើងវិញ?

ជាក់ស្ដែងណាស់ រាងកាយរបស់យើងមិនអាចផលិតសារធាតុនេះបានដោយខ្លួនឯងទេ ដូច្នេះយើងមានតែពឹងផ្អែកលើ របបអាហារ និង សារធាតុបំប៉នពីខាងក្រៅជំនួយទើបបាន។ អាហារទាំងនោះមានដូចជា ទឹកដោះគោ បន្លែបៃតង បន្លែភ្លៅកង្កែប កូនស្ពៃ និងស្លឹកសណ្ដែក សុទ្ធតែមានផ្ទុកកាល់ស្យូមជាច្រើន ហេតុនេះយើងគួរញ៉ាំបន្លែទាំងអស់នោះឲ្យបានច្រើន។

គ្រាប់ធញ្ញជាតិម្យ៉ាង ហៅថា Millet និងគ្រាប់ល្ង ត្រូវគេរកឃើញថា មានផ្ទុកជាតិកាល់ស្យូមជាច្រើន យើងគួរញ៉ាំប្រភេទអាហារទាំងនេះ ឲ្យបានច្រើន។ចំពោះផ្លែឈើវិញយើងគួរញ៉ាំឲ្យ​បានច្រើនជាពិសេសផ្លែឈើ មានផ្ទុកវីតាមីន C ។

អត្ថបទ​ពាក់ព័ន្ធ៖

• ទម្លាប់អាក្រក់មួយចំនួន បណ្ដាលឲ្យពុកឆ្អឹងទាំងនៅវ័យក្មេង
• អ្នកញ៉ាំគ្រាប់ជីរនឹងសប្បាយចិត្ត បើដឹងពីអត្ថប្រយោជន៍ច្រើនទាំងនេះ
• ក្មេងៗ​មាន​សញ្ញា​ទាំង​នេះ បញ្ជាក់​ថាខ្វះជីវជាតិ​ហើយ!
• ខ្វះសារធាតុចិញ្ចឹមសំខាន់ពីរមុខនេះ ឆ្អឹងកូនខ្សោយ អត់មាំ អន់កម្ពស់ ឯធ្មេញក៏មានបញ្ហា
• កាល់​ស្យូមល្អសម្រាប់​ក្មេង បើខ្វះច្បាស់ជាមាន​បញ្ហា​ឆ្អឹង​ធ្ងន់ធ្ងរ