គ្នាយើងប្រុសៗបើឃើញថាទឹកកាមមានពណ៌សដូចសម្លី ឬពណ៌ប្រផេះ នោះអាចនិយាយបានថាទឹកកាមយើងមានសុខភាពល្អធម្មតាទេ ប៉ុន្តែបើឃើញមានពណ៌ក្រហម ឬលឿងវិញ គឺអាចមានបញ្ហាហើយ។
នៅក្នុងទឹកកាមរបស់យើងមិនមែនមានតែមេជីវិតមួយមុខនោះទេ គឺទឹកកាមដែលមានសុខភាពល្អ មានផ្ទុកនូវជាតិរ៉ែ វីតាមីន អង់ហ្សីម antioxidants ប្រូតេអ៊ីន និងស្ករទៀតផង។ អ្វីទាំងនេះគឺជួយទ្រទ្រង់ និងការពារមេជីវិតពីកត្តាបរិស្ថានផ្សេងៗ។
ចំពោះរឿងថាទឹកកាមប្រែពណ៌អាចថាក្នុងទឹកកាមមានលាយជាមួយសារធាតុផ្សេងទៀត ដូចជាឈាម ទឹកនោម ឬក៏សារធាតុរាវផ្សេងទៀតនៅក្នុងប្រព័ន្ធបន្តពូជ ឬក៏បង្ហួរនោម។
១. ទឹកកាមប្រែជាពណ៌ក្រហម ឬផ្កាឈូក
បើទឹកកាមយើងប្រែជាពណ៌ក្រហម ផ្កាឈូក ឬពណ៌ត្នោត នោះអាចថាជារឿងមួយគួរឲ្យបារម្ភដែរ ប៉ុន្តែការសិក្សាមួយធ្វើឡើងកាលពីឆ្នាំ២០១៧ ថាបញ្ហានេះក៏អាចបង្កឡើងដោយបញ្ហាធម្មតាមួយចំនួន ហើយមិនគ្រោះថ្នាក់នោះដែរ។
ការខូចខាតសរសៃឈាម
ការខូចខាតសរសៃឈាមណាមួយក៏អាចធ្វើឲ្យបរិមាណឈាមតិចតួចចូលទៅលាយឡំជាមួយទឹកកាមបាន និងនាំឲ្យទឹកកាមប្រែពណ៌។ ការប្រែពណ៌នេះអាចប្រែជាផ្កាឈូក និងបន្តទៅជាក្រហម ឬក៏ជាពណ៌ត្នោតស្រាល។ ការខូចសរសៃឈាមនេះអាចបណ្ដាលមកពីយើងមានរបួស ឬរួមភេទខ្លាំងៗពេក ឬក៏មកពីការសម្រេចកាម។ បើសិនជាការប្រែពណ៌ទាំងនេះឆាប់បាត់ទៅវិញ និងមិនមានបញ្ហាអ្វីថែមនោះទេ ការប្រែប្រួលនេះមិនបង្កជាគ្រោះថ្នាក់នោះទេ។
ឆ្លងមេរោគ
ករណីឆ្លងមេរោគមួយចំនួនក៏អាចបង្កឲ្យមានឈាមនៅក្នុងទឹកកាមដែរ ដែលទឹកកាមអាចប្រែពណ៌ទៅតាមសភាពនៃឈាម។ ដូចនេះហើយ យើងគួរតែពិនិត្យមើលថាយើងមានឆ្លងមេរោគអ្វីឬយ៉ាងណា។
បញ្ហាប្រូស្តាត
បើប្រូស្តាតយើងមានបញ្ហា ក៏អាចធ្វើឲ្យទឹកកាមប្រែប្រួលដែរ។ ផលវិបាកផ្សេងៗកើតមានលើប្រូស្តាតអាចបណ្ដាលមកពី ការរលាកប្រូស្តាត វះកាត់ប្រូស្តាត ច្រឹបសាច់ប្រូស្តាត និងមហារីកប្រូស្តាត។
សម្ពាធឈាមខ្ពស់
ផលវិបាកនានាកើតចេញពីបញ្ហាសម្ពាធឈាមខ្ពស់ គឺអាចបង្កការរំខានមួយចំនួនដល់ប្រព័ន្ធក្នុងរាងកាយរបស់យើង។ ក្នុងនោះ ប្រព័ន្ធបន្តពូជក៏អាចត្រូវរងការរំខានដែរ ដោយអាចមានឈាមចូលទៅក្នុងទឹកកាម និងធ្វើឲ្យទឹកកាមប្រែពណ៌។
[embed-health-tool-heart-rate]
២. ទឹកកាមប្រែជាពណ៌ត្នោត
ខាងក្រោមនេះជាហេតុផលមួយចំនួនដែលទឹកកាមប្រុសៗយើងប្រែជាពណ៌ត្នោត៖
ពេលមានរបួស និងហូរឈាមច្រើន
ទឹកកាមពណ៌ត្នោត ឬពណ៌ខ្មៅអាចជាសញ្ញានៃការហូរឈាមធ្ងន់ធ្ងរ ឬឈាមមាននៅក្នុងរាងកាយក្នុងរយៈពេលយូរ។ បញ្ហានេះអាចកើតមាន ដោយសារតែយើងមានរបួសធ្ងន់ ដូចជារបួសនៅត្រង់ប្រដាប់បន្តពូជ ឬឆ្អឹងខ្នងជាដើម។
ជាតិលោហៈ
បើក្នុងខ្លួន និងឈាមយើងមានជាតិលោហៈច្រើនក៏អាចធ្វើឲ្យទឹកកាមយើងមានពណ៌ខ្មៅបានដែរក្នុងករណីខ្លះ។
កាលពីឆ្នាំ២០១៣ មានការសិក្សាមួយបង្ហាញថាពេលទឹកកាមមានពណ៌ខ្មៅ គឺក្នុងឈាមមនុស្សប្រុសយើងសម្បូរទៅដោយលោហៈ ដូចជាមង់ហ្គាណេស នីកែល និងសំណ។
៣. ទឹកកាមពណ៌លឿង
ចំពោះករណីទឹកកាមយើងប្រែជាពណ៌លឿងវិញគឺអាចមកពីមូលហេតុមួយចំនួននេះ៖
ឆ្លងមេរោគ
ការប្រែប្រួលពណ៌ទឹកកាមជាពណ៌លឿង ទៅដល់បៃតង គឺអាចមកពីមានការឆ្លងមេរោគនៅបង្ហួរនោម ឬក៏ឆ្លងកាមរោគ ដូចជាជំងឺប្រមេះ ឬប្រមេះទឹកថ្លា។ ករណីនេះ ទឹកកាមអាចមានក្លិនស្អុយផងដែរ។
មិនសូវបញ្ចេញទឹកកាម
ដូចគ្នាដែរ បើសិនជាប្រុសៗយើងមិនសូវបានបញ្ចេញទឹកកាមទេនោះ ទឹកកាមក៏អាចមានពណ៌លឿងដែរ ព្រោះថាទឹកកាមនៅស្តុកយូរពេកមិនបានបញ្ចេញទៅណា ហើយក៏មានលាយឡំជាមួយសារធាតុផ្សេងទៀត នាំឲ្រប្រែប្រួលពណ៌។
របបអាហារ
របបអាហារក៏អាចធ្វើឲ្យទឹកកាមយើងប្រែពណ៌ដែរ ព្រោះថាវីតាមីនមួយចំនួនក៏ធ្វើឲ្យទឹកកាមប្រែពណ៌។ បើគ្រាន់តែទឹកកាមប្រែប្រួល ហើយបាត់ទៅវិញ នោះមិនមានបញ្ហាអ្វីគួរឲ្យបារម្ភទេ។
ម្ហូបអាហារមានផ្ទុកជាតិពណ៌ក៏អាចធ្វើឲ្យទឹកកាមប្រែពណ៌ដែរក្នុងករណីខ្លះ។ ចំណែកឯក្លិនរបស់ទឹកកាមយើងក៏មានក្លិនប្លែកដែរពេលបញ្ចេញមកក្រៅ បើយើងបានញ៉ាំអាហារដែលមានក្លិនខ្លាំង ដូចជាខ្ទឹមស ខ្ទឹមបារាំង ទំពាំងបារាំង និងខាត់ណាខៀវ ជាដើម។
ពេលណាត្រូវទៅជួបពេទ្យ?
មូលហេតុជាច្រើនធ្វើឲ្យទឹកកាមប្រុសៗយើងប្រែពណ៌ តែអាចថាមិនបង្កជាគ្រោះថ្នាក់នោះទេ ហើយក៏មិនចាំបាច់ត្រូវការការព្យាបាលដែរ។ ប៉ុន្តែបើគ្នាយើងសង្កេតឃើញថាការប្រែពណ៌នេះនៅបន្តរយៈពេលយូរ និងមានរោគសញ្ញាផ្សេងទៀតដូចជាមានក្លិនស្អុយ ឬបន្តមានឈាមក្នុងទឹកកាម នោះយើងគួរទៅពិគ្រោះជាមួយគ្រូពេទ្យហើយ។
អាន៖
- ប្រុសៗគួរតែដឹងរឿងសំខាន់ៗ ទាក់ទិននឹងមេជីវិតឈ្មោល
- ក្រោយពេលរួមភេទ មេជីវិតឈ្មោលធ្វើយ៉ាងណា ទើបអាចបង្កកំណើតបាន?
- មកដឹងពីលក្ខណៈពិសេសមេជីវិតឈ្មោល និងមេជីវិតញី
- ផ្លែប៉េងប៉ោះ ជួយឲ្យមេជីវិតឈ្មោលខ្លាំង
- ប្រុសៗចង់បានមេជីវិតមានសុខភាពល្អ កុំរំលងអាហារទាំងនេះ
- លក្ខខណ្ឌប៉ុន្មានយ៉ាងនេះ អាចបញ្ជាក់ថា ប្រុសម្នាក់នោះ អារអត់កូន
- ដំណឹងល្អ! បញ្ហាប្រុសៗអត់កូន ជិតមានវិធីព្យាបាលហើយ
- ប្រុសៗកំចេះតែសម្រុក ឬប្រើក្បាច់ពេក ប្រយ័ត្នបាក់កអាច្រមក់ វីវរមិនខាន
- ទម្លាយអាថ៌កំបាំងចំណុចស្រើបស្រាលរបស់ប្រុសៗ
