ក្រៅពីជំងឺទឹកនោមផ្អែម មនុស្សម្នាក់ៗក៏អាចប្រឈមនឹងការកើតជំងឺទឹកនោមប្រៃបានផងដែរ។ គ្នាយើងច្បាស់ជាធ្លាប់បានឮ ពីជំងឺទឹកនោមប្រៃពីមុនមកហើយ ដែលវាក៏បង្កផលវិបាកដល់សុខភាពយើងច្រើនគួរឲ្យកត់សម្គាល់ដែរ ពិសេសសូម្បីតែកូនក្មេងក៏អាចកើតជំងឺនេះបានថែមទៀត។
អូនតូចៗក៏អាចកើតជំងឺទឹកនោមប្រៃដែរ ពិសេសនៅក្នុងវ័យនេះ
តាមលោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ បានបកស្រាយឲ្យដឹងថា ជំងឺទឹកនោមប្រៃកើតឡើងនៅពេលដែលក្នុងទឹកនោមមានប្រូតេអ៊ីនច្រើនខ្លាំងពេក បណ្ដាលមកពីបញ្ហាតម្រងនោម។ ជំងឺនេះ អាចកើតឡើងបានទៅលើមនុស្សគ្រប់វ័យ ប៉ុន្តែច្រើនកើតទៅលើក្មេងៗអាយុពី១-៦ឆ្នាំ ហើយកើតលើក្មេងប្រុសច្រើនជាងក្មេងស្រី។ ភាគច្រើន ជំងឺទឹកនោមប្រៃនេះអាចជាសះស្បើយទៅវិញដោយគ្រាន់តែប្រើថ្នាំព្យាបាល ហើយក្មេងៗក៏អាចជាបាត់ទៅវិញពេលដែលលូតលាស់ចូលដល់វ័យជំទង់។
លោកបន្តទៀតថា ការហើម និងឡើងទម្ងន់ ជារោគសញ្ញាទូទៅរបស់ជំងឺទឹកនោមប្រៃ។ ដោយសារតែនៅក្នុងរាងកាយកកើតសារធាតុរាវ និងជាតិប្រៃច្រើនពេកទើបបណ្ដាលឲ្យមានការហើម។ សារធាតុរាវដែលមានក្នុងរាងកាយច្រើនពេកនោះ ជាហេតុបណ្ដាលឲ្យឡើងទម្ងន់។
ការហើមភាគច្រើនកើតឡើងត្រង់មុខ (ពិសេសតំបន់ភ្នែក) កជើង ឬជើង (ពិសេសក្រោយពេលអង្គុយ ឬឈរយូរ) និងក្បាលពោះ។ រោគសញ្ញាផ្សេងទៀតមានដូចជា បាត់បង់ចំណង់អាហារ មិនសូវបត់ជើងតូច និងទឹកនោមមានពណ៌ក្រមៅ ហើយបែកពពុះ។ ចំណែកក្មេងខ្លះទៀត មិនមានចេញរោគសញ្ញាទេ ទាល់តែត្រូវពិនិត្យទឹកនោមទើបដឹងថាមានជំងឺទឹកនោមប្រៃ។
វេជ្ជបណ្ឌិតរូបនេះបន្ថែមឲ្យដឹងថា ក្នុងករណីកម្រខ្លះ កូនក្មេងអាចកើតមានជំងឺទឹកនោមប្រៃបណ្ដាលមកពីកត្តាផ្សេងទៀតដូចជា៖
- ជំងឺមហារីក និងដុះដុំសាច់
- ញ៉ាំថ្នាំផ្សំលើសកម្រិត
- ជំងឺធាត់។
ក្មេងៗដែលមានជំងឺទឹកនោមប្រៃត្រូវបានអ្នកជំនាញណែនាំឲ្យចាក់វ៉ាក់សាំងជំងឺរលាកសួត និងត្រូវផ្លាស់ប្ដូររបបអាហារខ្លះដោយកាត់បន្ថយអាហារមានជាតិប្រៃ និងត្រូវពិគ្រោះពីរបបអាហារ និងបញ្ហាសុខភាពរបស់អាអូនផ្សេងទៀតជាមួយគ្រូពេទ្យជំនាញ។
អត្ថបទគួរអាន៖
- វីធីសាស្រ្តលាងច្រមុះកូនជាមួយសេរ៉ូមប្រៃត្រឹមត្រូវតាមបចេ្ចកទេស
- ដឹងគន្លឹះទាំងនេះ ការពារកូនពីបញ្ហាស្បែកក្នុងខែរងា
- គួរដឹង! កំហុស ៣ យ៉ាងម៉ាក់ប៉ាអាចធ្វើពេលកូនក្តៅខ្លួន
- កូនកើតជំងឺពងបែកមាត់ដៃជើងគួរថែទាំម៉េច?
- ធ្វើម៉េចទើបដឹងថា កូនអាលែកហ្ស៊ីច្រមុះ ឬផ្តាសាយ?
- កូនឧស្សាហ៍អាលែកហ្ស៊ីច្រមុះ ប៉ាម៉ាក់គួរដឹងពីវិធីបង្ការ និងថែទាំឲ្យបានត្រឹមត្រូវ
ត្រួតពិនិត្យដោយ
ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខអត្ថបទដោយ នាង សុខុមដាលីញ៉ា · កែ 05/02/2025