ជំនឿអំឡុងពេលមានផ្ទៃពោះមានច្រើនណាស់ តែទោះយ៉ាងណាជំនឿមួយចំនួនគ្រាន់តែជាជឿតៗគ្នា មិនមានការសិក្សាស្រាវជ្រាវច្បាស់លាស់តាមបែបវិទ្យាសាស្ត្រនៅឡើយ។ ខាងក្រោមនេះជាជំនឿមិនសមស្របមួយចំនួន ដែលគ្រូពេទ្យអះអាងថា អាចបង្កគ្រោះថ្នាក់ដល់ស្ត្រីមានផ្ទៃពោះ និងកូនផ្ទៃ។
១. ផឹកថ្នាំខ្មែរ ឬថ្នាំចិនសែ អាចរក្សាគភ៌ និងស្រួលកើតកូន
ការផឹកថ្នាំបុរាណពេលពពោះ ដែលចាស់ៗជឿថាថ្នាំបុរាណជាថ្នាំរក្សាគភ៌ និងជាថ្នាំជំនួយសុខភាពនោះមិនពិតនោះឡើយ។ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រី នៃមន្ទីរពេទ្យមិត្តភាពកម្ពុជា-ចិន សែនសុខ ថា ការផឹកថ្នាំខ្មែរ ឬថ្នាំចិនសែ ពេលពពោះ មិនបានជួយអ្វីនោះទេ ថែមទាំងបង្កផលប៉ះពាល់ធ្ងន់ធ្ងរទាំងសុខភាពម្តាយ និងកូនក្នុងផ្ទៃ ដូចជាធ្វើឲ្យសុកក្រិន ស្អិតជាប់ស្បូន សុកអត់ធ្លាក់ ទឹកភ្លោះមិនថ្លាល្អ មាត់ស្បូនមិនបើក កូនពិបាកកើត ធ្លាក់ឈាមខ្លាំង ឈាមរាវ កូនខ្សោយ ឬស្លាប់ក្នុងពោះ។
២. មើលអេកូញឹកពេក មិនល្អទេប៉ះពាល់កូនក្នុងផ្ទៃ
មានលើកឡើង និងជឿតៗគ្នាថា ការមើលអេកូញឹកញាប់ពេកមិនល្អនោះទេ ធ្វើឲ្យប៉ះពាល់ដល់កូនផ្ទៃ។ ប្រធានផ្នែករោគស្ត្រី នៃមន្ទីរពេទ្យកាល់ម៉ែត វេជ្ជបណ្ឌិត គាន់ អូន បានបដិសេធការលើកឡើងបែបនេះ លោកសាស្ត្រាចារ្យថា តាមការស្រាវស្រាវបែបវិទ្យាសាស្ត្រ ការមើលអេកូញឹកញាប់មិនមានអ្វីប៉ះពាល់ដល់កូនផ្ទៃនោះទេ ហើយពេទ្យមិនបានហាមប្រាមរឿងនេះទេ តែប្រសិនបើគិតតាមក្បួនខ្នាតម៉ាក់ៗអាចអេកូត្រឹម ៤-៥ ដង ក៏បានដែរ។ វេជ្ជបណ្ឌិតក៏បន្ថែមទៀតថា អ្នកដែលមានជីវភាពធូរធារអាចមកផ្ទៀងផ្ទាត់រាល់ខែ ព្រោះកាលណាដឹងលទ្ធផល ឬបញ្ហាមុនអាចជួយបានច្រើន ជាពិសេសក្នុងត្រីមាសទី១ និង២ ព្រោះពេលនោះកូននៅតូចបើមានភាពមិនប្រក្រតីរបស់គភ៌ ឬសុខភាពមិនល្អ គ្រូពេទ្យនឹងឲ្យដំបូន្មានទៅម្ដាយគួរតែបញ្ឈប់គភ៌។ មួយវិញទៀត ប្រសិនបើគភ៌មានបញ្ហាមិនស្រួលណាមួយ តម្រូវឲ្យពិនិត្យអេកូកាន់តែញឹក ដើម្បីតាមដាន និងចង់ដឹងស្ថានភាពបន្ត។
អត្ថបទពាក់ព័ន្ធ៖
- មើលអេកូញឹកពេក ប៉ះពាល់កូនអត់? ពិនិត្យប៉ុន្មានដងល្អ?
- ពិនិត្យអេកូពេលពពោះ មានប្រយោជន៍ច្រើនណាស់
- លម្អិតរឿងអេកូផ្ទៃពោះតាមត្រីមាសនីមួយៗ ម៉ាក់ៗកាន់តែមានទំនុកចិត្ត
៣. ងូតទឹកពេកយប់ធ្វើឲ្យកូនថ្លោស
កូនថ្លោសមិនថ្លោស មិនពាក់ព័ន្ធនឹងការងូតទឹកពេលយប់នោះទេ វាពាក់ព័ន្ធនឹងរបបអាហារស្ត្រីមានផ្ទៃពោះទៅវិញទេ កាលណាស្រីៗមានផ្ទៃពោះញ៉ាំច្រើនហួសកម្រិត ញ៉ាំផ្អែម ញ៉ាំខ្លាញ់ច្រើន នាំឲ្យឡើងគីឡូ ឯកូនក្នុងផ្ទៃក៏ថ្លោសទៅតាមនោះដែរ ។ លោកវេជ្ជបណ្ឌិត ចាន់ ស៊ីណេត ថា បើសិនជាស្ត្រីមានផ្ទៃពោះមានអារម្មណ៍ថា ស្អុះស្អាប់ពេលយប់ពិបាកគេង អាចងូតទឹកបាន តែត្រូវប្រយ័ត្នប្រយែងបន្តិច ខ្លាចរអិលដួល ដោយតែងងឹត។
អត្ថបទពាក់ព័ន្ធ៖
- បើកូនក្នុងផ្ទៃថ្លោសពេក អាចប្រឈមបញ្ហាច្រើន
- ពីថ្ងៃពពោះដល់សម្រាល ម៉ាក់ៗឡើងគីឡូប៉ុន្មានទើបល្អ?
- ពេលពោះ ម៉ាក់ៗណាខ្ជិលច្រអូសពិបាកសម្រាលកូន មែនទេ?
៤. កូនកើតមកគ្រប់លក្ខណៈ សតិមិនល្អ មកពីម្តាយមើលចន្ទគ្រាស ឬសូរ្យគ្រាស
ចាស់ៗពីដើម ពេលមានសូរ្យគ្រាស ឬចន្ទគ្រាស តែងតែហាមស្ត្រីមានផ្ទៃពោះមិនឲ្យមើលនោះទេ ព្រោះខ្លាចកូនផ្ទៃពោះកើតមកគ្រាសកន្លង។ លោកសាស្ត្រាចារ្យវេជ្ជបណ្ឌិត គាន់ អូន ប្រធានផ្នែករោគស្ត្រី នៃមន្ទីរពេទ្យកាល់ម៉ែត អះអាងថា គ្រាន់តែជាពាក្យបោកបញ្ឆោតរបស់ចាស់ៗនោះទេ មិនចង់ឲ្យស្ត្រីមានផ្ទៃពោះ នៅទ្រាំចាំមើលចន្ទគ្រាស ឬសូរ្យគ្រាស រយៈពេលយូរ ឬចាំដល់យប់ជ្រៅ។ ដូច្នេះហើយ ដើម្បីឲ្យកូនក្នុងផ្ទៃលូតលាស់បានល្អ ស្ត្រីពពោះត្រូវញ៉ាំអាហារសម្បូរជីវជាតិ ពិនិត្យសុខភាពឲ្យទៀងទាត់ លេបថ្នាំជាតិដែក ពពួកវីតាមីន ពិសេសអាស៊ីដហ្វូលិកឲ្យបានគ្រប់គ្រាន់ ចៀសវាងការធ្វើការធ្ងន់ៗ កុំស្ត្រេសខ្លាំងពេក។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
