ជំងឺឆ្លង

មាន​ករណី​វិជ្ជមានកូវីដ ១៩ ចំនួន ៣០៣ករណី​ថ្មី ខណៈ​អ្នក​ស្លាប់​មាន ៥នាក់ និង​ជា​សះស្បើយ ២៣៩នាក់ នៅ​ថ្ងៃទី២០ មេសា ២០២១។ នេះ​បើតាម​សេចក្តី​ជូន​ព័ត៌មាន​របស់​ក្រសួង​សុខាភិបាល។ ស្ថានភាព​ជំងឺ​កូវីដ ១៩ គិត​ត្រឹមថ្ងៃទី២១ ខែមេសា ឆ្នាំ២០២១ – អ្នក​ឆ្លង​កូវីដ១៩ សរុប ៧៧៤៧ករណី – អ្នក​ពាក់​ព័ន្ធ​ព្រឹត្តិការណ៍​សហគមន៍ ៧២០២នាក់ – ព្យាបាល​ជា​សះស្បើយ ២៧៩៤នាក់ – កំពុង​សម្រាក​ព្យាបាល ៤៨៩៣នាក់ – ស្លាប់ ៥៤នាក់។

មន្ត្រីរាជការ​នៅ​អគ្គនាយកដ្ឋាន​រដ្ឋបាល និង​ហិរញ្ញវត្ថុ នៅ​ក្រសួង​ព័ត៌មាន កញ្ញា ផង់ សុភី វិជ្ជមានកូ​វីដ ១៩ នៅថ្ងៃទី២០ មេសា ២០២១។ បើការបញ្ជាក់​នៅ​ក្នុង​សេចក្តីជូន​ដំណឹង​របស់​ក្រសួង​ព័ត៌មាន មន្ត្រីរូប​នេះ​មាន​តួនាទី​ជា​ជំនួយការ​របស់​ឯកឧត្តម ម៉ៅ អាយុទ្ធ រដ្ឋលេខាធិការ​ក្រសួងព័ត៌មាន ដែល​ជាជីតា​របស់​ខ្លួន និង​បាន​ទទួលមរណភាពដោយសារ​​ជំងឺកូវីដ ១៩ កាល​​ពី​​ពេល​​កន្លង។ កញ្ញា ផង់ សុភី បាន​សុំវត្តមាន​ពី​ក្រសួង​ព័ត៌មាន​ចាប់​តាំង​ពី​ខែធ្នូ ឆ្នាំ២០១៩ ដើម្បី​រៀបចំ​ដឹកនាំ​​​ភាពយន្ត ប៉ុន្តែ​អំឡុង​ពេល​ចាក់​វ៉ាក់សាំងកូវីដ ១៩ ក្នុង​ក្រប​ខណ្ឌក្រសួង កញ្ញា​បាន​មក​​ក្រសួង ២លើក ប៉ុន្តែ​មិន​បាន​ចូល​ក្នុង​តំបន់​ចាក់​វ៉ាក់សាំង​នោះ​ទេ ព្រោះ​ពុំមាន​ឈ្មោះ។

ក្រសួង​ពាណិជ្ជកម្ម​បាន​ប្រកាស​ដាក់​ឲ្យ​ប្រើប្រាស់​ទីផ្សារ​អនឡាញ​សម្រាប់​លក់​គ្រឿង​ឧបភោគ​បរិភោគ​ចាំបាច់​ក្នុង​អំឡុង​ពេល​បិទ​ខ្ទប់​ភូមិសាស្ត្ររាជធានី​ភ្នំពេញ និង​ក្រុង​តាខ្មៅ ចាប់​ពី​ថ្ងៃទី២១ មេសា នេះតទៅ។ ដើម្បី​បញ្ជា​ទិញ យើង​គ្រាន់​ចូល​ទៅ​កាន់​គេហទំព័រ shop.moc.gov.kh តាម QR Code ខាងក្រោម។ ក្រោយ​ការ​បញ្ជា​ទិញរួច ក្រុម​ការងារ​ក្រសួងពាណិជ្ជកម្ម​នឹង​រៀបចំ​ចាត់ចែង​ដឹកជញ្ជូន​ទៅ​ដល់​មុខ​ផ្ទះ។

វីរុស​កូវីដ-១៩ កំពុង​តែ​វាយលុក​យ៉ាង​ខ្លាំង​នៅ​ក្នុង​ប្រទេស​កម្ពុជា​យើង បណ្ដាល​ឲ្យ​ប្រជាជន​ជាច្រើន​នាក់​បាន​ឆ្លង​ជំងឺ​នេះ ហើយ​ក៏​បាន​ឆក់​យក​ជីវិត​ប្រជាជន​ខ្មែរ​ច្រើនដែរ។ វីរុស​កូវីដ-១៩​ ធម្មតា​សាហាវ​ខ្លាំង​បែប​នេះ​ទៅ​ហើយ តែ​តាម​ការ​ឲ្យ​ដឹង​ពី​ក្រសួងសុខាភិបាល នៅ​មាន​វីរុស​កូវីដ-១៩ ​បម្លែង​ថ្មី ដែល​កាន់តែ​គ្រោះ​ថ្នាក់​ជាង​វីរុស​កូវីដ-១៩​ ទៅ​ទៀត។ តាមការលើកឡើងរបស់លោកជំទាវ ឱ វណ្ណឌីន នាពេលកន្លងមក វីរុសកូវីដ ១៩ បម្លែងថ្មីនេះ អាច​ចម្លង​មនុស្ស​ដល់​ទៅ ៦-៧នាក់ ក្នុង​ពេល​តែ​មួយ។ "ជា​មធ្យម​ការ​ចម្លង​ដែល​គេ​រក​ឃើញ​ដល់​ទៅ ៧​នាក់​ក្នុង​ពេល​តែ​មួយ បើ​យើង​ប្រៀប​ធៀប​ក្នុង​ការ​ចម្លង​ពី​ពេល​មុន វីរុស​ពី​មុន ​ដែល​មិន​មែន​ជា​វីរុស​បម្លែង​ថ្មី​នេះ មាន​ប្រហែល​ជា ៣នាក់ ៤នាក់​ប៉ុណ្ណឹង​ឯង អ៊ីចឹង​លឿន​ណាស់​សឹង​តែ​២ដង"។ អ្វី​ទៅ​ជា​វីរុស​កូវីដ-១៩​បម្លែង​ថ្មី? វីរុស​អាច​ផ្លាស់​ប្ដូរ​ឥត​ឈប់​ឈរ​តាម​រយៈ​ការ​បម្លែង​ខ្លួន ហើយ​វីរុស​កូវីដ-១៩ ក៏​ត្រូវ​បាន​រក​ឃើញ​មាន​ការ​បម្លែង​ខ្លួន​ច្រើន​ប្រភេទ​ដែរ នៅ​តាម​ប្រទេស​មួយ​ចំនួន​បង្ក​ជា​ភាព​ចលាចល​ដូច​ជា៖ - វីរុស​កូវីដ-១៩​បម្លែង​ថ្មី B.1.1.7 (ប្រទេស​អង់គ្លេស)៖ វីរុស​បម្លែង​ប្រភេទ​នេះ ងាយ​ឆ្លង​កាន់​តែ​លឿន និង​មាន​ភាគ​រយ​ខ្ពស់​ក្នុង​ការ​ស្លាប់ បើ​ឆ្លង​វា។ -វីរុស​កូវីដ-១៩​បម្លែង​ថ្មី B.1.351 (ប្រទេស អាហ្វ្រិកខាង​ត្បូង)៖ វីរុស​នេះ ងាយ​ស្រួល​ក្នុង​ការ​ចម្លង​ដូច​គ្នា ហើយ​វា​ក៏​មាន​ឥទ្ធិពល​កាត់​បន្ថយ​ប្រសិទ្ធភាព​ថ្នាំ​ប្រឆាំង​ជំងឺ​កូវីដ-១៩ និង​ប៉ះពាល់​ដល់​ប្រព័ន្ធ​ការពារ​រាងកាយ​ក្នុង​ខ្លួន​យើង​ដូច​គ្នា។ -វីរុស​កូវីដ-១៩​បម្លែង​ថ្មី P.1 (ប្រទេស​ជប៉ុន/ប្រេស៊ីល)៖ វីរុស​បម្លែង​ថ្មី​នេះ ក៏​ប៉ះពាល់​ដល់​ប្រព័ន្ធ​ការពារ​រាងកាយ និង​កាត់បន្ថយ​ប្រសិទ្ធភាព​ថ្នាំ​ដូច​គ្នា។ -វីរុស​កូវីដ-១៩​បម្លែង​ថ្មី B.1.427 និងB.1.429 (សហរដ្ឋ​អាមេរិក)៖ ដូច​នឹង​វីរុស​ខាង​លើៗ​ដែរ […]

នៅ​ថ្ងៃទី១៩ មេសា ២០២១ នេះ កម្ពុជា​បន្ត​រក​ឃើញ​ករណី​វិជ្ជមាន​កូវីដ១៩ ចំនួន​ ៦២៤​នាក់ សុទ្ធតែជាប់ពាក់ព័ន្ធព្រឹត្តិការណ៍​២០ កុម្ភៈ​  ឯអ្នក​ជា​សះ​ស្បើយ​មានចំនួន​៤៨នាក់ ។ នេះបើ​តាម​សេចក្តី​ជូន​ព័ត៌មាន​របស់​ក្រសួង​សុខាភិបាល។ ស្ថានភាព​ជំងឺ​កូវីដ ១៩ គិត​ត្រឹមថ្ងៃទី១៩ ខែមេសា ឆ្នាំ២០២១ – អ្នក​ឆ្លង​កូវីដ១៩ សរុប ៧០១៣ករណី – អ្នក​ពាក់​ព័ន្ធ​ព្រឹត្តិការណ៍​សហគមន៍ ៦៤៧០នាក់ – ព្យាបាល​ជា​សះស្បើយ ២៥២៤នាក់ – កំពុង​សម្រាក​ព្យាបាល ៤៤៣៩នាក់ – ស្លាប់ ៤៥នាក់។

ទន្ទឹម​នឹង​មាន​វិធានការ​បិទខ្ទប់ ដើម្បី​ទប់​ស្កាត់​ការ​ឆ្លង​រាល​ដាល​វីរុស​កូវីដ​១៩ គិត​មក​ដល់ពេលនេះរដ្ឋបាលរាជធានីភ្នំពេញ បាន​សម្រេច​បិទផ្សារ​យ៉ាង​ហោចណាស់​ចំនួន​ប្រាំមួយ​ជាបណ្ដោះអាសន្ន បន្ទាប់​ពី​មាន​អ្នក​វិជ្ជមាន​កូវីដ១៩​ នៅ​ផ្សារទាំងនោះ​។ ក្រោយ​មាន​ការ​ឆ្លង​រាលដាល​ជំងឺ​កូវីដ-១៩​ខ្លាំង​ អាជ្ញាធរ​បាន​សម្រេច​បិទ​បណ្ដោះ​អាសន្ន​ផ្សារ​ធំៗ​មួយ​ចំនួន​នៅ​ភ្នំពេញ​​ដូច​ជា៖ ១. ផ្សារ​អូរឫស្សី (បិទ​តាំង​ពី​ថ្ងៃ​ទី​២ ខែ​មេសា - បច្ចុប្បន្ន) ២. ផ្សារ​ចាស់ (បិទ​តាំង​ពី​ថ្ងៃ​ទី១២ ខែមេសា - បច្ចុប្បន្ន) ៣. ផ្សារ​ដើម​គរ (បិទ​តាំង​ពី​ថ្ងៃ​ទី១៨ ខែមេសា - ថ្ងៃ​ទី​១ ខែ​ឧសភា) ៤. ផ្សារ​នាគ​មាស (បិទ​តាំង​ពី​ថ្ងៃ​ទី១៨ ខែ​មេសា - បច្ចុប្បន្ន) ៥. ផ្សារ​បឹង​ត្របែក (បិទ​ចាប់​ពី​ថ្ងៃ​ទី១៩ ខែ​មេសា -ថ្ងៃ​ទី​២ ខែ​ឧសភា) ៦. ផ្សារ​ធំ​ទួល​សង្កែ (បិទ​ចាប់​ពី​ថ្ងៃ​ទី១៩ ខែ​មេសា -ថ្ងៃ​ទី​២ ខែ​ឧសភា) អាជ្ញាធរ សម្រេច​បិទ​ផ្សារ​ទាំង​៦​ខាង​លើ​នេះ ដោយ​សារ បាន​រក​ឃើញ​បុគ្គលិក អាជីវករ ក៏​ដូច​ជា អ្នក​ទិញ​ទំនិញ​មានវិជ្ជមាន​ជំងឺ​កូវីដ-១៩ ច្រើន​ករណី និង​មាន​ផ្សារ​ខ្លះ​ក្នុង​ចំណោម​ផ្សារ​ទាំង​៦​នេះ មាន​អ្នក​ឆ្លង​​លើស​១០០​ករណី ។

នៅ​ថ្ងៃទី១៧ មេសា ២០២១ នេះ កម្ពុជា​បន្ត​រក​ឃើញ​ករណី​វិជ្ជមាន​កូវីដ ១៩ ដល់​ទៅ ៦១៨នាក់ ដែល​នេះ​ជា​តួលេខ​ខ្ពស់​បំផុត ឯអ្នក​ជា​សះ​ស្បើយ​មាន ៦០នាក់ ខណៈ​អ្នក​ស្លាប់​ដោយសារ​កូវីដ ១៩ មាន ៤នាក់។ នេះបើ​តាម​សេចក្តី​ជូន​ព័ត៌មាន​របស់​ក្រសួង​សុខាភិបាល។ ស្ថានភាព​ជំងឺ​កូវីដ ១៩ គិត​ត្រឹមព្រឹក ថ្ងៃទី១៨ ខែមេសា ឆ្នាំ២០២១ – អ្នក​ឆ្លង​កូវីដ១៩ សរុប ៦៣៨៩នាក់ – អ្នក​ពាក់​ព័ន្ធ​ព្រឹត្តិការណ៍​សហគមន៍ ៥៨៤៦នាក់ – ព្យាបាល​ជា​សះស្បើយ ២៤៧៦នាក់ – កំពុង​សម្រាក​ព្យាបាល ៣៨៦៥នាក់ – ស្លាប់ ៤៣នាក់។

កម្ពុជា​បន្ត​រក​ឃើញ​ករណី​វិជ្ជមាន​កូវីដ ១៩ ចំនួន ២៩១នាក់ និង​ជា​សះ​ស្បើយ ២៣នាក់ ខណៈ​អ្នក​ស្លាប់​មាន​ម្នាក់ នៅ​ថ្ងៃទី១៦ មេសា ២០២១។ នេះ​បើ​តាម​សេចក្តី​ជូន​ព័ត៌មាន​របស់​ក្រសួង​សុខាភិបាល។ ស្ថានភាព​ជំងឺ​កូវីដ ១៩ គិត​ត្រឹមព្រឹក ថ្ងៃទី១៧ ខែមេសា ឆ្នាំ២០២១ – អ្នក​ឆ្លង​កូវីដ១៩ សរុប ៥៧៧១នាក់ – អ្នក​ពាក់​ព័ន្ធ​ព្រឹត្តិការណ៍​សហគមន៍ ៥២២៨នាក់ – ព្យាបាល​ជា​សះស្បើយ ២៤១៦នាក់ – កំពុង​សម្រាក​ព្យាបាល ៣៣១១នាក់ – ស្លាប់ ៣៩នាក់។

រូបភាព៖ ទទក ការ​ចាក់​វ៉ាក់សាំងកូវីដ-១៩ នៅ​រាជធានី​ភ្នំពេញ​ត្រូវ​ផ្អាក​ជា​បន្ទាន់ និងជា​បណ្ដោះ​អាសន្ន​ចំនួន ៣ថ្ងៃ ពីថ្ងៃទី ១៧-១៩ មេសា ២០២១។ នេះ​បើ​តាម​រយៈ​សារ​ជា​សំឡេង​បន្ទាន់​មួយ​របស់​លោក​ជំទាវ ឱ វណ្ណឌីន រដ្ឋលេខាធិការ និង​ជា​អ្នក​នាំ​ពាក្យ​ក្រសួង​សុខាភិបាល​នៅ​ព្រឹក​នេះ។ "តាម​ការ​សម្រេច​ដ៏​ខ្ពង់​ខ្ពស់​របស់​សម្តេច​អគ្គ​មហា​សេនាបតីតេជោ ហ៊ុន សែន នាយក​រដ្ឋមន្ត្រី នៃ​ព្រះ​រាជាណាចក្រ​កម្ពុជា ការ​ចាក់​វ៉ាក់សាំង​កូវីដ-១៩ នៅ​រាជធានី​ភ្នំពេញ​ត្រូវ​ផ្អាក​ជា​បន្ទាន់ ត្រូវ​ផ្អាក​ជា​បណ្ដោះ​អាសន្ន​ចំនួន ៣ថ្ងៃ ដោយ​គិត​ចាប់​ពីថ្ងៃទី ១៧ ខែមេសា ដល់​ថ្ងៃទី ១៩ ខែ​មេសា ឆ្នាំ ២០២១" ។ លោក​ជំទាវ​បាន​បន្តថា ការ​ចាក់​វ៉ាក់សាំង​កូវីដ-១៩ នឹង​ត្រូវ​ដំណើរ​ការ​ជា​ធម្មតា​ឡើង​វិញ នៅថ្ងៃទី ២០ ខែមេសា ឆ្នាំ ២០២១ ចំពោះ​បងប្អូន​ប្រជាពលរដ្ឋ​ដែល​មាន​បំណង​ធ្វើ​ដំណើរ​មក​កាន់​រាជធានី​ភ្នំពេញ​ដើម្បី​ចាក់​វ៉ាក់សាំង​កូវីដ-១៩ នេះ ត្រូវ​វិញ​ត្រលប់​ទៅ​កាន់​ទី​កន្លែង​ដែល​ខ្លួន​ស្នាក់​នៅ​វិញ ហើយ​ត្រូវ​រង់ចាំ​ការ​ណែនាំ​សារ​ជា​ថ្មី ដែល​គណៈកម្មការ​ចំពោះ​កិច្ច​ចាក់​វ៉ាក់សាំង​កូវីដ-១៩ នឹង​ចេញ​ផ្សាយ។

ក្នុង​អំឡុង​ពេល​បិទខ្ទប់ អ្នក​ដែល​ត្រូវ​ចាក់​វ៉ាក់សាំង​បង្ការ​ជំងឺកូវីដ-១៩ ដូសទី២ ហើយ​ជាប់​បម្រាម​មិន​អាច​ធ្វើ​ដំណើរ​ទៅ​ចាក់​វ៉ាក់សាំង​នៅ​ទីកន្លែងដែល​បាន​ចាក់​លើកទី១ រួច បុគ្គល​នោះ​អាច​ទទួល​វ៉ាក់សាំង​ដូសទី២ នៅ​ខេត្តដែលបាន​ស្នាក់​នៅ មានន័យថា​បើ​ជាប់​នៅ​ខេត្ត​ណា ត្រូវ​ចាក់​នៅ​ខេត្តនោះ​តែ​ម្តង។ នេះ​ជា​ការ​លើក​ឡើង​របស់​លោក​ជំទាវ ឱ វណ្ណឌីន រដ្ឋលេខាធិការ ក្រសួង​សុខាភិបាល តាម​រយៈ​សារ​ជា​សំឡេង​នៅថ្ងៃទី១៧ ខែមេសា ឆ្នាំ ២០២១នេះ។ អ្នក​នាំ​ពាក្យ​ក្រសួង​សុខាភិបាល​រូបនេះ​បន្តថា អ្នក​ដែល​ជាប់​បម្រាម​ត្រូវ​ទំនាក់​ទំនង​ជាមួយ​មន្ទីរសុខាភិបាល​ខេត្តនោះ ដើម្បី​ទទួល​បាន​ការ​ចាក់វ៉ាក់សាំង​ដូសទី២ ទៅ​តាម​ថ្ងៃកំណត់ ដោយ​មិន​ហួស​ចន្លោះពី ១៤-២១ថ្ងៃ ក្រោយ​ចាក់​ដូស​លើកទី១ សម្រាប់​វ៉ាក់សាំង​សុីណូវ៉ាក់។ ដើម្បី​សម្រួលដល់​បញ្ហា​ខាងលើ​នេះ គណៈកម្មការ​ចំពោះកិច្ច​ចាក់​វ៉ាក់សាំងកូវីដ-១៩ ក្នុង​ក្របខណ្ឌ​ទូទាំង​ប្រទេស នឹង​ចាត់ចែង​ដឹក​វ៉ាក់សាំង​ទៅ​ផ្គត់ផ្គង់​ដល់​មន្ទីរ​សុខាភិបាល​រាជធានី-ខេត្ត ទាំង២៥ គឺក្នុង១ខេត្ត ផ្តល់​​វ៉ាក់សាំង ២០០ដូស សម្រាប់​ត្រៀម​បម្រុង​ទុក​ចាក់​ជូន​បុគ្គល ដែល​បាន​ជាប់បម្រាម​បិទ​ខ្ទប់ នៅ​តាម​បណ្តា​ខេត្ត​នីមួយៗ។