ម៉ាក់ៗ គួរត្រៀមអ្វីខ្លះទាំងមុនសម្រាល និងក្រោយសម្រាល?

ការត្រៀមខ្លួនទទួលអាអូន (មុនឆ្លងទន្លេ) និងចំណុចគួរដឹងជាច្រើន ក្រោយឆ្លងទន្លេ គឺជារឿងចាំបាច់គួរធ្វើ។ ចុះយើងបានត្រៀមអីខ្លះហើយ? ឬក៏ចាស់ៗ ជាអ្នករៀបចំ? បើមែន កុំចាំតែចាស់ៗ មកស្វែងយល់ជាមួយ “Hello គ្រូពេទ្យ” ទាំងអស់គ្នា។

១- រៀនពីការសម្រាល

ពិសេសបំផុតសម្រាប់ម្ដាយ ដែលមានកូនដំបូង ហើយជ្រើសយកវិធីកើតធម្មជាតិ (មិនវះកាត់) ព្រោះអត់មានបទពិសោធន៍។ អ៊ីចឹងហើយ បើសិនជាបានរៀន ឬស្វែងយល់គន្លឹះមួយចំនួនពីអ្នកជំនាញ (ពេទ្យ) អាចជាការល្អ ដើម្បីដឹងពីរៀបដោះស្រាយបញ្ហា របៀបដកដង្ហើម និងតិចនិកបន្ធូរអារម្មណ៍ថ្ងៃឆ្លងទន្លេ។ ករណីខ្លះ ប្រហែលពិបាករកថ្នាក់រៀន ដូច្នេះជម្រើសក្នុងការស្វែងរកគ្រូពេទ្យផ្នែកសម្ភពមកពិភាក្សា ដើម្បីស្រាយរាល់ចម្ងល់ ឬឲ្យដំបូន្មានបាន ក៏ជាជម្រើសល្អបំផុតមួយដែរ។

គណនាការឡើងទម្ងន់ស្ត្រីអំឡុងពពោះទីនេះ

២- ជម្រើសសម្រាល

ត្រូវមើលលើសុខភាពម្ដាយមុនការសម្រេចចិត្ត ក្រោយពីពិភាក្សាដោយហ្មត់ចត់ ជាមួយគ្រូពេទ្យផ្នែកសម្ភព។ បើសុខភាពទាំងកូន និងម្ដាយល្អ ហើយ កើតដោយរៀបណា ជាជម្រើសរបស់យើង ថាតើយើងសម្រេចឆ្លងទន្លេដោយធម្មជាតិ ឬដោយវេជ្ជសាស្ត្រជំនួយ អាចជា ការវះកាត់ ការបង្កើនកូនតាមស្បូនបែបធម្មជាតិ ការបូមយកកូនចេញ ឬការប្រើដង្កៀបទាញ…ជាដើម។ ការជ្រើសរើសមន្ទីរពេទ្យឲ្យសមនឹងតម្លៃ ការជឿទុកចិត្ត បូករួមទាំង (គួរតែគិតដល់) សេវាមើលថែទាំ ទាំងម្ដាយ និងទារកថាតើល្អកម្រិតណា។

គណនាថ្ងៃសម្រាលកូន នៅត្រង់នេះ

៣- ប្រដាប់ប្រដាត្រូវប្រើ

អ្វីខ្លះដែលត្រូវការប្រើនៅពេទ្យ អំឡុងសម្រាក មិនគួរឲ្យខ្វះមុខខ្វះក្រោយទេ ជាពិសេសរបស់របរដែលបន្ទាន់ប្រើ ឬចាំបាច់បំផុត។ គួរត្រៀមខ្លួនឲ្យរួចស្រេច ចំពោះចំណុចនេះ ឬអាចសួរអ្នកមានបទពិសោធន៍ មិត្តភ័ក្ដិដែលធ្លាប់មានកូន ឬចាស់ៗ ក្នុងផ្ទះក៏បាន។

៤- របៀបបំបៅដោះកូន

ក្រោយសម្រាលដោយជោគជ័យហើយ បន្ទុកកាន់តែធ្ងន់បំផុត អ្នកនៅផ្ទាល់ជាមួយអាអូន គឺម៉ាក់ៗហ្នឹងហើយ។ ក្រៅពីត្រៀមខ្លួនជាម្ដាយល្អបំផុត ក្នុងការថែទាំ និង រៀបចំជីវិតកូន យើងប្រាកដជាជួបរឿងឈឺក្បាលមិនតិចទេ។ មានរឿងច្រើនណាស់ដែលត្រូវរៀន និងស្វែងយល់ពីការថែទាំកូនជាទីស្រឡាញ់តាំងពីតូចក្រូចឆ្មារ ជាពិសេសរាប់ចាប់តាងពីពេលបំបៅ ឬបង្រៀនកូនឲ្យបៅដោះ ដឹងពីវិធី ច្របាច់ទឹកដោះដាក់ដប ចេះដោះស្រាយពេលកូនកិកកុកមិនមិនព្រមបៅទឹកដោះគោ ឬ ឥរិយាបថក្នុងការបំបៅដោះកូន ជាដើម។

ចង់ដឹងអត្ថន័យពណ៌ និងរូបរាងលាមកទារក ចុចទីនេះ!

ដឹងកាលវិភាគចាក់ថ្នាំបង្ការកូននៅទីនេះ

៥- រៀបចំបន្ទប់ទារក

ប្រដាប់ប្រដារបស់ម្ចាស់បេះដូងយើងដែលត្រូវមានដូចជា គ្រែ កម្រាលគេង ខ្នើយ កន្សែង សម្លៀកបំពាក់ ស្រោមដៃជើង ស៊ាបូ ឡេ….ជាច្រើន។ ក្រៅពីនេះ ពន្លឺ ឬសីតុណ្ហភាព ក៏គួរតែពិចារណាដែរ។

ទារកទើបកើតពកក្បាល

៦- ចំណីត្រៀម

ដូចបញ្ជាក់ខាងលើ ចំណីចំណុកណាខ្លះ គួរញ៉ាំក្រោយឆ្លងទន្លេ ចំណីណាខ្លះគួរតម គឺក្នុងនាមជាប្ដី ឬបង្គោលគ្រួសារ គួរតែដឹង ឬពិភាក្សាជាមួយវេជ្ជបណ្ឌិតរួចហើយ មិនគួរខ្វះចន្លោះទេ។ ធ្វើតាមការណែនាំ ហើយរើសយកតែម្ហូប ឬចំណីណាដែលសម្បូរសារធាតុចិញ្ចឹមខ្ពស់ សម្រាប់ប្រពន្ធ (ឬទិញញ៉ាំខ្លួនឯង) ព្រោះវាមានសារៈសំខាន់ណាស់សម្រាប់ការបំបៅដោះកូន។

៧- ដំឡើងកៅអីទារកក្នុងឡាន

បើសិនក្នុងផ្ទះប្រើឡាន កៅអីរបស់អាអូនក៏គួរមានរួចស្រេច និងដាក់ខ្សែក្រវាត់ (កៅអី) ឲ្យត្រឹមត្រូវដែរ ព្រោះ ពេលគេកើត ហើយរឹងដៃរឹងជើងបន្តិច ពេលត្រូវការទៅ ណាមកណា មិនត្រូវចំណាយមនុស្សអង្គុយបីអាអូនទេ។ គេអាចគេងបានដោយស្រួល ក្នុងការធ្វើដើរ។

៨- ប្រយ័ត្នប្រតិកម្មស្បែក

ទាំងគ្រែគេងរបស់គេ (ទារក) និង ខោអាវ សុទ្ធតែត្រូវសម្អាត។ ចំណុចសំខាន់បំផុតមួយគឺ ស្បែកអាអូននៅខ្ចីណាស់។ អាចងាយប្រតិកម្មខ្លាំង (រោល) ឡើងរមាស់ ងាយមែនទែន។ ដូចនេះការបោក ខោអាវ កម្រាល(ពូក-ភួយ) ស្រោមដៃស្រោមជើង ឬកន្សែងរុំទារក ត្រូវគិតដល់សាប៊ូ (រើសសាប៊ូ សម្រាប់ទារក មានកម្រិត PH ទាប) ដែលត្រូវនឹងកម្រិតស្បែកកូន។

៩- ចម្រាញ់ឬរើសពេទ្យ

ក្នុងដំណាក់កាលលូតលាស់ ហើយឈានដល់វ័យកុមារ ការចម្រាញ់រកពេទ្យឯកទេសរោគកុមារឲ្យសមស្របលទ្ធភាពរបស់យើង ជាការណ៍ល្អដែរ ព្រោះក្មេងកំពុងលូតលាស់ (នៅខ្ចី) ងាយនឹងឈឺណាស់។ មានពេទ្យល្អ ចាំប្រឹក្សាឲ្យយោបល់ ព្យាបាល និងតាមដានច្បាស់លាស់ ពិតជាមានសារៈសំខាន់ ជាងការរត់ពីពេទ្យមួយទៅពេទ្យមួយ (ក្នុងករណីតែពេទ្យច្បាស់ប៉ុណ្ណោះ)។

ដឹងហើយថាកំពុងសប្បាយផង រវល់ផង ក្នុងនាមជាប៉ា ជាម៉ាក់គេ តែបានត្រៀមអីខ្លះហើយ?

អត្ថបទគួរអាន៖

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ យ៉ានណែត នីគែល · កែ 19/12/2023

ម៉ាក់​ៗ គួរ​ត្រៀម​អ្វីខ្លះទាំងមុនសម្រាល និងក្រោយសម្រាល?