យើងអាចរមាស់ស្បែកក្រោយមុជទឹកសមុទ្រ ដែលបញ្ហានេះឧស្សាហ៍កើតឡើងនៅរដូវក្តៅដោយសារការប៉ះនឹងខ្ញែរសមុទ្រ ឬត្រូវកូនខ្ញែរសមុទ្រល្អិតៗដែលយើងមិនអាចមើលឃើញដោយភ្នែកទទេរខាំ ហើយបង្កជាប្រតិកម្មលើស្បែក។ ប្រសិនបើយើងមាស់ស្បែកក្រោយមុជទឹកសមុទ្ររួច គួរធ្វើបែបណាដើម្បីកាត់បន្ថយអាការៈ?
ពេលយើងកំពុងមុជទឹកក្នុងសមុទ្រ យើងអាចមានអារម្មណ៍ស្កៀបៗ ហើយបន្ទាប់ពីនោះពីរបីម៉ោង ឬបន្ទាប់ពីមុជទឹកសមុទ្ររួច យើងអាចមានអាការៈឡើងកន្ទួលរមាស់លើខ្លួនជាពិសេសនៅក្លៀក ក្រលៀន ទ្រូង ភ្លៅ និងក។
អាការៈរមាស់ស្បែកក្រោយមុជទឹកសមុទ្រអាចខុសគ្នាពីមនុស្សម្នាក់ទៅមនុស្សម្នាក់ទៀតអាស្រ័យលើប្រតិកម្មរបស់រាងកាយយើង ប៉ុន្តែអ្នកដែលធ្លាប់មានបញ្ហារមាស់ស្បែកក្រោយមុជទឹកសមុទ្រអាចងាយនឹងមានប្រតិកម្មនេះម្តងទៀតជាងអ្នកដែលមិនធ្លាប់។
វេជ្ជបណ្ឌិត Mebane អតីតនាយករងផ្នែកវេជ្ជសាស្ត្រនៅ Divers Alert Network (DAN) បានលើកឡើងថា អ្នកដែលមានប្រវត្តិមានប្រតិកម្មអាលែកហ៊្សី ក៏ដូចជាអ្នកដែលមានប្រព័ន្ធការពាររាងកាយខ្សោយអាចមានហានិភ័យខ្ពស់ក្នុងមានអាការៈរមាស់ស្បែកធ្ងន់ធ្ងរក្រោយមុជទឹកសមុទ្រ។
ក្នុងករណីអាការៈរមាស់ស្បែកក្រោយមុជទឹកសមុទ្រមានសភាពធ្ងន់ធ្ងរ យើងអាចមានអាការៈដូចជា៖
- គ្រុន ឬញាក់
- ចង្អោរ ឬក្អួត
- ឈឺក្បាល
- អស់កម្លាំង (ជាពិសេសកុមារ)
- រលាកបង្ហួរនោម
- ភ្នែកឡើងពណ៌ក្រហម
ដើម្បីកាត់បន្ថយអាការៈរមាស់ស្បែកក្រោយមុជទឹកសមុទ្រ យើងអាចសាកល្បងតាមវិធីសាស្រ្តដូចខាងក្រោម៖
១. កុំជូត ឬអេះស្បែក
ការជូត ឬអេះស្បែកមិនត្រឹមតែមិនអាចបំបាត់អាការៈរមាស់ស្បែកក្រោយមុជទឹកសមុទ្រទេ តែបែរជាធ្វើឱ្យស្បែកយើងកាន់តែមានសភាពធ្ងន់ធ្ងរជាងមុនទៅវិញ។ ដូច្នេះបន្ទាប់ពីមុជទឹកសមុទ្ររួច ជំនួសឱ្យការជូតស្បែក យើងអាចយកកន្សែងមកផ្តិតស្បែកថ្នមៗ។
២. ងូតទឹក
យើងគួរដោះសម្លៀកបំពាក់មុជទឹកសមុទ្រចេញភ្លាមបន្ទាប់ពីមានអាការៈរមាស់ រួចសម្អាតខ្លួនជាមួយទឹកស្អាត និងសាប៊ូដើម្បីសម្អាតខ្ញែរសមុទ្រឱ្យចេញអស់ពីលើស្បែក។
៣. លាបទឹកខ្មេះ ឬអាល់កុល
យើងអាចយកសំឡីជ្រលក់ទឹកខ្មេះ ឬអាល់កុលមកលាបលើស្បែកដើម្បីកាត់បន្ថយអាការៈរមាស់ និងកម្ចាត់ខ្ញែរសមុទ្រដែលតោងជាប់ស្បែក រួចទុកឱ្យស្បែកស្ងួតដោយខ្លួនឯង។
ចង់គណនារង្វាស់ចង្វាក់បេះដូង ចុចទីនេះ!
ចង់ពិនិត្យសុខភាពប្រព័ន្ធរំលាយអាហារ ចុចទីនេះ!
៤. ស្អំទឹកកក
យើងអាចរុំទឹកកកជាមួយកន្សែងពោះគោ រួចស្អំលើស្បែកដើម្បីកាត់បន្ថយអាការៈរមាស់។ លើសពីនេះទៅទៀត យើងក៏អាចត្រាំក្រណាត់ក្នុងទឹកត្រជាក់ រួចពូតទឹកឱ្យស្ងួតបន្តិច ហើយយកមកស្អំលើស្បែកដែលរមាស់ដែរ។ យើងអាចធ្វើបែបនេះពីរបីដងក្នុងមួយថ្ងៃរហូតដល់ជា។
៥. ញុំាថ្នាំប្រឆាំងនឹងអ៊ីស្តាមីន (ថ្នាំអាលែកហ្ស៊ី)
ថ្នាំអាលែកហ្ស៊ីអាចជួយបំបាត់អាការៈរមាស់ដោយរារាំងសកម្មភាពរបស់អ៊ីស្តាមីនដែលនឹងបញ្ឈប់ការជំរុញឱ្យស្បែករមាស់ និងឡើងកន្ទួលរមាស់កាន់តែខ្លាំង។ ទោះបីជាយ៉ាងណាក៏ដោយ សម្រាប់កូនតូចមុននឹងឱ្យអាអូនញុំាថ្នាំអាលែកហ្ស៊ី ម៉ាក់ប៉ាគួរពិគ្រោះជាមួយគ្រូពេទ្យសិន។
[embed-health-tool-bmr]
៦. លាបគ្រីម Hydrocortisone
យើងក៏អាចលាបគ្រីម Hydrocortisone ពីរបីដងក្នុងមួយថ្ងៃដើម្បីកាត់បន្ថយអាការៈរមាស់ស្បែកដែរ ប៉ុន្តែយើងមិនអាចលាបគ្រីមនេះឱ្យអាអូនដែលមានអាយុក្រោម ២ ឆ្នាំទេ។ ជាងនេះទៅទៀត យើងក៏មិនអាចលាបគ្រីមនេះលើប្រដាប់ភេទ និងគូទក្មេងដែលមានអាយុក្រោម ១២ ឆ្នាំដែរ។
អាការៈរមាស់ស្បែកក្រោយមុជទឹកសមុទ្រអាចកើតឡើងវិញ ប្រសិនយើងស្លៀកសម្លៀកបំពាក់មុជទឹកសមុទ្រដែលមិនបានត្រាំជាមួយទឹកខ្មេះ ឬអាល់កុលដើម្បីកម្ចាត់ខ្ញែរសមុទ្រដែលតោងជាប់សម្លៀកបំពាក់ មុនពេលបោកសម្អាតជាមួយនឹងសាប៊ូបោកខោអាវ។ ប្រសិនបើយើងមានអាការៈរមាស់ស្បែកក្រោយមុជទឹកសមុទ្រធ្ងន់ធ្ងរ យើងគួរបោះចោលឈុតងូតទឹកនោះតែម្តង។
អត្ថបទគួរអាន៖
- តិចនិកកម្ចាត់ខ្លាញ់កកក្រោមស្បែកភ្លៅ ស្រីៗយើងចែកគ្នាដឹង
- ប្រែបបូរមាត់ពីខ្មៅស្រអាប់ទៅជាទន់ល្មើយផ្កាឈូក ដោយរូបមន្ត ៨ យ៉ាងនេះ
- គួរជ្រើសរើសក្រែមលាបមាត់បែបណាទើបសុវត្ថិភាព?
- តិចនិកថែទាំស្បែកមុខ ការពារកុំឲ្យឡើងអាចម៍រុយផ្ដេសផ្ដាស
- ចង់បានស្បែកស្អាត ដោយមិនបាច់លាបឡេ គួរញុំា និងចៀសវាងអាហារទាំងនេះ
- វិធីសាស្រ្ត ៦យ៉ាង ជួយការពារខ្លួនពីបញ្ហាកើតស្រែង
ចំណុចសំខាន់
- កុំជូត ឬអេះស្បែក
- ងូតទឹក
- លាបទឹកខ្មេះ ឬអាល់កុល
- ស្អំទឹកកក
- ញុំាថ្នាំប្រឆាំងនឹងអ៊ីស្តាមីន (ថ្នាំអាលែកហ្ស៊ី)
- លាបគ្រីម Hydrocortisone
