គ្រប់អាហារដែលល្អសម្រាប់សុខភាពសុទ្ធតែមានសារធាតុចិញ្ចឹម។ សម្រាប់អ្នកជំងឺទឹកនោមផ្អែមអាចនឹងមានការលំបាកក្នុងការជ្រើសរើសប្រភេទអាហារដើម្បីកុំឲ្យកម្រិតជាតិស្ករក្នុងឈាមកើនឡើង។ តើអាហារបែបណាខ្លះដែលល្អសម្រាប់អ្នកមានជំងឺទឹកនោមផ្អែម?
អាហារមានគុណប្រយោជន៍ចំពោះអ្នកជំងឺទឹកនោមផ្អែម
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. បន្លែស្លឹកពណ៌បៃតង
បន្លៃស្លឹកពណ៌បៃតងដូចជាស្ពៃពួយឡេង និងស្ពៃខៀវ (Kale) សម្បូរដោយវីតាមីន A វីតាមីន C និងកាល់ស្យូម។ ការសិក្សាជាច្រើនបានបង្ហាញថាបន្លែស្លឹកពណ៌បៃតងអាចកាត់បន្ថយហានិភ័យជំងឺទឹកនោមផ្អែមប្រភេទ២។
២. ពពួកផ្លែក្រូច
ពពួកផ្លែក្រូចគឺមានសមាសធាតុ Glycemic indexទាប តែសម្បូរដោយវីតាមីន C ដែលពង្រឹងប្រព័ន្ធភាពស៊ាំ។ ពពួកផ្លែក្រូចក៏មានសារធាតុចិញ្ចឹមផ្សេងៗដូចជា folate និងប៉ូតាស្យូមដែលគេបានបង្ហាញថាអាចជួយដល់សុខភាព និងសម្ពាធឈាម។ ការសិក្សាឆ្នាំ២០០៨បានរកឃើញថាការញ៉ាំផ្លែក្រូចអាចបន្ថយហានិភ័យជំងឺទឹកនោមផ្អែមនៅលើស្ត្រី ប៉ុន្តែការផឹកទឹកក្រូចស្រស់អាចនឹងបង្កើនហានិភ័យទៅវិញ។ ផ្លែក្រូចថ្លុងគឺមានសន្ទស្សន៍ជាតិស្ករក្នុងអាហារ (Glycemic index) ទាបបំផុតគឺត្រឹមតែ២៥ប៉ុណ្ណោះ។
៣. គ្រាប់ធញ្ញជាតិ
គ្រាប់ធញ្ញជាតិសម្បូរដោយជាតិខ្លាញ់ល្អ និងជាតិសរសៃដែលជួយការពារដល់សុខភាពបេះដូង និងរក្សាលំនឹងជាតិស្ករក្នុងឈាម។ គ្រាប់ធញ្ញជាតិក៏ជាប្រភពដ៏ល្អនៃប្រូតេអ៊ីនរុក្ខជាតិដែរ។
៤. Oatmeal
Oatmeal មានជាតិសរសៃច្រើនដែលអាចពង្រឹងសុខភាពបេះដូង និងជួយអ្នកមានជំងឺទឹកនោមផ្អែមប្រភេទ២មានកម្រិតអេម៉ូក្លូប៊ីន A1C ក្នុងកម្រិតដែលសមស្រប។ ជម្រើសដែលល្អសម្រាប់សុខភាពគឺជ្រើសរើស Oatmeal ដែលមិនមានបន្ថែមជាតិស្ករ ប៉ុន្តែយើងអាចប្រើទឹកឃ្មុំ ឬផ្លែបឺរីស្រស់មួយស្លាបព្រាកាហ្វេ និងថែមទឹកដោះគោ ៥មិល្លីលីត្រជាមួយនឹងគ្រាប់ធញ្ញជាតិ។
អត្ថបទពាក់ព័ន្ធ៖
៥. ផ្លែបឺរ
ការញ៉ាំខ្លាញ់ល្អគឺសំខាន់សម្រាប់សុខភាពបេះដូង ជាពិសេសសម្រាប់អ្នកមានជំងឺទឹកនោមផ្អែមដោយសារភាគច្រើនអ្នកមានជំងឺទឹកនោមផ្អែមមានហានិភ័យខ្ពស់នៃការវិវត្តជំងឺបេះដូង។ សារធាតុខ្លាញ់ monounsaturated មានក្នុងផ្លែបឺរអាចជួយបញ្ចុះកូលេស្តេរ៉ូល បន្ថយការរលាកក្នុងរាងកាយ និងជួយដល់សុខភាពសម្ពាធឈាម។ ម៉្យាងទៀត ផ្លែបឺរក៏មានផ្ទុកជាតិសរសៃដែលអាចរក្សាលំនឹងកម្រិតជាតិស្ករក្នុងឈាម។
៦.បន្លែដែលគ្មានជាតិម្សៅ
បន្លែដែលគ្មានជាតិម្សៅដូចជាផ្កាខាត់ណាខៀវ ទំពាំងបារាំង និងឆៃថាវក្រហម (Beet) មានកាបូអ៊ីដ្រាតទាប ប៉ុន្តែជួយបង្គ្រប់ការទទួលបាននៃវីតាមីន ជាតិរ៉ែ ជាតិសរសៃ និងphytochemical ប្រចាំថ្ងៃ។ ដោយសារពពួកបន្លែនេះមានកាឡូរី និងកាបូអ៊ីដ្រាតទាបទើបក្លាយជាជម្រើសអាហារដ៏ល្អសម្រាប់អ្នកមានជំងឺទឹកនោមផ្អែម។
៧. ផ្លែប៉េងប៉ោះ
សារធាតុ Lycopene មានក្នុងផ្លែប៉េងប៉ោះគឺជាសារធាតុប្រឆាំងអុកស៊ីតកម្មដែលពង្រឹងដល់សុខភាពបេះដូង និងបន្ថយហានិភ័យជំងឺមហារីក។ ផ្លែប៉េងប៉ោះក៏មានវីតាមីន C ដែលអាចបញ្ចុះកម្រិតជាតិស្ករ និងបន្ថយការកើនឡើងនៃកម្រិតជាតិស្ករក្នុងឈាមភ្លាមៗក្រោយពីញ៉ាំអាហារសម្រាប់អ្នកមានជំងឺទឹកនោមផ្អែមប្រភេទ២។
៨. ដំឡូងជ្វា
ដំឡូងជ្វាមានជាតិសរសៃខ្ពស់បើប្រៀបធៀបនឹងដំឡូងបារាំង ហើយដំឡូងជ្វាក៏ផ្តល់ប្រូតេអ៊ីនរុក្ខជាតិដែលអាចជួយឲ្យឆ្អែតបានយូរចន្លោះអាហារ និងអាចរក្សាលំនឹងកម្រិតជាតិស្ករក្នុងឈាមផងដែរ។
៩. ពពួកផ្លែបឺរី
ពពួកផ្លែបឺរីមានសារធាតុប្រឆាំងអុកស៊ីតកម្មខ្ពស់ និងអាចកាត់បន្ថយហានភ័យជំងឺបេះដូង និងមហារីកបាន។ មិនត្រឹមតែប៉ុណ្ណោះនៅមានសារធាតុប្រឆាំងការរលាកទៀតផង។ ផ្លែស្ត្របឺរី ផ្លែraspberry និងផ្លែប្លេកបឺរីសុទ្ធតែជាជម្រើសល្អសម្រាប់អ្នកមានជំងឺទឹកនោមផ្អែម។
១០. ត្រីសម្បូរដោយអាស៊ីតខ្លាញ់អូមេហ្គា៣
ត្រីសាល់ម៉ុនសម្បូរដោយអាស៊ីតខ្លាញ់អូមេហ្គា៣ដែលអាចបន្ថយហានិភ័យជំងឺបេះដូង។ ម៉្យាងទៀតត្រីសាល់ម៉ុនក៏មានវីតាមីន D និង selenium ជួយទ្រទ្រង់ដល់សុខភាពសក់ ស្បែក ក្រចក និងឆ្អឹង។ ត្រីផ្សេងទៀតដែលសម្បូរអាស៊ីតខ្លាញ់អូមេហ្គា៣រួមមានត្រីសាឌីន ត្រី mackerel និងត្រី herring។ ដោយសារសាច់ត្រីមិនមានកាបូអ៊ីដ្រាត ដូចនេះហើយសាច់ត្រីមិនបង្កើនកម្រិតជាតិស្ករក្នុងឈាមទេ។ ការបន្ថែមសាច់ត្រីសាល់ម៉ុនទៅក្នុងរបបអាហារអាចជួយពន្យឺតការរំលាយអាហារផ្សេងដែលបានញ៉ាំ និងជួយឲ្យឆាប់ឆ្អែត។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម