ការពពោះ គឺជារយៈពេលដ៏សំខាន់ និងមានអត្ថន័យបំផុតសម្រាប់ម៉ាក់ៗ។ អំឡុងពេលនេះដែរ យើងចាំបាច់ត្រូវមានការប្រុងប្រយ័ត្នចំពោះទម្លាប់ខុសឆ្គងមួយចំនួន ដែលអាចប៉ះពាល់ដល់សុខភាពអាអូនក្នុងផ្ទៃ។
មាតិកា
បើស្រ្តីពពោះមិនបញ្ឈប់ទង្វើទាំងនេះទេ អាចនឹងប៉ះពាល់ដល់កូនមិនខាន
តើរឿងអ្វីខ្លះ ដែលម៉ាក់ៗមិនគួរធ្វើអំឡុងពេលពពោះ?
១. ខ្ជិលច្រអូស និងមិនធ្វើអ្វីទាំងអស់
ម៉ាក់ៗគួរធ្វើសកម្មភាពប្រចាំថ្ងៃស្រាលៗ រួមបញ្ចូលការហាត់យូហ្គា ដើរជារៀងរាល់ថ្ងៃ ឬចំណាយពេលខ្លះ ធ្វើរឿងដែលខ្លួនឯងចូលចិត្ត។ ទង្វើទាំងនេះ អាចជួយគ្រប់គ្រងអារម្មណ៍ កាត់បន្ថយអាការៈចាញ់កូន ជួយឲ្យគេងលក់ស្កប់ស្កល់ និងបញ្ចៀសបញ្ហាសុខភាពផ្សេងៗ។ ម្យ៉ាងវិញទៀត បើយើងអង្គុយច្រើនពេក នោះនឹងអាចបណ្តាលឲ្យមានបញ្ហាសុខភាពមួយចំនួន ដូចជាឡើងទម្ងន់ ឬជំងឺទឹកនោមផ្អែមពេលពពោះ។ល។
២. ជក់បារី ញ៉ាំគ្រឿងស្រវឹង និងជាតិកាហ្វេអ៊ីន
នៅពេលដែលយើងជក់បារី ញ៉ាំគ្រឿងស្រវឹង ឬជាតិកាហ្វេអ៊ីន សារធាតុទាំងនោះនឹងចូលទៅកាន់សុករបស់ម៉ាក់ៗ ហើយប៉ះពាល់ដល់ទារកក្នុងផ្ទៃដោយផ្ទាល់។ ហានិភ័យនៃកូនស្លាប់ក្នុងផ្ទៃ សម្រាលមិនគ្រប់ខែ ការរលូតកូន កូនកើតមិនគ្រប់គីឡូ និងបញ្ហាទារកស្លាប់ភ្លាមៗ អាចនឹងកើនឡើងខ្ពស់។ គ្រឿងស្រវឹង ក៏រួមចំណែកដល់បញ្ហាមិនប្រក្រតីខាងរាងកាយ និងបញ្ញាស្មារតី ហើយការជក់បារីទៀតសោត អាចប៉ះពាល់ដល់សមត្ថភាពក្នុងការមានផ្ទៃពោះម្តងទៀត និងបង្កជាបញ្ហាផ្លូវដង្ហើម។
៣. ញ៉ាំអាហារជាក់លាក់
ទន្ទឹមនឹងនេះដែរ សាច់ បន្លែ ត្រី ឬស៊ុតឆៅ ទឹកផ្លែឈើ ឈីស និងអាហារកែច្នៃមួយចំនួន អាចបណ្តាលឲ្យមានផលវិបាកក្នុងពេលសម្រាល។ អ៊ីចឹងហើយ ម៉ាក់ៗគួរញ៉ាំអាហារណាដែលសម្បូរទៅដោយសារធាតុចិញ្ចឹម ដូចជាផ្លែឈើស្រស់ បន្លែ និងអាហារដែលចម្អិនឆ្អិនល្អ។
៤. ត្រាំទឹកក្តៅ
ទឹកក្តៅ អាចបង្កើនកម្រិតសីតុណ្ហភាពរាងកាយរបស់ម៉ាក់ៗ ហើយបើកម្រិតសីតុណ្ហភាពខ្ពស់ នោះក៏អាចផ្សារភ្ជាប់ទៅនឹងបញ្ហាពិការភាពខួរក្បាល និងឆ្អឹងខ្នងរបស់ទារកដូចគ្នា។ ដូច្នេះហើយ ម៉ាក់ៗគួរជៀសវាងត្រាំទឹកក្តៅ ឬសូណា និងជំនួសដោយការងូតទឹកក្តៅឧណ្ហៗ ទើបជាការប្រសើរ។
៥. ស្ត្រេសគ្រប់ពេល
ជាមួយគ្នានេះដែរ ស្រ្តេស និងការថប់បារម្ភ អាចជះឥទ្ធិពលដ៏សម្បើមដល់អាអូន ដូចជាប៉ះពាល់ដល់ប្រព័ន្ធភាពស៊ាំ និងខួរក្បាលទារក។ ដូចនេះ ដើម្បីគ្រប់គ្រងស្រ្តេសឲ្យបានល្អ ម៉ាក់ៗគួរគេងឲ្យបានគ្រប់គ្រាន់ ធ្វើសមាធិ ហាត់យូហ្គា ដើរ ឬធ្វើសកម្មភាពកំសាន្តផ្សេងៗ។ ក្នុងករណីដែលម៉ាក់មានអារម្មណ៍ពិបាកចិត្តលើសពី២សប្តាហ៍ គួរពិគ្រោះជាមួយនឹងគ្រូពេទ្យជំនាញ ដើម្បីស្វែងរកដំណោះស្រាយឲ្យបានទាន់ពេលវេលា។
អត្ថបទគួរអាន៖
- ក្រោយសម្រាលកូន បើនៅមានបញ្ហាទាំងនេះ កុំទាន់រួមដំណេក
- ស្បែកយារធ្លាក់ក្រោយសម្រាល សាកអនុវត្តតិចនិក ៥ នេះ
- ក្រោយសម្រាលកូនដើមទ្រូងឡើងសរសៃខៀវខ្វាត់ខ្វែង ធ្វើម៉េចទើបបាត់វិញ?
- ហេតុអ្វីក្រោយសម្រាលកូន ពេទ្យឲ្យម៉ាក់ៗលេបថ្នាំទម្លាក់សត្វល្អិត?
- ហេតុអីសម្រាលកូនរួច វដ្តរដូវម៉ាក់ៗមិនទៀងដូចមុន?
- សម្រាលកូនរួច ពេលណាម៉ាក់ៗអាចងូតទឹកបាន?
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Things to avoid during pregnancy
https://www.pregnancybirthbaby.org.au/things-to-avoid-during-pregnancy
10 Things That Might Surprise You About Being Pregnant
https://kidshealth.org/en/parents/pregnancy.html
Taking Care of You and Your Baby While You’re Pregnant
https://familydoctor.org/taking-care-of-you-and-your-baby-while-youre-pregnant/
កំណែប្រែបច្ចុប្បន្ន
23/01/2024
អត្ថបទដោយ នូ សោភ័ណ្ឌ
ត្រួតពិនិត្យដោយ វេជ្ជ. ចាន់ ស៊ីណេត
បច្ចុប្បន្នភាពដោយ៖ នូ សោភ័ណ្ឌ
ត្រួតពិនិត្យដោយ
វេជ្ជ. ចាន់ ស៊ីណេត
ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម