៤ ចំណុច គួរដឹងពីជំងឺមហារីកសុដន់ កុំឲ្យចេះតែបារម្ភ!

គ្នាយើងស្រីៗពិតជាធ្លាប់បានឮពីជំងឺមហារីកសុដន់ហើយ ដែលជំងឺនេះមានការអះអាងថាច្រើនកើតលើស្រីវ័យចំណាស់ ប៉ុន្តែក៏អាចកើតមានលើស្រ្តីវ័យក្មេងដែរ។ ការដឹងព័ត៌មានបានច្រើនពីជំងឺមួយនេះ នឹងអាចជួយយើងដឹងថាពេលណាគួរទៅជួបពេទ្យ និងអាចទទួលបានការធ្វើរោគវិនិច្ឆ័យត្រឹមត្រូវ។

ទាំងនេះជាចំណុចខ្លះៗដែលស្រ្តីយើងគួរដឹងពីជំងឺមហារីកសុដន់។

១. ដុំលើសុដន់មិនមែនសុទ្ធតែជាដុំសាច់មហារីក

ភាគរយតិចតួចប៉ុណ្ណោះដែលដុំនៅលើសុដន់អាចវិវត្តទៅជាជំងឺមហារីក។ សម្រាប់ស្រ្តីជាច្រើន ពេលខ្លះយើងបានស្ទាបប៉ះដុំកោសិកាសុដន់ តែគិតថាជាដុំសាច់អាចបង្កជាជំងឺមហារីក តែវាមិនមែននោះទេ និងដុំខ្លះទៀត អាចជាដុំគីសទឹក។

ប៉ុន្តែ បើសិនជាស្រីៗយើងសង្កេតឃើញថាដុំនៅលើសុដន់មានជាប់មិនបាត់ ឬសម្គាល់ឃើញថាជាលិកាសុដន់ប្រែប្រួល ចូរកុំស្ទាក់ស្ទើរក្នុងការទៅជួបប្រឹក្សាជាមួយគ្រូពេទ្យ។ គ្រូពេទ្យអាចពិនិត្យ និងវិនិច្ឆ័យដឹងថាដុំទាំងនោះជាដុំសាច់មហារីក ឬយ៉ាងណា។

ចង់គណនា BMR ចុចទីនេះ !

ចង់ពិនិត្យជំងឺមហារីកសុដន់ ចុចទីនេះ !

ចង់ពិនិត្យជំងឺមហារីកមាត់ស្បូន ចុចទីនេះ !

ចង់គណនាថ្ងៃមេជីវិតញីទុំធ្លាក់ ចុចទីនេះ !

២. បុរសក៏អាចកើតមហារីកសុដន់

ក្នុងចំណោមអ្នករកឃើញថាមានជំងឺមហារីកសុដន់ មានតិចជាងមួយភាគរយជាបុរស។ ថ្វីបើចំនួននេះបង្ហាញថាឱកាសនៃការកើតជំងឺមហារីកសុដន់លើបុរសមានតិច តែអ្នកជំនាញថាប្រុសៗក៏គួរឧស្សាហ៍ពិនិត្យដោះខ្លួនឯងផងដែរ។ ប្រុសយើងអាចពិនិត្យដោះរបស់ខ្លួនពេលងូតទឹក ដើម្បីរកមើលក្រែងមានអ្វីប្លែកនៅជុំវិញសុដន់។

មហារីកសុដន់លើបុរស ភាគច្រើនរកឃើញដោយសារមានដុំនៅលើសុដន់។ ចំណែកការមានទឹកចេញតាមចុងសុដន់ គឺជាសញ្ញាព្រមានមួយសម្រាប់ប្រុសៗអំពីជំងឺមហារីកសុដន់។

៣. មហារីកសុដន់ពាក់ព័ន្ធនឹងប្រវត្តិគ្រួសារមានអត្រាទាប

ថ្វីបើប្រវត្តិគ្រួសារមានជំងឺមហារីកសុដន់ បានធ្វើឲ្យយើងស្ថិតក្នុងក្រុមមនុស្សប្រឈមខ្ពស់ក្នុងការកើតជំងឺមហារីកសុដន់ ប៉ុន្តែតាមការសិក្សាកន្លងមកអ្នកមានប្រវត្តិគ្រួសារកើតជំងឺមហារីកសុដន់ ហើយរកឃើញថាមានជំងឺនេះដែរ គឺមានតែក្នុងរង្វង់១០ ទៅ១៥ភាគរយប៉ុណ្ណោះ។

ក្រុមអ្នកស្រាវជ្រាវលើកឡើងថា ទោះបីជាយើងស្ថិតក្នុងគ្រួសារមានប្រវត្តិកើតជំងឺមហារីកសុដន់ តែមិនមែនមានន័យថាយើងត្រូវកើតជំងឺនេះទេ។ យ៉ាងណា គ្រូពេទ្យបានណែនាំថាបើគ្រួសារយើងមានប្រវត្តិកើតជំងឺមហារីកសុដន់ យើងគួរតែតាមដានជំងឺនេះឲ្យបានលឿនតាមដែលអាចធ្វើទៅបាន គឺយ៉ាងហោចណាស់ឲ្យបាន១០ឆ្នាំ មុនវ័យដែលសមាជិកគ្រួសារណាមួយរកឃើញថាមានជំងឺនេះ។

មួយវិញទៀត បើសិនជាក្នុងសមាជិកគ្រួសារយើងមានច្រើនគ្នាបានកើតជំងឺមហារីកដោះ ពិសេសកើតនៅវ័យក្រោម៥០ឆ្នាំ នោះអាចថាបញ្ហាហ្សែនបានរួមចំណែកឲ្យកើតមានជំងឺមហារីកដោះនេះដែរ។

មហារីកសុដន់១

៤. ឈឺសុដន់ ជារឿងធម្មតាមិនមែនជាសញ្ញាជំងឺមហារីក

ការឈឺសុដន់ជារោគសញ្ញាទូទៅមួយកើតមានលើស្រ្តីភាគច្រើន ប៉ុន្តែកម្រជាសញ្ញានៃជំងឺមហារីកសុដន់ណាស់។ ជាង៦០ភាគរយនៃមនុស្សស្រី អាចនឹងមានជួបបញ្ហាឈឺសុដន់ក្នុងជីវិតរបស់ខ្លួន ដែលនេះភាគច្រើនទាក់ទងនឹងការប្រែប្រួលអ័រម៉ូន ឬពាក់អាវទ្រនាប់មិនត្រូវនឹងទំហំសុដន់។

ក្រុមអ្នកស្រាវជ្រាវរកឃើញថា ស្រ្តីភាគច្រើនជួបបញ្ហាឈឺសុដន់ ហើយមានតិចជាង១ភាគរយ រកឃើញថាមានជំងឺមហារីកសុដន់។

ដើម្បីដឹងទាន់ពេល និងអាចទទួលការព្យាបាលបានលឿន វាជាការសំខាន់ណាស់ដែលស្រីៗយើងចេះសង្កេតលើការប្រែប្រួលរបស់សុដន់។ បើយើងឃើញមានអ្វីប្លែកលើសុដន់ ឬប្រែប្រួលច្រើន យើងគួរពិភាក្សាជាមួយគ្រូពេទ្យ ដើម្បីបានការពិនិត្យតាមដាន និងធ្វើរោគវិនិច្ឆ័យត្រឹមត្រូវ។

អត្ថបទគួរអាន៖

ត្រួតពិនិត្យដោយ គ្រូពេទ្យឯកទេស.វេជ្ជ. ចាន់ ស៊ីណេតឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ទូច សុខា · កែ 22/10/2024

៤ ចំណុច គួរដឹងពីជំងឺមហារីកសុដន់ កុំឲ្យចេះតែបារម្ភ!

១. ដុំ​លើ​សុដន់​មិន​មែន​សុទ្ធតែ​ជា​ដុំ​សាច់​មហារីក

​​២. បុរស​ក៏​អាច​កើត​មហារីក​សុដន់

៣. មហារីក​សុដន់​ពាក់ព័ន្ធ​នឹង​ប្រវត្តិ​គ្រួសារ​មាន​អត្រា​ទាប​

៤. ឈឺ​សុដន់ ជា​រឿង​ធម្មតា​មិន​មែន​ជា​សញ្ញា​ជំងឺ​មហារីក

១. ដុំលើសុដន់មិនមែនសុទ្ធតែជាដុំសាច់មហារីក

២. បុរសក៏អាចកើតមហារីកសុដន់

៣. មហារីកសុដន់ពាក់ព័ន្ធនឹងប្រវត្តិគ្រួសារមានអត្រាទាប

៤. ឈឺសុដន់ ជារឿងធម្មតាមិនមែនជាសញ្ញាជំងឺមហារីក