ត្រួតពិនិត្យដោយ គឹម កាណែល
មានការប្រែប្រួលជាច្រើនក្នុងខ្លួន ពេលមានផ្ទៃពោះ។ ប្រែប្រួលលើការបន្ទោបង់ ជាការប្រែប្រួលមួយក្នុងចំណោមនោះ។ ម៉ាក់អាចពិបាកទ្រាំ ពេលត្រូវទៅបន្ទប់ទឹកញឹកពេក ទោះពេលកំពុងរវល់ ឬយប់អធ្រាត្រ។
ម៉េចបានពោះធំនោមញឹក? អាចមានរោគសញ្ញា ឬប៉ះពាល់អីដល់កូនអត់? ហើយព្យាបាលយ៉ាងម៉េច? “Hello គ្រូពេទ្យ” បកស្រាយខាងក្រោម៖
១- ម៉េចបាននោមញឹកពេលពោះធំ?
នោមញឹក មកពីការកើនឡើងអ័រម៉ូន ប្រូចេសស្តេរ៉ូន (Progesterone) និងយូមេន ក្រូនិក ហ្គូណាដូត្រូពីន (Human chorionic gonadotropin)។ ត្រីមាសទី២ ពោះចាប់ផ្ដើមធ្លាក់ ហើយស្បូន ក៏ខ្ពស់ជាងមុន (រីកធំ) ដែលបន្ថែមសម្ពាធក្នុងប្លោកនោម។
ពេលមានផ្ទៃពោះ រាងកាយចាប់ផ្តើមឡើងជាតិទឹក ហើយកម្រិតទឹកនោម ក៏ឡើងតាមហ្នឹងដែរ។ ពេលកូនចាប់ផ្ដើមលូតលាស់កាន់តែធំ ប្លោកនោមកាន់តែរងសម្ពាធបន្ថែម ធ្វើឲ្យនោមញឹក។
២- រោគសញ្ញាមានអីខ្លះ?
យ៉ាងណាក៏ដោយ ទឹកនោមដែលបានបញ្ចេញមានតិចតួចប៉ុណ្ណោះ ឬសឹងតែគ្មានផង។ ពេលមានគភ៌ ស្ត្រីខ្លះមានបទពិសោធលេចនោម ពេលក្អក ហាត់ប្រាណ សើច ឬកណ្ដាស់។
៣- ធ្វើរោគវិនិច្ឆ័យយ៉ាងម៉េច?
នោមញឹក និងបន្ទាន់ អាចធ្វើរោគវិនិច្ឆ័យតាមរោគសញ្ញា។ បើអាច ត្រូវធ្វើតេស្តមួយចំនួន៖
– វិភាគទឹកនោម ដើម្បីតាមដានមើលបាក់តេរីក្នុងទឹកនោម
– អេកូ (Ultrasound) អាចកំណត់ភាពមិនប្រក្រតី ប្លោកនោម ក្រលៀន ឬទ្វារនោម
– តេស្តសម្ពាធលើប្លោកនោម ដើម្បីវាស់វែងថាតើយើងលេចនោមកម្រិតណាពេលក្អក ឬឱនចុះ
– Cystoscopy ពាក់ព័ន្ធនឹងការបញ្ចូលកាមេរ៉ាតូច ហើយស្រាលចូលក្នុងទ្វារនោម ដើម្បីពិនិត្យមើលប្លោក និងទ្វារនោម។
ពេលនោមដែលត្រូវបារម្ភ៖ ជំងឺរលាកបង្ហួរនោម (UTIs= Urinary tract infections) ការបង្ករោគដោយបាក់តេរី ដែលឃើញកើតមានញឹកញាប់លើស្ត្រីមានផ្ទៃពោះ។ បើមិនព្យាបាលត្រឹមត្រូវទេ វានឹងបង្ករោគទៅតម្រងនោម និងធ្វើឲ្យកូនកើតមុនកំណត់។
រោគសញ្ញានៃ UTIs រួមមាន៖
– ទឹកនោមមានពណ៌ក្រហម ផ្កាឈូក ឬស្រអាប់
– ទឹកនោមមានក្លិនឆ្អេះ ឬស្អុយ
– រលាកក្រហល់ក្រហាយ ឬឈឺចាប់ពេលនោម
ទៅពេទ្យភ្លាម បើមានរោគសញ្ញាទាំងនេះ។
៤- ព្យាបាលការនោមញឹក
លំហាត់ប្រាណបែប Kegel អាចជួយគ្រប់គ្រងលើប្លោកនោមប្រសើរបំផុត គួរអនុវត្តឱ្យបាន ៣ ដង/ថ្ងៃ។ ជំហានទាំងអស់រួមមាន៖
– បន្តឹងសាច់ដុំអាងត្រគាកដោយធ្វើសកម្មភាព ដូចជា ខ្ជឹប ឬបញ្ឈប់ទឹកនោម
– ធ្វើដូចនេះឱ្យបាន ១០ វិនាទី
– ប្រលែងសាច់ដុំដែលប្រឹងនេះមកវិញ
– ធ្វើវាដដែលៗប្រហែល ១៥ ដង ចាំឈប់។
កុំកាត់បន្ថយញ៉ាំទឹក ទោះមានអាការៈញោមញឹកក៏ដោយ ព្រោះទឹកសំខាន់សម្រាប់ម្ដាយ និងកូន។ ចំណាំខ្លួនឯងថាតើ នោមមួយថ្ងៃប៉ុន្មានដង ហើយម្ដងៗយូរអត់ ឬបរិមាណនោមតិច ឬច្រើន (ទុកប្រាប់ពេទ្យ ក្រែងពេទ្យសួរ)។ ទៅបន្ទប់ទឹក មុនពេលឈឺខ្លាំង ឬមុនពេលឈឺ ដើម្បីចៀសវាងលេចនោមដាក់ខោដោយមិនដឹងខ្លួន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ
គឹម កាណែល