គ្នាយើងមានចំណាំមើល៍អត់ ឲ្យតែពេលយើងញ៉ាំស្រា ឬស្រាបៀរ រាងកាយមានអារម្មណ៍ថាក្ដៅ ចេញចំហាយក្ដៅភាយៗពីក្នុងខ្លួនមក។ មានគ្នាយើងខ្លះគិតថា នៅក្នុងរដូវរងា ឬក្នុងថ្ងៃដែលអាកាសធាតុចុះត្រជាក់ ដាក់ស្រា ១-២ កែវ អាចជួយរក្សាកម្ដៅក្នុងរាងកាយ និងផ្ដល់ភាពកក់ក្ដៅឲ្យយើងបានថែមទៀត។ តើការផឹកភេសជ្ជៈជាតិអាល់កុលក្នុងខែរងា ពិតជាអាចផ្ដល់ភាពកក់ក្ដៅដល់យើងមែន ឬយ៉ាងណា?

យើងប្រហែលគិតថា គ្រឿងស្រវឹងអាចជាភេសជ្ជៈល្អមួយពេលអាកាសធាតុត្រជាក់ ព្រោះផឹកទៅ វាបង្កើតអារម្មណ៍កក់ក្ដៅដល់រាងកាយយើង។ ប៉ុន្តែតាមការស្រាវជ្រាវកន្លងមក ស្រាកាត់បន្ថយសីតុណ្ហភាពស្នូលនៃរាងកាយរបស់យើង និងបង្កើនហានិភ័យដល់អាការៈថយចុះកម្ដៅ របស់រាងកាយយើងវិញ។ នេះបើតាមការឲ្យដឹងពីលោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។

ជាតិអាល់កុលពង្រីកសរសៃឈាមក្នុងខ្លួនយើង ជាហេតុធ្វើឲ្យយើងមានអារម្មណ៍កក់ក្ដៅបានតែដំបូង តែវាធ្វើឲ្យរាងកាយយើងពិបាកក្នុងការពង្រួមសរសៃឈាមមកធម្មតាវិញដែរ។ ក្រោយពេលផឹកស្រាបានមួយកែវរួចមក រាងកាយយើងនឹងព្យាយាមប្រឆាំងកម្ដៅ ដែលបណ្ដាលមកពីការកើនឡើងលំហូរឈាមទៅស្បែក ដោយបង្កើនអត្រានៃការបែកញើស ជាលទ្ធផលបណ្ដាលឲ្យរាងកាយយើងបាត់បង់សីតុណ្ហភាពក្ដៅកាន់តែខ្លាំង។

វេជ្ជបណ្ឌិតរូបនេះបន្ថែមទៀតថា ក្នុងករណីដែលយើងមានបញ្ហា រាងកាយចុះកម្ដៅ វាក៏ផ្ដល់ជាផលវិបាកច្រើនគួរឲ្យកត់សម្គាល់ដូចជា៖

– ស្លាប់ជាលិការាងកាយ (កើតឡើងនៅពេលដែលជាលិការាងកាយកក)

– រលាកចុងដៃចុងជើង ដោយសារត្រជាក់

– របួសដោយសារត្រជាក់

– រលួយជើង។ល។

និយាយរួម បញ្ហានៃការចុះកម្ដៅរាងកាយ ឬ hypothermia ត្រូវការព្យាបាលជាបន្ទាន់ដើម្បីទប់ស្កាត់ផលវិបាកដូចដែលបានរៀបរាប់ខាងលើកើតឡើង។ ប្រសិនបើយើងរង់ចាំកាន់តែយូរ យើងនឹងអាចជួបផលវិបាកដោយសារការចុះកម្ដៅរាងកាយកាន់តែច្រើន។

ចង់គណនា BMR ចុចទីនេះ !

ចង់ពិនិត្យជំងឺមហារីកសុដន់ ចុចទីនេះ !

ចង់ពិនិត្យជំងឺមហារីកមាត់ស្បូន ចុចទីនេះ !

ចង់គណនាថ្ងៃមេជីវិតញីទុំធ្លាក់ ចុចទីនេះ !

លើសពីនេះ យើងក៏អាចការពារខ្លួនយើងពីបញ្ហាឡើងត្រជាក់ ឬរក្សាសីតុណ្ហភាពខ្លួនឲ្យបានល្អក្នុងអាកាសធាតុត្រជាក់ដោយមិនចាំបាច់ប្រើគ្រឿងស្រវឹងបានដោយ ស្លៀកសំលៀកបំពាក់ច្រើនជាន់ ពាក់ស្រោមដៃ ស្រោមជើង និងចៀសវាងរាងកាយសើមក្នុងរយៈពេលយូរដូចជាពេលហែលទឹក ឬងូតទឹកជាដើម

អត្ថបទគួរអាន៖

ពិតអត់ អាកាសធាតុត្រជាក់ ផឹកស្រាជួយរក្សាកម្ដៅខ្លួនមិនឲ្យរងា?