ម៉ាក់ៗច្បាស់ជាមានអារម្មណ៍រំភើបជាខ្លាំង នៅពេលដែលទារកក្នុងផ្ទៃផ្លាស់ទីចុះឡើង ហើយវាក៏ជាសញ្ញាបញ្ជាក់ថាទារកកំពុងតែលូតលាស់ប្រកបដោយសុវត្ថិភាពផងដែរ។ យ៉ាងណាមិញ កូនក្នុងផ្ទៃមិនគ្រាន់តែចាប់ផ្ដើមធាក់នៅក្នុងផ្ទៃប៉ុណ្ណោះទេ។ ដំបូង ពួកគេពត់ក ហើយក្រោយមក ពួកគេចាប់ផ្ដើមផ្លាស់ទីទៅផ្នែកម្ខាងទៀត។ នៅអាយុចន្លោះពី១៦ ទៅ១៨សប្ដាហ៍ ទារកនឹងចាប់ផ្ដើមធាក់។
ហេតុអ្វីម៉ាក់ៗចាំបាច់រាប់ចំនួនដងកូនក្នុងផ្ទៃធាក់ពោះ?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ពិតណាស់ ការរាប់ចំនួនដងនៃការធាក់របស់ទារក គឺពិតជាសំខាន់ណាស់ នៅអំឡុងពេលមានផ្ទៃពោះ។ ការធ្លាក់ចុះនៃចលនារបស់ទារក គឺជាសញ្ញាគ្រោះថ្នាក់មួយ ពីព្រោះវាអាចបង្ហាញពីការថយចុះនៃបរិមាណទឹកភ្លោះ ឬការបែកថង់ទឹកភ្លោះ។ ដូច្នេះហើយ ស្រីៗយើងគួរពិនិត្យ និងតាមដានចំនួនដងនៅការធាក់របស់ទារកនៅក្នុងអំឡុងពេលមានផ្ទៃពោះ ចាប់ពីសប្ដាហ៍ពី២៨ ដើម្បីជៀសវាងផលវិបាកណាមួយដែលអាចកើតមានជាយថាហេតុ។
របៀបរាប់ចំនួនដងនៃការធាក់របស់ទារក
ម៉ាក់ៗគួរជ្រើសរើសពេលវេលាណាមួយ ដែលទារកមានភាពសកម្មបំផុត ដូចជានៅពេលរសៀល ឬបន្ទាប់ពីញ៉ាំអាហារតិចតួចរួចរាល់។ នៅពេលដែលម៉ាក់ៗប្រាកដថា កូនក្នុងផ្ទៃកំពុងតែភ្ញាក់ ចូរអង្គុយចុះ ដោយលើកជើងឡើង ឬគេងផ្អៀង រួចចាប់ផ្ដើមរាប់ចលនានីមួយៗ របស់ទារក ដោយកត់ត្រាអំពីពេលវេលាដែលទារកធាក់បានចំនួន១០ដង។ ជាទូទៅ ការរាប់ចំនួនដងដែលទារកធាក់ ត្រូវចំណាយពេលពី១០ ដល់១៥នាទី ប៉ុន្តែនៅពេលខ្លះ វាអាចចំណាយពេលរហូតដល់ទៅ២ម៉ោង។ សម្រាប់ស្រីៗដែលលើសទម្ងន់ អាចមានការពិបាកក្នុងការរាប់ចំនួនដងនៃការធាក់របស់ទារកជាងស្រីៗដែលមានទម្ងន់ខ្លួនធម្មតា។
ពេលណាដែលម៉ាក់ៗគួរទៅជួបគ្រូពេទ្យ?
ប្រសិនបើម៉ាក់ៗចំណាយពេលលើសពី២ម៉ោង ក្នុងការរាប់ចំនួនធាក់១០ដង ម៉ាក់ៗគួរចាប់ផ្ដើមទៅពិគ្រោះយោបល់ជាមួយនឹងគ្រូពេទ្យជំនាញ។ គ្រូពេទ្យអាចនឹងធ្វើតេស្តដើម្បីពិនិត្យអំពីចង្វាក់បេះដូងរបស់ទារក។ បើទោះបីជាស្ថានភាពនេះ មិនមានគ្រោះថ្នាក់ដល់អាយុជីវិតយ៉ាងណាក្តី ក៏ម៉ាក់ៗគប្បីមានការប្រុងប្រយ័ត្នឲ្យបានដិតដល់ផងដែរ។ បន្ថែមពីនេះ ប្រសិនបើយើងសម្គាល់ឃើញពីការធ្លាក់ចុះនៃចលនារបស់ទារក ចូរទៅពិគ្រោះយោបល់ជាមួយនឹងគ្រូពេទ្យភ្លាមៗ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម