សម្រាប់គ្នាយើងនិយមញ៉ាំត្រីឆៅ ពិសេសត្រី Tuna នាំចេញពីប្រទេសវៀតណាម ត្រូវប្រុងប្រយ័ត្នផង ពេលនេះអាមេរិក រកឃើញបាក់តេរីឈ្មោះ Salmonlla ក្នុងសាច់ត្រី Tuna ឆៅ ទាំងនោះ ដែលកំពុងឆ្លងនៅអាមេរិក ដល់ទៅ ៧ រដ្ឋ។

មជ្ឈមណ្ឌលគ្រប់គ្រង និងបង្ការជំងឺ នៅអាមេរិក CDC បានព្រមាន ពាក់ព័ន្ធការញ៉ាំសាច់ត្រី Tuna ផ្គត់ផ្គង់ដោយក្រុមហ៊ុន JK Fish របស់ប្រទេសវៀតណាម នឹងចែកចាយក្នុងទឹកដីរបស់ខ្លួន ដោយក្រុមហ៊ុនអាមេរិក Jensen Tuna។

ការព្រមានរបស់ CDC ធ្វើឡើងបន្ទាប់ពីមនុស្ស ១៣នាក់ ក្នុងរដ្ឋចំនួន ៧ ឆ្លងបាក់តេរី Salmonella ដែលជាបាក់តេរីម្យ៉ាងបង្កឲ្យយើងមានបញ្ហាពោះវៀន ដូចជាគ្រុនពោះវៀនដើម។

អ្នកជំងឺ ២នាក់ ក្នុងចំណោម ១៣នាក់ ត្រូវគេបញ្ជូនទៅព្យាបាល និងសម្រាកនៅមន្ទីរពេទ្យ ប៉ុន្ដែពុំមានសេចក្តីពាក់ព័ន្ធករណីមានអ្នកស្លាប់ ដោយការឆ្លងបាក់តេរីនេះទេ។ ក្រុមហ៊ុន Jensen Tuna បានឲ្យអ្នកចែកចាយ ក្នុងរដ្ឋទាំង ៧ យកត្រី Tuna ត្រឡប់មកវិញ ដោយត្រី Tuna ទាំងនោះ មាន ៣ក្រុម ភ្ជាប់លេខកូតទំនិញ Z266, Z271 និង Z272។

មជ្ឈមណ្ឌលគ្រប់គ្រង និងបង្ការជំងឺ របស់អាមេរិក ប្រកាសថា អតិថិជន បញ្ជាទិញ Sushi ធ្វើពីត្រី Tuna ឆៅ ពីភោជនីយដ្ឋាន និងហាងនានា គួរសួរជាមុន ថាតើត្រី Tuna នោះ ផ្គត់ផ្គង់ដោយ ក្រុមហ៊ុន Jensen Tuna ឬទេ? ហើយប្រសិនបើមិនច្បាស់ កុំញ៉ាំត្រី Tuna នោះអី។

រោគសញ្ញា ឆ្លងបាក់តេរី Salmonella រួមមាន រាក គ្រុនក្ដៅ និងចុកពោះ រយៈពេល ១២-៧២ ម៉ោង ក្រោយញ៉ាំត្រី Tuna មានផ្ទុកបាក់តេរីនោះ។ ជំងឺនេះ កើតយូរបំផុតពី ៣-៧ថ្ងៃ ហើយមនុស្សជាច្រើន អាចធូរស្រាលវិញ ដោយមិនចាំបាច់ព្យាបាលនោះទេ។

អត្ថបទពាក់ព័ន្ធ៖

គួរបញ្ជាក់ថា ក្មេងក្រោម ៥ឆ្នាំ មនុស្សចាស់លើស ៦៥ឆ្នាំ និងអ្នកមានប្រព័ន្ធការពារខ្សោយ ប្រឈមខ្ពស់ងាយនឹងឆ្លងបាក់តេរីប្រភេទនេះ ខណៈផលប៉ះពាល់ក៏ស្ថិតក្នុងកម្រិតខ្ពស់ដូចគ្នា។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ប្រយ័ត្ន​ផង! ត្រី Tuna របស់​ក្រុមហ៊ុនមួយនៅ​​វៀតណាម មានផ្ទុក​បាក់តេរី

ប្រយ័ត្នផង! ត្រី Tuna របស់ក្រុមហ៊ុនមួយនៅវៀតណាម មានផ្ទុកបាក់តេរី