ជំងឺកុមារមានច្រើនប្រភេទ ខ្លះអាចក៏អាចព្យាបាលឲ្យសះស្បើយ ខ្លះទៀតព្យាបាលមិនជានោះទេ។ ចំពោះជំងឺ ៣ មុខខាងក្រោមនេះ ជាជំងឺពីកំណើត កាលណាទារក និងកុមារកើតមានហើយ មិនអាចព្យាបាលជានោះទេ តម្រូវឲ្យព្យាបាលអស់ជីវិតតែម្តង។
ត្រូវដឹង! ទារក និងកុមារ មានជំងឺទាំងនេះ ព្យាបាលមិនជាទេ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. ជំងឺកង្វះអង់ហ្ស៊ីម G6PD
ជំងឺកង្វះអង់ហ្ស៊ីម G6PD ជាជំងឺតំណពូជ ដែលភាគច្រើនលើសលប់កើតលើក្មេងប្រុស។ អង់ហ្ស៊ីម G6PD មានមុខងារជួយឲ្យកោសិកាគ្រាប់ឈាមក្រហមដំណើរការល្អ និងជួយការពារកោសិកាគ្រាប់ឈាមក្រហមពីសារធាតុផ្សេងៗ នៅក្នុងឈាមដែលអាចបំផ្លាញវា។ នៅពេលកោសិកាថ្លើមក្មេងមិនផលិតអង់ហ្ស៊ីមទាំងនោះចេញមក ដើម្បីជួយរំលាយអាហារទេ ទើបបណ្ដាលឲ្យទារកកើតជំងឺកង្វះអង់ហ្ស៊ីម G6PD។
លោកវេជ្ជបណ្ឌិត អ៊ុន យូ ឯកទេសរោគកុមារបម្រើការងារនៅមន្ទីរពេទ្យកុមារជាតិថា យើងអាចដឹងថា ទារកនោះមានជំងឺខ្វះអង់ហ្ស៊ីម G6PD ឬអត់ តាមរយៈការជោះកែងជើងរបស់ទារកក្រោយពេលកើត។ ក្នុងករណីដែលពេទ្យពិនិត្យតេស្តឈាមហើយរកឃើញកើតជំងឺ G6PD នេះ គឺមួយជីវិតរបស់ក្មេងនឹងកើតជំងឺនេះរហូត។
រោគសញ្ញា៖
– ស្បែកមានសភាពស្លេកទៅៗ
– អត់កម្លាំងកំហែង លើ្វយៗ
– បេះដូងលោតញាប់
– ដកដង្ហើមលឿន ឬដកដង្ហើមបានខ្លីៗ
– ទឹកនោមមានពណ៌ក្រមៅ។ល។
២. ជំងឺ Thalassemia
Thalassemia ជាជំងឺគ្រាប់ឈាមក្រហមពីកំណើត ឬហៅម្យ៉ាងទៀតថា ជាជំងឺតំណពូជពីឪពុក ឬម្តាយ ឬអាចទាំងម្តាយទាំងឪពុកដែលមានជំងឺនេះ រួចបន្តទៅកូន ដែលធ្វើឲ្យរាងកាយមានអេម៉ូក្លូប៊ីនតិចជាងធម្មតា មិនអាចដឹកជញ្ជូនអុកស៊ីសែនទៅចិញ្ចឹមរាងកាយបាន។ លោកសាស្ត្រាចារ្យវេជ្ជបណ្ឌិត ជាន សុផល ប្រធានផ្នែកជំងឺឈាមកុមារ នៃមន្ទីរពេទ្យកុមារជាតិបានឲ្យដឹងថា ទារកដែលកើតមកមានជំងឺ Thalassemia ព្យាបាលមិនជាទេ តម្រូវឲ្យព្យាបាលអស់មួយជីវិត និងត្រូវចំណាយថវិកាច្រើន។
រោគសញ្ញា៖
– ស្លេកស្លាំង
– អស់កម្លាំង
– ខ្សោយ
– ស្បែកលឿង
– លូតលាស់យឺត។
២. ជំងឺ Hemophilia
ហេម៉ូហ្វីលា (Hemophilia) ជាជំងឺវិបត្តិហូរឈាមពីកំណើតដែលកើតទៅមានទៅលើក្មេងប្រុស ឯក្មេងស្រីអាចជាអ្នកផ្ទុក ដោយមិនចេញរោគសញ្ញា។ តាមការលើកឡើងរបស់ប្រធានផ្នែកជំងឺឈាមកុមារ នៃមន្ទីរពេទ្យកុមារជាតិ លោកសាស្ត្រាចារ្យ វេជ្ជបណ្ឌិត ជាន សុផល ក្មេងកើតជំងឺ Hemophilia ក៏មិនអាចព្យាបាលជាដាច់ដែរ ត្រូវការព្យាបាលអស់មួយជីវិត។ លោកវេជ្ជបណ្ឌិតបន្តថា Hemophilia ជាជំងឺតពូជពីម្តាយទៅកូន មិនមែនពីឪពុកទៅកូនទេ ៧០% នៃជំងឺ Hemophilia គឺមានប្រវត្តិក្រុមគ្រួសារកើតជំងឺនេះ ហើយជំងឺ Hemophilia ជាប្រភេទជំងឺហូរឈាម ឬក៏យើងហៅថា ឈាមក្រកក តែមិនមែនជាជំងឺឈាមរាវនោះទេ។ ចំណែក ៣០%ទៀត ជំងឺ Hemophilia កើតឡើងដោយសារបម្រែបម្រួលទៅលើក្រូម៉ូសូមដោយខ្លួនឯង។
រោគសញ្ញា៖
– ឡើងជាំនៅពេលទង្គិចអ្វីមួយ
– ឧស្សាហ៍ហើមជង្គង់ កែងដៃ
– ឈាមក្រកក
– ឈាមហូរខុសប្រក្រតីនៅតាមមាត់ សន្លាក់ សាច់ដុំ
– ហើម ឬហូរឈាមខុសប្រក្រតីពេលចាក់វ៉ាក់សាំង
– មានឈាមនៅក្នុងទឹកនោម ឬលាមក។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម