គ្នាយើងជាច្រើនប្រហែលជាឆ្ងល់ហើយថា ហេតុអ្វីរាល់ពេលផឹកគ្រឿងស្រវឹងតែងតែធ្វើឲ្យឈឺនោមញឹក ពិសេសពពួកស្រាបៀរតែម្ដង។ មិនខុសនោះទេ ពពួកជាតិអាល់កុលដែលត្រូវបានប្រើប្រាស់ជាគ្រឿងផ្សំក្នុងសា្របៀរគឺអាចធ្វើឲ្យយើងនោមញឹក ធេងធោង និង ឈឺក្បាល។
ចង់គណនារង្វាស់ចង្វាក់បេះដូង ចុចទីនេះ!
នៅពេលយើងផឹកគ្រឿងស្រវឹង ជាតិអាល់កុលនឹងជ្រាបចូលតាមសរសៃឈាមតាមរយៈក្រពះ និង ពោះវៀនតួច ហើយបន្ដជ្រាបចូលតាមសរីរាង្គផ្សេងៗទៀត មានថ្លើម តម្រងនោម ខួរក្បាល និង បេះដូងជាដើម។ មូលហេតុដែលផឹកស្រាបៀរធ្វើឲ្យយើងនោមញឹក នោះក៏ព្រោះតែ ជាតិអាល់កុលបានរារាំងខួរក្បាលក្នុងការបញ្ចេញអ័រម៉ូនម្យ៉ាងឈ្មោះថា vasopressin។
Vasopressin គឺជាអ័រម៉ូនមានតួនាទីគ្រប់គ្រង និង ត្រួតពិនិត្យជាតិទឹកក្នុងសរសៃឈាម ឬជាប្រភេទអ័រម៉ូនម្យ៉ាងដែលគេស្គាល់ច្បាស់បំផុត គឺអ័រម៉ូនប្រឆាំងការបញ្ចុះជាតិទឹកពីក្នុងឈាមតាមរយៈតម្រងនោម ទម្រង់ជាទឹកនោម។ អ័រម៉ូននេះធ្វើការស្និទ្ធបំផុតជាមួយ ខួរក្បាលនឹងតម្រងនោម នៅពេលខួរក្បាលរងសម្ពាធពីជាតិអាល់កុលខ្លាំង នោះដំណើរការផលិតអ័រម៉ូននេះខ្សោយ មិនអាចគ្រប់គ្រងជាតិទឹកបានល្អ ទើបតម្រងនោមបញ្ចុះជាតិទឹកច្រើន ចូលមកកាន់ប្លោកនោម ធ្វើឲ្យយើងនោមញឹក។ បន្ថែមពីនោះស្រាបៀរក្រៅពីមានជាតិអាល់កុល ក៏មានជាតិទឹកចន្លោះពី ៧៥ ទៅ ៩០%ផងដែរ។
តើការនោមច្រើនក្នុងកំលុងផឹកស្រាអាចបណ្ដាលឲ្យរាងកាយប្រឈមខ្វះជាតិទឹកដែរទេ?
ការនោមច្រើនក្នុងកំលុងផឹកស្រាបៀរនឹងធ្វើឲ្យរាងកាយប្រឈមខ្សោះជាតិទឹក។ ព្រោះជាតិអាល់កុលក្នុងស្រាបៀរនឹងធ្វើយើងនោមច្រើន មិនតែប៉ុណ្ណោះ ក៏ធ្វើឲ្យរាងកាយយើងប្រឈម ផលវិបាកជាច្រើនទៀតដូចជា៖
- ឈឺក្បាល
- វិលមុខ
- ស្ងួតស្បែក
- សម្បុរស្រអាប់
- ស្ងួតបបូរមាត់
- ខ្សោយការគិត
- ខ្សោយកម្លាំង
- ខ្សោយសាច់ដុំ
- បាត់បង់ការផ្ចង់អារម្មណ៍
- ចុះខ្សោយមុខងារប្រព័ន្ធប្រសាទកណ្ដាល។
ដើម្បីកាត់បន្ថយការថយចុះជាតិទឹកក្នុងរាងកាយ យើងត្រូវកំណត់ការផឹក ក្នុងបរិមាណតិច សម្រាប់បុរសច្រើនបំផុតគឺ ចំណុះ ៧០០មិល្លីលីត្រ ក្នុងមួយថ្ងៃ សម្រាប់ស្ដ្រីច្រើនបំផុត ៥៥០ មិល្លីលីត្រក្នុងមួយថ្ងៃ។ បន្ថែមពីនោះត្រូវផឹកទឹកឲ្យបានច្រើន មុនពេលផឹកស្រា។
