ជំងឺឆ្លង

មាន​ករណី​វិជ្ជមាន​វីរុសកូវីដ-១៩​ ថ្មី​ចំនួន​ ៦៣នាក់​ និង​មាន​អ្នក​ជា​សះស្បើយ​ចំនួន ៩៤នាក់ នៅថ្ងៃទី ៤ មេសា ២០២១ នេះ​បើ​តាម​សេចក្តី​ជូន​ព័ត៌មាន​របស់​ក្រសួង​សុខាភិបាល។ ស្ថានភាព​ជំងឺកូវីដ ១៩ គិត​ត្រឹមព្រឹក​ ថ្ងៃទី៥ ខែមេសាឆ្នាំ២០២១ – អ្នក​ឆ្លង​កូវីដ១៩ សរុប ២៧៥២នាក់ – អ្នក​ពាក់​ព័ន្ធ​ព្រឹត្តិការណ៍​សហគមន៍ ២២២២នាក់ – ព្យាបាល​ជា​សះស្បើយ ១៧៤៧នាក់ – កំពុង​សម្រាក​ព្យាបាល ៧៧៩នាក់ – ស្លាប់ ២១នាក់។

អនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ១៩ បានប្រកាសឲ្យអ្នកលក់ដូរនៅក្នុងផ្សារអូរឫស្សីទាំងអស់ ទៅធ្វើតេស្តរកមេរោគកូវីដ ១៩ នៅវិទ្យាល័យបាក់ទូក។ ការ​ប្រកាស​នេះ​ធ្វើ​ឡើង​បន្ទាប់​ពី​មាន​អ្នក​លក់ដូរ និង​សន្តិសុខ​នៅ​ផ្សារអូរឫស្សី​មួយ​ចំនួន​ឆ្លង​ជំងឺ​កូវីដ ១៩ ហើយ​រដ្ឋបាលរាជធានី​ភ្នំពេញ​ក៏​បាន​ផ្អាក​ដំណើរ​ការ​ផ្សារអូរឫស្សី​ជា​បណ្តោះ​អាសន្ន​រយៈពេល ១៤ថ្ងៃ គិត​ចាប់​ពីថ្ងៃទី ៤មេសា ដល់ថ្ងៃទី ១៧ មេសា ២០២១។

នៅថ្ងៃទី៣ ខែមេសា ឆ្នាំ២០២១ ក្រ​សួង​សុខាភិបាល​ប្រកាស​ថា​តួលេខ​អ្នក​ឆ្លង​កូវីដ១៩ ក្នុង​ថ្ងៃទី​២ ខែ​មេសា មានជិត១០០នាក់ និងជាសះស្បើយជាង​៣០០​នាក់។ អ្នក​ជំងឺ​កូវីដ១៩ រក​ឃើញ​ថ្មីនេះមាន​៩៩​នាក់ ជា​ករណី​ឆ្លងក្នុង​ព្រឹត្តិការណ៍​​សហគមន៍​២០កុម្ភៈ និងមាន​អ្នក​ជាសះស្បើយ​៣២៩នាក់​។ ស្ថានភាព​ជំងឺកូវីដ ១៩ គិត​ត្រឹមព្រឹក​ ថ្ងៃទី៣ ខែមេសាឆ្នាំ២០២១ – អ្នក​ឆ្លង​កូវីដ១៩ សរុប ២៦៤៥នាក់ – អ្នក​ពាក់​ព័ន្ធ​ព្រឹត្តិការណ៍​សហគមន៍ ២១១៦នាក់ – ព្យាបាល​ជា​សះស្បើយ ១៥៨៥នាក់ – កំពុង​សម្រាក​ព្យាបាល ១០៣៦នាក់ – ស្លាប់១៩នាក់។

ឃុំជ្រៃលាស់ ស្រុក​ពញាឮ ខេត្តកណ្តាល រកឃើញអ្នកឆ្លងជំងឺកូវីដ ១៩ ចំនួន ១២នាក់ នៅថ្ងៃទី០១ េមសា នេះ។ អ្នកជំងឺកូវីដ ១៩ ទាំង ១២នាក់នោះជាខ្មែរទាំងអស់ មានស្ត្រី ៦នាក់ បុរស ៥នាក់ និងកុមារម្នាក់  ហើយត្រូវបានដាក់ឲ្យសម្រាកព្យាបាលនៅមន្ទីរពេទ្យជ័យជម្នះ ខេត្តកណ្តាល នេះបើតាមសេចក្តីជូនព័ត៌មានរបស់ក្រសួងសុខាភិបាល។ ស្ថានភាព​ជំងឺកូវីដ ១៩ គិត​ត្រឹមព្រឹក​ ថ្ងៃទី២ ខែមេសាឆ្នាំ២០២១ – អ្នក​ឆ្លង​កូវីដ ១៩ សរុប ២៥៤៦នាក់ – អ្នក​ពាក់​ព័ន្ធ​ព្រឹត្តិការណ៍​សហគមន៍ ២០១៧នាក់ – ព្យាបាល​ជា​សះស្បើយ ១២៦៥នាក់ – កំពុង​សម្រាក​ព្យាបាល ១២៧០នាក់ – ស្លាប់ ១៦នាក់។

នៅថ្ងៃទី១ មេសា ២០២១ តួលេខ​អ្នក​ឆ្លង​កូវីដ ១៩ មានចំនួន ៦៩នាក់ និងជាសះស្បើយ ១៦នាក់ នេះបើ​តាម​​សេចក្តី​​ជូន​ព័ត៌មាន​​របស់​​ក្រសួង​​សុខាភិបាល។ អ្នក​ជំងឺ​កូវីដ១៩ រក​ឃើញ​ថ្មីនេះ ៦៨នាក់ ជា​ករណី​ឆ្លងក្នុង​ព្រឹត្តិការណ៍​​សហគមន៍​២០កុម្ភៈ និង​ម្នាក់​ទៀត​ជា​អ្នក​ដំណើរ​ចូល​មក​កម្ពុជា។ អ្នក​ឆ្លង​ក្នុង​ព្រឹត្តិការណ៍​សហគមន៍ ២០កុម្ភៈនេះ នៅ​ស្វាយរៀង​តួលេខ​ខ្ពស់​ជាងគេ មាន​អ្នក​ឆ្លង​ដល់​ទៅ ២៨នាក់ ភ្នំពេញ ២៣នាក់ កណ្តាល ១៣នាក់ និង​ព្រះសីហនុ ៤នាក់។ ស្ថានភាព​ជំងឺកូវីដ ១៩ គិត​ត្រឹមព្រឹក​ ថ្ងៃទី២ ខែមេសាឆ្នាំ២០២១ – អ្នក​ឆ្លង​កូវីដ ១៩ សរុប ២៥៤៦នាក់ – អ្នក​ពាក់​ព័ន្ធ​ព្រឹត្តិការណ៍​សហគមន៍ ២០១៧នាក់ – ព្យាបាល​ជា​សះស្បើយ ១២៦៥នាក់ – កំពុង​សម្រាក​ព្យាបាល ១២៧០នាក់ – ស្លាប់ ១៦នាក់។

ស្រ្តី​ម្នាក់​ទើប​សម្រាល​រួច​ចេញពីមន្ទីរពេទ្យ បែរ​ជា​ទទួល​លទ្ធផល​តេស្ត​វិជ្ជមានកូវីដ ១៩។ បើតាម​លោក ម៉េង វិមានតារា អធិការ​ខណ្ឌមានជ័យ បង្ហោះ​ឲ្យដឹង​នៅក្នុង​បណ្តាញសង្គម ស្រ្តី​ខាងលើ​រស់នៅ​ភូមិមានជ័យ សង្កាត់ស្ទឹងមានជ័យទី១ ខណ្ឌមានជ័យ រាជធានី​ភ្នំពេញ បន្ទាប់​ចេញ​ពី​ពេទ្យ​មក​ផ្ទះ​វិញ ពេល​យក​សំណាក​លើកទី១ ក៏​តេស្ត​ឃើញ​វិជ្ជមាន​តែ​ម្តង ដោយបាន​ឆ្លង​ជំងឺ​កូវីដ ១៩ ពី​ម្តាយ​ដែល​ជាអ្នក​មើល​ថែកូន និង​ចៅ។

ការ​ជក់​បារី​នេះ មិន​មាន​ផ្ដល់​ប្រយោជន៍​អ្វី​ឡើយ​ដល់​សុខភាព​យើង​សូម្បី​តែ​បន្តិច ហើយ​បែរ​ជា​ផ្ដល់​ផល​ប៉ះពាល់​ដល់​ដល់​រាងកាយ សុខភាព​ទូទៅ ជា​ពិសេស​នោះ​សួត​យើង​។ CDC អាមេរិច​បាន​ឲ្យ​ដឹង​ថា អ្នក​ជក់​បារី​ងាយ​វិវត្ត​ទៅ​រក​ជំងឺ​មហារីក​សួត ជំងឺ​បេះដូង និង​ជំងឺ​ដាច់​សរសៃ​ឈាម​ខួរក្បាល។ ហើយ​នៅ​ក្នុង​ស្ថាន​ភាព​ដែល​មាន​ជំងឺ​ឆ្លង​ជា​សកល​ប៉ះពាល់​ប្រព័ន្ធ​ផ្លូវ​ដង្ហើម​ដូច​វីរុស​កូវីដ-១៩​ទៀត​នោះ ធ្វើ​ឲ្យ​ជក់​បារី​កាន់​តែ​ប្រឈម​ខ្ពស់​ក្នុង​ការ​ឆ្លង​វីរុស​នេះ ប៉ះពាល់​ទៅ​ដល់​សួត​ខ្លាំង​ជាង​អ្នក​ធម្មតា។ ទន្ទឹម​គ្នា​នេះ អង្គការ​សុខាភាព​ពិភព​លោក (WHO) បាន​ពន្យល់​ឲ្យ​ដឹង​ថា អ្នក​ជក់​បារី​ក៏​ដោយ ឬ​អ្នក​ជក់​បារី​អេឡិច​ត្រូនិច​ក៏​ដោយ​ សុទ្ធ​តែ​ប្រឈម​នឹង​ការកើត​ជំងឺ​កូវីដ-១៩​ខ្ពស់​ដោយ​សារ ពួក​គេ​ត្រូវ​កាន់​បារី​នៅ​នឹង​ដៃ​ដែល​អាច​មាន​ផ្ទុក​វីរុស ឬ​អាច​ឆ្លង​តៗគ្នា​តាម​រយៈ​ការ​ហុច​ឲ្យ​គ្នា​ជក់​លាយ​គ្នា ​(ដូច​ជា​បារី​អេឡិច​ត្រូនិក Vape ឬshisha ជាដើម)។ WHO បន្ត​ទៀត​ថា តាម​ភស្តុតាង​វិទ្យសាស្ត្រ​ដែល​យើង​មាន​ឥឡូវ​នេះ​បញ្ជាក់​ថា ភាព​ធ្ងន់​ធ្ងរ​ដល់​សុខភាព​ពី​ការ​ឆ្លង​ជំងឺ​កូវីដ-១៩​នៅ​លើ​អ្នក​ជក់​បារី​មាន​ភាគ​រយ​ខ្ពស់​ជាង​មនុស្ស​ដែល​មិន​ជក់​បារី។ ការ​ជក់​បារី​បណ្ដាល​ឲ្យ​ខូច​មុខ​ងារ​ដំណើរ​ការ​របស់​សួត​យើង ធ្វើ​ឲ្យ​វា​ពិបាក​ទប់​ទល់​ជាមួយ​នឹង​ជំងឺ​ប្រព័ន្ធ​ផ្លូវ​ដង្ហើម​ផ្សេងៗ​ដូច​ជា​ជំងឺ​កូវីដ-១៩ ដ៏​កាច​សាហាវ​នេះ​ជាដើម។ ប្រសិន​បើ​អ្នក​ជក់​បារី​ឆ្លង​ជំងឺ​កូវីដ-១៩ នោះ​សុខភាព​របស់​ពួក​គេ​នឹង​ប្រឈម​គ្រោះ​ថ្នាក់​ធ្ងន់ ដោយសារ​សួត​របស់​ពួក​គេ​រង​ការ​ខូច​ខាត​ពី​ការ​ជក់​បារី​ម្ដង​រួច​មក​ហើយ។ ថ្នាំ​ជក់ ឬ​Tobacco ជា​កត្តា​ហានិភ័យ​ចម្បង​បង្ក​ជា​ជំងឺ​សរសៃ​ឈាម​បេះ​ដូង ជំងឺ​មហារីក​ផ្លូវ​ដង្ហើម និង​ជំងឺ​ទឹក​នោម​ផ្អែម ជា​ហេតុ​បណ្ដាល​ឲ្យ​ក្រុម​មនុស្ស​ដែល​មាន​ជំងឺ​ទាំង​ប៉ុន្មាន​នេះ មាន​ភាគ​រយ​ខ្ពស់​ធ្លាក់​ខ្លួន​ឈឺ​ធ្ងន់​ពេល​ដែល​បាន​ឆ្លង​ជំងឺ​កូវីដ-២៩​រួច​ហើយ។​

ព្រឹក​មិញ​នេះ រដ្ឋបាល​រាជធានី​ភ្នំពេញ​បាន​ចេញ​សេចក្តី​សម្រេច​អនុវត្ត​វិធានការ​រដ្ឋបាល​ជា​បណ្តោះ​អាសន្ន ដោយ​ដើម្បី​ទប់​ស្កាត់​ការ​រីករាល​ជំងឺ​កូវីដ ១៩។ នៅ​ក្នុង​សេចក្តី​សម្រេច​នោះ បាន​ផ្អាក​ការ​ធ្វើ​ចរាចរ និង​សកម្មភាព​អាជីវកម្ម​ពី​ម៉ោង ៨យប់ ដល់​ម៉ោង ៥ភ្លឺ រយៈពេល ២សប្តាហ៍ គិត​ចាប់​ពី​ថ្ងៃទី១ ខែ​មេសា នេះ​ត​ទៅ លើក​លែង​តែ​ករណី​ចាំបាច់​មួយ​ចំនួន​ប៉ុណ្ណោះ។ ក្នុង​ករណី​មាន​អ្នក​បំពាន​នឹង​សេចក្តី​សម្រេច​នេះ សមត្ថកិច្ច​នឹង​ចាប់​យក​មធ្យោបាយ​ធ្វើ​ដំណើរ រួម​មាន​ម៉ូតូ ឡាន​ជា​ដើម​នោះ ទៅ​រក្សា​ទុក​នៅ​ខណ្ឌ ឯ​អ្នក​បំពាន​តម្រូវ​ឲ្យ​ធ្វើ​ចត្តាឡីស័ក​នៅ​ផ្ទះ​រយៈពេល ១៤ថ្ងៃ។ "យើង​កុំ​ចាំបាច់​ឃាត់​គាត់ តែ​យើង​រក្សា​ទុក​មធ្យោបាយ​ធ្វើ​ដំណើរ ឧទាហរណ៍​ថា បើ​គាត់​ជិះ​ម៉ូតូ យក​ម៉ូតូ​គាត់​ទុក ហើយ​ឲ្យ​មនុស្ស​ទៅ​ធ្វើ​ចត្តាឡីស័ក​នៅ​ផ្ទះ បើ​គាត់​ជិះឡាន​យក​ឡាន​ទៅ​ទុក ហើយ​ឲ្យ​មនុស្ស​ទៅ​ធ្វើ​ចត្តាឡីស័ក​នៅ​ផ្ទះ គ្រប់ ១៤ថ្ងៃ ទើប​ឲ្យ​គាត់​មក​ទទួល​សម្ភារៈ​វិញ"។ នេះ​ជា​សារ​សំឡេង​របស់អភិបាល​រាជធានី​ភ្នំពេញ ឯកឧត្តម ឃួន ស្រេង បញ្ជា​ទៅ​គណៈ​បញ្ជាការ​ឯកភាព​ខណ្ឌទាំង១៤ ស្នងការ​នគរបាល​រាជធានី​ភ្នំពេញ បញ្ជាការ​កង​រាជ​អាវុធហត្ថ​រាជធានី​ភ្នំពេញ ។ បន្ថែម​ពី​នោះ អំឡុង​ពេល​ធ្វើ​ចត្តាឡីស័ក បើ​អាជ្ញាធរ​មូលដ្ឋាន​ពិនិត្យ​ឃើញ​ថា មិន​អនុវត្ត​តាម​ការ​ណែនាំ​របស់​សមត្ថកិច្ច នោះ​នឹង​អនុវត្ត​នូវ​ការ​ផាក​ពិន័យ​បន្ថែម​ទៀត។

ស្ត្រីខ្មែរ​ម្នាក់​ទៀត​ហើយ ដែល​មាន​វិជ្ជមាន​កូវីដ ១៩ ស្លាប់​នៅ​មន្ទីរពេទ្យ​មិត្តភាពខ្មែរ-សូវៀត នៅ​ព្រឹកថ្ងៃទី០១ មេសានេះ។ ស្ត្​រីរូប​នោះ អាយុ ៦៧ឆ្នាំ រស់នៅ​សង្កាត់​ផ្សារថ្មី២ ខណ្ឌដូនពេញ រាជធានី​ភ្នំពេញ រកឃើញ​វិជ្ជមានកូវីដ ១៩ កាលពីថ្ងៃទី២៣ ខែមីនា ឆ្នាំ២០២១ នេះ​បើតាមការ​បញ្ជាក់​ពី​ក្រុមគ្រូពេទ្យ​ប្រាប់​បណ្តាញ​ព័ត៌មាន Fresh News ពាក់​ព័ន្ធ​នឹង​ករណី​ខាងលើ​នេះ ក្រសួង​សុខាភិបាល មិន​ទាន់​ចេញ​សេចក្តី​បញ្ជាក់ថា ស្លាប់​ដោយសារ​ជំងឺ​កូវីដ ១៩ ឬយ៉ាង​ណា​នោះ​ទេ

ស្ត្រី​អ្នក​ជំងឺកូវីដ ១៩ ស្លាប់​ម្នាក់​ទៀត​ហើយ​នៅ​ព្រឹកថ្ងៃទី ១ ខែមេសា នេះ នៅ​មន្ទីរពេទ្យ​មិត្តភាពខ្មែរ-សូវៀត។ បើ​តាម​ការបញ្ជាក់​ពី​ក្រុម​គ្រូពេទ្យ​ប្រាប់បណ្តាញ​ព័ត៌មាន Fresh News​ ស្ត្រីរូប​នោះ​មាន​អាយុ ៧០ឆ្នាំ រស់នៅ​សង្កាត់​ទន្លេបាសាក់ ខណ្ឌចំការមន រាជធានី​ភ្នំពេញ។ ទោះ​យ៉ាង​ណា​មិន​ទាន់​មាន​សេចក្តី​ប្រកាស​ពី​ក្រសួង​សុខាភិបាល​ថា ស្រ្តីវ័យ ៧០ឆ្នាំ​រូបនេះ ស្លាប់​ដោយសារ​ជំងឺកូវីដ ១៩ ឬជំងឺ​អ្វី​ផ្សេង​នោះ​នៅឡើយ​ទេ។